1 KINṘÖTNGÖ 15
15
Keuntö Ngam Kasòng Chöngö
1Ngaich Tāvit nö mānlö patīre nö ël ök elpanam Tāvit; ane inrē anga-aṅ halēn chūök ök kasòng chöngö ngam Tēv, vītö chūök inrūkui e inrē. 2Ngö ṙô ngaich Tāvit, Öthĕngtak höng yip Lēvī kameun ngam kasòng chöngö ngam Tēv, pò ngam Mā Tēv nö katöllen cha nö kameun ngam kasòng chöngö ngam Mā Tēv mameukṙen ò inrē nöng örheūheu. 3Hamūl yik aṅ Israĕl ngaich Tāvit nö ṙòkhöre nö i Yerūsalem nö kētö öp kasòng chöngö ngam Mā Tēv nö ik chūök e, ök halēnken ò chūök e. 4Hamūl yik kikōnyö kūön Āròn inrē anga-aṅ tö yik Lēvī: 5Aṅ in yik kikōnyö kūön Kōhat, Uri-ĕl yöngkūö, holtö töhēngòng nët anāi; hol maneuk ò; 6Aṅ in yik kikōnyö kūön Mērāri. Asāyā yöngkūö, holtö tönëtòng, nët anāi hol maneuk ò; 7Aṅ in yik kikōnyö kūön Kersōm, Yô-el yöngkūö, holtö töhēngòng lūöi anāi hol maneuk ò; 8Aṅ in yik kikōnyö kūön Elīsafān, Samāyā yöngkūö, holtö tönëtòng hol maneuk ò; 9Aṅ i yik kikōnyö kūön Hepròn, Eli-ĕl yöngkūö, holtö töhëvhör anāi hol maneuk ò: 10Aṅ i yik kikōnyö kūön Usiel, Aminatap yöngkūö, holtö töhēngòng nëtsīön tak hol maneuk ò;
11Ngaich Tāvit nö havanten nak kūönṙô nā Sētòk, Apīatör inrē, tö yik Lēvī hēk Urī-el, Asāyā, Yô-ĕl, Samayā, Eli-ĕl, Aminatap inrē, 12Ngö ṙô ngaich tö cha, Yī-ö yin yöngkūö patī yik yöng Lēvī; ahetlöre yin, yī-ö tö yip hol maneuk yīö, hòṅ yīö kētö öp kasòng chöngö ngam Mā Tēv, ngam Tēv Israĕl, ip chūök e töhalēnkaṙen tö chu. 13Kūö yīö ik la urĕh öt keūnö e ngaich ngam Mā Tēv ngam Tēv hī nö tāiny nö in ih pò ih öt milēṙen tö e nö sā inchöngten re nö in e.
14Ahetlöre ngaich yik kūönṙô tö yik Lēvī nö kēlö ök kasòng chöngö ngam Mā Tev, ngam Tēv Israĕl. 15Ngaich yik Lēvī nö keun ök kasòng chöngö ngam Tēv nö el ranôṙö cha, nö kaneūnu, sā inchöngten re tö Môsös nö sā ngam ṙô ngam Mā Tēv.
16Ngaich ang Tāvit nö tölṙô yik yöngkūö aṅ in yik Lēvī nö vīlö yik hol maneuk cha nö tumkökṙôre yik töhōtu nö pōitô tī nö röng nuk ranöng, i hārp, līör, simpôl inrē, nö hachônglö ṙô ṙanāmölōn. 17Lökten yik Lēvī nö vīlen Heman ök kikōnyö kūön Yô-ĕl; ök hol maneuk ò inrē Asaf kikōnyö kūön Perekiyā; aṅ in yik kikōnyö inrē kūön Mērārī, hol maneuk cha, Ētan ök kikōnyö kūön Kusayā; 18Hol cha inrē yik hol maneuk cha im innëtö chūök Sekariyā Yē-asi-el, Semiramòt Yēhī-ĕl, Unnī, Ēli-ap, Pennayā, Me-asīyā, Matītīyā, Ēlifelehu Mikneyā inrē, yik yōmkūö inkūp inrē, Opĕtitöm Ye-ī-el inrē; 19Tumkökṙôre, Hēman, Asaf, Etān inrē, cha-a pamòng mās simpôl; 20Sekariyā, Asī-el, Semiramôt, Yehī-el, Unnī, Elī-āp, Mē-esī yā, Pennayā inrē ramöng Hārp nö sātī Alamòt; 21Matitiyā pöri Elifelehū, Miknëyā, Opĕt-ĕtöm, Ya-i-el, Asasīyā inrē mahachōḵlö ṙô nö aṅtī tö līör sātī Semīnit.
22Kenneyā yöngṙen yik Lēvī nö i ëlö tinkökö, cha-a mahachōḵ tö ëlö tinkökö, pò ò nö töakaha elmat. 23Perekiyā, Elkāna inrē yōm kūö inkūp ök kasòng chöngö. 24Sipaniyā, Yôsafat, Natanĕl, Amasāi, Sakariya, Pennayā, Ēli-ĕsör, tö yik kūönṙô, famöö römpĕt nö i kūö ök kasòng chöngö ngam Tēv. Opĕtitöm, Yahī-a inrē yōmkūö inkūp ngam kasòng chöngö.
Chuh Yeruselem Tī Tök Kasòng Chöngö
(2 Sam 6.12-22)
25Lökten Tāvit tö yik minṙöinylen Israĕl, tö yik yöngkūö tököṅnyu inrē, nö kiröönngöre nö kēlö ök kasòng chöngö kinlēḵngô ngam Mā Tēv nö ṙā-ang patī Opĕtitöm nö holtö ṙanāmölōn. 26Kūö ngam Tēv inrē nö holṙen yik Lēvī yik kameun ök kasòng chöngö kinlēḵngô ngam Mā Tēv, kētö tökētu cha-a sat nòng kōiny nuā sat nòng inrē kūön sīṅp. 27Hayūtöre ang Tāvit tö tövai linen hilā, ngatī inrē nö ṙòkhöre yik Lēvī yik kameun ök kasòng chöngö, tö yik tumkökṙôre, Kenneyā inrē mahachōlö ṙô yik tumkökṙôre; hayūtö inrē Tāvit tö linen Sörplis. 28Lökten yik Israĕl nö ṙòkhöre nö kēlö ök kasòng chöngö kinlēḵngô ngam Mā Tēv nö holtö inyôṙö ṙô, I ṙô sinrōl nö fööṙö, römpĕt, simpôl inrē pōitô inrē ëlö tinkökö nö i ṙô hārp, līör inrē.
29Ngaich hē ngam kasòng chöngö kinlēḵngô ngam Mā Tēv nö yih nö ik elpanam Tāvit, môknyö kūönre ngaich Maiköl nö löknyö kūö inkūp lökhöt kuföt, ök kikānö kūön Sôl, ngaich ök rācha Tāvit nö kiṙīöm nö ṙāmölōn; ngaich anga-aṅ nöng ellōn re lōn nö ahūöngen ò.
Currently Selected:
1 KINṘÖTNGÖ 15: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
