1 KINṘÖTNGÖ 14
14
La-en Tāvit Nö I Yeruselem
(2 Sam 5.11-16)
1Ngaich Hairām ök rācha aṅ Tūrös nö tīnngö ma-ahānga nö in Tāvit, sītör chōn inrē vamī ihong tö mistirī nö mānlö patī ò. 2Ngaich Tāvit nö meuk ngam Mā Tēv nö haköpngen ò nö rācha nö i kui Israĕl, tö ök pūlngö ò inrē nö hapōilöng tö pòkūö yik tarik ò Israĕl.
3Ṙūölö ṙôken pīhöre ngaich Tāvit nö i Yērusalem, pōyen hakūönti inrē Tāvit tö nyīö kikōnyö kikānö inrē. 4Në nun minënyö yik nyīö yik in ò nö i Yerusalem: Sammū-a, Sōpāp, Nātān, Sòlòmön, 5Iphār, Elisū-a Ēlpēlĕt, 6Nōkah, Nēfĕk Yāfī-ā, 7Ēlīsāma, Pēli-atā, Ēlifëlet inrē.
Mihôiṅ Tö Filistain
(2 Sam 5.17-25)
8Hē yik aṅ Filistain nö hāngö Tāvit nö hachāmö kui nö rācha nö i kui Israĕl nö ṙòkhöre, ṙòkhöre ngaich yik aṅ Filistain nö kiröönngöre nö chöhö Tāvit; hāngö e ngaich Tāvit ngaich kiröönngöre nö lā-al cha. 9Yih yik aṅ Filistain nö el achāṙö Rifēm nö kilöön inlānen. 10Hatöntöre ngaich Tāvit nö im Tēv, Kiröönngöre öichu lā-al yip aṅ Filistain? Kēten cha öm min eltī chu? Ngaich ngö ṙô ngam Mā Tēv tö ò, Kuṙòh, kēten cha chin min eltī meh. 11Lökten ang Tāvit nö kilöönö cha nö i Pāl Perasim ngaich mihôiṅ tö cha. Ngaich ngöṙô anga-aṅ, “Halöngten chu an ngam Tēv kuhēthötre sā ṙanöingö öich i yip lā-al re”. Lök ök chūökö nö Pāl Perasim invëka. 12Ṙāngö nuk tēv re cha-a nö umuh, kētö chöngö ngaich Tāvit, föngi ngaich anū-ö.
13Hēk nö sönen yik Filistain nö el achāṙö nö kilöön inlānen. 14Ngaich hē Tāvit nö hēk nö hatöntöre nö im Tēv, ngö ṙô ngaich ngam Tēv tö ò, Uh man kiröönngöre öm löklö lā-uk cha; kiröönngöre pöri havīngöre ngaich yih in cha kamtö nup palsam chōn. 15Ngaich yē meh hangṙô röön kumröönngöre nö el kui nup palsam chōn ngaich möl më-eṅ kuṙòh kiyung; tön ngaich an ngam Tēv nö urēhĕkūö meh nö fël yip aṅ Filistain kumyung. 16Ngaich Tāvit nö sā ṙô ngam Tēv nö tölṙô ò, ngaich cha-a nö fël yip kumyung aṅ Filistain löktökūö Kīpīön tölngö Kēsör. 17Keuheūtngöre chūök ngaich ineūnyö Tāvit nö i minë panam, ngaich ngam Mā Tēv nö kētö kui yik pumnāmö tarik nö pa-ekūö tö ò.
Currently Selected:
1 KINṘÖTNGÖ 14: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
