MATHI 10
10
Honghoi Chekü Nime Nouso
(Mrk 3:13-19; Luk 6:12-16)
1Yisuüh apa sahoi chekü nime nouso jonshikü angei onthso komanao naiuso akiasiya in amomo apem lomeikiuao oukong kiu. 2Sahoi chekü nime nouso: (Peter ta jontsün) Simon, naiuso anio nou Andria; Zebedi thso Yakob naiuso anio nou Yohan; 3Philip; Bartholoma; Toma; naiuso liukim shitsün Mathi; Alfia thso Yakob; Thadia; 4meshen shingkhan ta tsüojintsün Simon; naiuso Apa janheantsün Yihuda Iskariot; nungso noiküla.
Sahoi Chekü Nime Hongpengji
(Mrk 6:7-13; Luk 9:1-6)
5Sahoi chekü nime nouso Yisuüh nung ayamhan kiukü hongpengji, “Melemaohai goumchi naiuso Samariahai noksong tiaitso lanap. 6Lüko mowankü noitsün onnemok Israel khaiunia dongai lükhu. 7Asam khukü, ‘Aün Nokshing shimkü noin ta lüchim!’ 8Akia nouso lülomeikiu, ee nouso ahkü ashi-i, Jee nou lülomeikiu, naiuso angei onthso nouso lükoman. Asamüh amai tsüyangkü ep, amai tsüyangkü lükiushi. 9Asam nekong ai chaiou, tangkason, tsüdekünai taoson nou langtsün chai lakan. 10Asam khunai asaohetsün nekong, nehong, hokkhut, naiuso pailai apoi lakan. Tiautenai achhitsünso haoto ngüsoüh poutsün kiuao noin.
11“Ti noksong tsüdekünai nokai asam nappe, nungai asam louao sau mongchiokü noin, lüyam naiuso asam mokhukün lektso nungai lünoi. 12Tilai asam tsamai nappe, ‘Asam ko aalo lünoi ta lüngio.’ 13Nung tsamai kihtsünsoüh ni monglengkü lounai, asam nokmei salam ngio nouko lünoi-i, lüko ngüsoüh monglengkü tsülounai asam salam ngio laokü lülowan. 14Ajantsoüh asam tsülounai, tsüdekünai asam ngio tsü-angnai, asamüh nung tsam tsüdekünai nok ainou shikhunai, asam hok ainou pu pattanküta lükhuwan. 15Atsüoting ngo asam tü ngioji, Mikhem Ajekhaiu nai Goa nou nung nok nouko naito Sodom naiuso Gomora khaiuniaso tü atsüojinyang intso piatsokü han-e!
Ashiao noi nou Ajeiat
(Mrk 13:9-13; Luk 21:12-17)
16“Anglu! ngü asam chiuhoi ongko onnemok hoi khekkü hongji, nungtiphe asam paoli thsümonkü lüthe naiuso mükhamli saitha lünoi. 17Lüko khaiunia thaiutha lütsüolu; tititenai ngüsoüh asam nyung hao mikhem nai thumkü kiuwane, naiuso Yihuda kamthang nai asam tü shiuh-e. 18Asam Jü thaiutha nokpao nokshinghoi naiuso Melemaohoi khako Ngem Amei mitha theao niakü khu-e. 19Lüko tilai ngüsoüh asam theluao niakü shi-e, asamüh titi ngio-e, tsüdekünai ti in chite-e ta layangelat, nung taokolu asamüh ti ngio-e nung asam hao kiu-e. 20Tititenai ni ngioau nou angio tsüde, lüko asam Po Onthsoüh asam tsangkü chite-e.
21Deisinio nou deisinio naiuso po nou meshen thso, eaniao thümkü kiu-e, naiuso thsohaiüh posinyiu thako tsa-e, naiuso ngüso luat-e. 22Jü thaiuthako khaiunia apemüh asam tü chinyane; lüko sauüh athon saokü jeilo-e apa kipsane. 23Tilai ngüsoüh noksong tsakko asam omhe-i-e asam noksong amao tsakai lükhu. Ngü asam tü atsüoting ngioji, Khaiunia Thso moshikün khako asamüh Israel noksong nouso ai chhi mothakhemkü noi-e.
24“Atsandetsün konai sahoi song tsüde, tsampao konai tsamki song tsüde, 25Nungtiphe sahoi nou meshen hau tsandetsün khekkü iulanai naiuso tsamki nou apa tsampao khekkü iulanai nungüh saiu-iu. Tsampao tü Belzebub ta jon naito, apa tsammongso tü tekkü tsaokü jon-e!
Sau lon Hat-e
(Luk 12:2-7)
26“Nungtiphe khaiunia lon lahat, tilüsong lo tsangtaiukü noin, nung tsütsangshi-e, naiuso akaosikaokhan alum ngekü iula-e. 27Anyakhem nai ngü asam tü ti ngioji, nung asamüh awon nai lüchite, naiuso asamüh nyankü ti lula, nung tsamkhaiu nai lüve. 28Sauhaiüh pem luatji, lüko onthso luatao tsüshio ngüso lon lahat; lüko Goa sauüh onthso naiuso pem nemtso inheeng nai mowaniao shio, apabao lühat. 29Ni müthsat nime tangka tsak nou tuh ao shiom, külüko nung müthsat tsaktso asam Poüh tsüngekü goh ai tsüsa-i-e. 30Asam khaiu nai khaiuou lüko apem vesankü noin. 31Nungtiphe lahat, müthsat piakü nouko naito asam tekkü chenthso!
Khrista Thalutsün naiuso Wantsün
(Luk 12:8-9)
32“Sauüh khaiunia khako ngü thalu-e, aün nai noitsün Jüpo khako ngü lüko apa thalu-e. 33Lüko sauüh khaiunia khako ngü tsüthalu-e, aün nai noitsün Jüpo khako ngü lüko apa tsüthalu-e.
Nokmei tsüde lüko Sah
(Luk 12:51-53; 14:26-27)
34“Goumchi ko nokmei sungiao ngo shin ta layang; nokmei tsüde, lüko sah sungiao shin. 35Thso tsaküh meshen po thako, naiuso menyiuthso nou meshen nyiu thako ahle nou meshen nyai thako tsalo-iao ngü shin. 36Khaiunia tsak ün atsaoting eh nou apa tsammongso mepemhoilu noi-e.
37“Sauüh ngüko nai meshen po tsüdekünai nyiu tekkü tsüojine; apa jü sahoi au tsümai; naiuso sauüh ngüko nai meshen thso melo naiuso menyiuthso tekkü tsüojine; apa jü sahoi au tsümai. 38Naiuso sauüh meshen paiphu pikü jü phiai tsühoilut, apa jü sahoi au tsümai. 39Sauüh meshen aa kipsanau aiu-e, nung mowane; lüko sauüh jü thaiutha meshen aa mowan-e nung epshi-e.
Amai
(Mrk 9:41)
40“Sauüh asam louji apaüh ngo louji, naiuso sauüh ngo louji, apaüh ngo hongtsün louji. 41Sauüh Goa hongthon apa Goa hongphe ta nialouji, nung khaiunia nou hongthon mai nouko haoson epha-e. Naiuso sauüh asio khaiunia tsak asio khaiunia nianko louji, apaüh asio khaiunia eptsün amai nouko haoson epha-e. 42Asamüh nung ehenthsoting tsak hau apa to jü sahoiphe ta khiamsang lüko shenhanai, apaüh atüoting amai eppe ta lümonglam.”
Currently Selected:
MATHI 10: KHIABSI
Highlight
Share
Compare
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
