MATHI 9
9
Akela kiatsün tsak Lomeiji
(Mrk 2:1-12; Luk 5:17-26)
1Nai Yisu kheng tsakai napküta khiamnok yankü khukü apa noksongai shin. 2Nungai khaiunia ajantsoüh akela nou kiatsün khaiunia tsak, then ai saikü apa dongai kankü shin. Tilai Yisuüh ngüso amonglam asong ep, akela kiatsün tü ngiom, “Jü thso! mong songkü lüthe; ni ün angei wankiu-iu.”
3Nungai ngiokhemtsandetsünso ajantsoüh meshen mongai ngiom, “Nung khaiunia nou Goa lochiji!”
4Yisuüh ngüso mongyang ngelakü ngiom, “Tiauta asamüh asam mongai tsümeikü yangji? 5‘Apim angei wankiu-iu’ ta ngio ao shiothso süne ‘Achuo, naiuso lütsakei’ ta ngioao shiothso? 6Goumchi ko Khaiunia Thso da angei wankiuao oukong noin ta asamüh ngelaao thaiutha ngü nung chhi-e.” Nungtiphe apaüh akela kiatsün tü ngiom, “Achuo, athen pilokü atsamai lüshi!”.
7Nai nung khaiunia nou chuoküta, apa tsamai shi-an. 8Tilai hoi nou nung ep, ngüso hat, naiuso khaiunia hao nungti oukong kiutsün thaiutha Goa nian lomsan.
Yisuüh Mathi Jonji
(Mrk 2:13-17; Luk 5:27-32)
9Yisu nung ainou khunai, Mathi ta khaiunia tsak liukim shitsün apa chhikamthang ai moknoikü ep. Yisuüh apa tü ngiom, “Jü phiai ohoilut.”
Nai Mathi tsakü chuokü apa phiai hoilut.
10Mathi tsamai chih hekü moknoi nai nungai liukim shitsünso naiuso angei khaiuniahoi piakü shikü, Yisu naiuso apa sahoisoko moknoiha. 11Farisihoi nou nung epnai, ngüsoüh apa sahoi tü ngiom, “Tiauta asam atsandetsün nou liukim shitsün naiuso angeihoi nouko heshiuji?”
12Yisuüh nung lukü thashin, “Ameilei nouso thaiutha moushe ngepo poukü tsünoi, lüko akia nouso thaiuthalu apou noin. 13Asam khuküta asiongio nung ti thaiutha ngioji ta lüyanghelu: ‘Ngü aloat thainian chaithio tsüde atsüojin aiuji;’ tiautenai asiohoi tsüde, lüko angeihoi jonao ngü shin.”
Keithon thaiutha Sangtsün
(Mrk 2:18-22; Luk 5:33-39)
14Nungai Yohan sahoiso Yisu dongai shikü ngioji, “Tiauta samüh naiuso Farisi hoi nou paikü jam keithonji, lüko asahoiüh keitsüthonji?”
15Yisuüh thalan, “Tsamsigoh shanpaou ngüsoko noitsün lektso sümai nai shi nouso tsümonglengkü noi-e süne? Nungti laitso tsüde-e! Lüko tilai tsamsigoh shanpaou ngüso ainou nialükhune, nungai ngüsoüh keithonao ajekhaiu nou shi-e.
16“Ne akeng nou da ne ayan sauüh tsüchiolutji, tititenai ayan chioluttsün nou laman-e naiuso phakhut nou tekkü chipek-e. 17Tsüdekünai khaiunia nou theng ayan nou nyikhun nekong akeng nai tsüthioji. Nungti taiunai nyikhun nekong nou paiyane, naiuso theng nou hongpengkü, nyikhun nekong nou lutheane. Lüko tilai theng ayan nyikhun nekong ayan nai thio-e, nemtso meikü noi-e.”
Jaira thso naiuso She shetsün Nyiuhai
(Mrk 5:21-43; Luk 8:40-56)
18Yisuüh nung chitekü noi nai, Yihuda hai aniakei tsak shikü, apatü kaukü amkü ngiom, “Jü thso loteng ean; lüko ni shiküta apa tü aphaüh lüthan, naito apa aa shi-e.”
19Nungtiphe Yisu tsalokü apa sahoiso hakü apa phiai hoilutkü, khuha.
20Naiuso nyiuhai tsak sau pon chekü nime she shetsün noiküla, apa phiai shiküta Yisu nepeng nai than. 21Apaüh meshen mongai yang, “Ngo apa ne nailu lüko than nai ngü lomei-e.”
22Yisuüh phiai sashikü ngiom, “Jü thso mong lüsong! Ni monglamtsün tsangkü ni lomeikiu-iu.” Naiuso nyiuhai nou nung taokolu mei-an.
23Naiuso tilai Yisu asonghai nou tsamai nap, poipoi mattsünso naiuso miawan kam thaiutha hoi nou thatü ngemkü epkü, 24Apaüh ngiom, “Apem khengai ashian! Menyiuthso nou ee tsüde, lüko asai sailakü noin!” 25Nungai ngüso apa tü nyailut. Lüko tilai hoi nou soilükhun-in Yisu menyiuthso nou saitaiu nai napküta apa tü pha nai thalo naiuso menyiuthso nou chuo. 26Nung ngiongem nou shingkhannio apemai pengkü khun.
Niopek Khaiunia nime Lomeiji
27Yisu nung athang ainou khunai, niopek khaiunia nime apa phiai hoilutkü, shiküta vekü ngiom, “David Thso, sam tü atsüojin!”
28Tilai Yisu tsammongai nap, niopek nime nou apa dongai shinai Yisuüh ngüne tü ngiom, “Ngü aje lomeikiuao shio-e ta yangji süne?”
Ngüneüh apa tü, “Ah, Apaou!” ni lomeiau shio-e ta yangji ta thashin.
29Nungai Yisuüh ngüne niovei ai thankü ngiom, “Ajeüh monglamtsünli aje tü lüchhi!” 30naiuso ngüne niovei sat. Nai Yisuüh ngüne tü nung “sau hao lachite!” ta thatü mongkü ngiom. 31Lüko ngüneüh khuküta, shingkhannio apemai nung ngiongem nou pungpengkü noiküla.
Leijeb Khaiunia tsak Lomeiji
32Khaiunia nime nou shikhuwantsün tao, khaiunia ajantsoüh angei onthso nou thaloutsün leijeb khaiunia tsak apa dongai nialoukü shin. 33Lüko tilai angei onthso nou koman, leijeb khaiunia nou ngio singioau yalonai hoi ngakü ngiom. Ngüsoüh lekkatkü samüh “Israel nai nungti tilai tsüepde!” ta vekü ngiom.
34Lüko Farisihoi nou ngiom, “Yisu hau angei onthso nouso komanao oukong kiutsün nung Angei onthso nouso ongko ahei nou noin.”
Yisuüh Khaiuniahoi tü Tsüojinkü yangkiu
35Yisuüh noksong naiuso nok nouso apemai lemkü sailukü tsakei. Yihuda kamthang nouso ai Goa nokshing thaiutha Ngem Amei chimkü, naiuso akiasiya in amomo lomeikiukü tsakei. 36Lüko apaüh hoi nou epnai, ngüso thaiutha apa mongai kiakü yangkiu, tiautenai apaüh ngüso onnemok hoi ajimtsün tsühakü tsakeitsünli ep. 37Nungai apaüh sahoi tü ngiom, “Be-eiu yamao eiu songkü noin, lüko achhiau mephaiu nouso thsaothsaokülu. 38Nungtiphe asamüh be-eiuyam Apaou tü apa be-eiuyam mephaiu piakü hongao misao lüsao.”
Currently Selected:
MATHI 9: KHIABSI
Highlight
Share
Compare
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
