MATHI 8
8
Yisuüh Khaiunia tsak Lomeiji
(Mrk 1:40-45; Luk 5:12-16)
1Tilai Yisu king ainou saom, apa phiai hoi asong hoilut. 2Nungai Jee sungtsün tsak apa dongai shikü amkü ngiom, “Apaou, ni mongchio naito, ni ngü lomeikiuao shiom.”
3Yisuüh pha nou apa tü thankü ngiom, “Ngü mongchioji,” “Ni lümei-an!” Nungai jamaolu nung khaiunia Jee kia nou mei-an. 4Nai Yisuüh apa tü ngiom, “Aanglu! ni nung sauhao lachite, lüko khuküta apim mesonhai hao lühan naiuso ngüso tü ni meian-iu ta mitha thaiutha Mosaüh ngiotsün chaithio nou lükiu.”
Yisuüh Romhai Asong Tsamki tsak Lomeiji
(Luk 7:1-10)
5Naiuso tilai Yisu Kapennaum ai nap, Romhai asong khaiunia tsak apa dongai shikü kaukü amkü ngiom, 6“Apaou, jü tsamki akelakia nou thatü omhekü, tsamai saikü noin.” 7Nai Yisuüh apa tü ngiom, “Ngü shiküta, apa lomeikiu-e.”
8Lüko asong khaiunia nou thalakü ngiom, “Apaou, Ni jü tsamso khemai shinapiao ngo tsümai. Ngiokhemlu kiunai jü tsamki lomei-e. 9Tititenai jü khemai süpaihoi taiukü, ngü lüko ngo tü shekünso khemai noitsün khaiunia tsak noin. Naiuso ngü tsak tü, ‘Lükhu! ‘ta ngionai apa khuji; naiuso amaohai tsak tü, ‘Ashi!’ ta ngionai apa shiji; naiuso tsamki nou tü, ‘nung lüchhi!’ ta ngionai nung chhiji.”
10Yisuüh nung lulanai, Apa ngawan, naiuso ohoilut nouso tü ngiom, “Ngü asam tü atsüoteng ngioji, nungli amonglam akongting Israelhai ongko ngü tai lüko tsü-epsan. 11Ngü asam tü ngioji, ajepek naiuso ajenap ainou piakü shikü, Abraham, Isak naiuso Yakob ko sümai hekü aün nokai noi-e. 12Lüko sauhai nung nokshing nai hao noiküla, nungsoto anyakhem nai yakthiowane, nungko ngüso hou jei-ekü shape.” 13Naiuso Yisuüh asong khaiunia nou tü ngiom, “Lüshi, naiuso ni monglamtsünli nung athaiutha chhikiu-e.”
Nai tsamki nou nung taokolu mei-an.
Yisuüh Khaiunia piakü Lomeiji
(Mrk 1:29-34; Luk 4:38-41)
14Yisu tilai Peter tsamai shin, apaüh Peter tsammongnyiu nou nyiu kiyashi nou saitaiukü ep. 15Yisuüh nung nyiuhai nou pha nai than nai; kiyashi nou apa lean; küta apa chukü yamthengkü waoshen. 16Tilai ahsham shin, khaiuniahoi nou biya nou thaloutsün piakü niakü shin. Yisuüh nung angei onthso nouso ngio tsak ngiokü koman, naiuso akia nouso apem lomeikiu. 17Apaüh nung E-po Isaiaüh, “Apaüh sam akiasiya naiuso tsaosilao kanlowan.” Ta ngiotaiutsün shinapao chhin.
Sahoi theao Lilutsün
(Luk 9:57-62)
18Tilai Yisuüh apa lemkü hoi piakü ep, apaüh sahoi nouso tü khiam etsai khuao ngiokhem kiukü ngiom. 19Naiuso ngiokhemtsandetsün tsak shikü apa tü ngiom, “Atsandetsün,” “Ni tiai khulünou ngo aphiai hoilute.”
20Yisuüh apa tü thalan, “Chiu nouso thaiutha lungken noin, naiuso waio nouso thaiutha a-ap noin, lüko Khaiunia Thso alokü saiao athang tsünoi.”
21Naiuso sahoi ongko amaohai tsaküh apa tü ngiom, “Apaou, ngo khuküta jüpo chong akhannan taiu-i.” 22Lüko Yisuüh thalan, “Ee nousoüh ngüso chija ee hoi khananao lütaiukiu, lüko ni to Jüphiai ahoilut.”
Yisuüh Ah-ou-ahsheih Tsamkü Iula-iji
(Mrk 4:35-41; Luk 8:22-25)
23Yisu kheng tsakai nap, naiuso apa sahoiso apa phiai hoilut. 24Alekta khiamnok nai khiampek asong tsak shin, naiuso kheng nou limanau shimkü noiküla. Lüko Yisu to sailakü noi-anküla. 25Nai Apa sahoiso shikü apa jonchukü ngiom, “Sam akipsan, Apaou!” “Sam mowaneta!”
26Apaüh ngüso tü ngiom, “tiau asam hatatji?” “Oh asam intsolu monglamtsünso!” Nungai apa chuoküta ahsheih naiuso khiampek tü thut, naiuso thatü tsamkü iula.
27Nai sahoi nou ngakü ngiom, “ahsheih nou si khiampek nou tso angio angtsün nung titi in khaiunia noin-ya!”
Yisuüh Angei onthso noikü khaiunia nime Lomeiji
(Mrk 5:1-20; Luk 8:26-39)
28Tilai apa khiamnok etsai Gadara hai goumchi ai shin, nai angei onthso nou thaloutsün khaiunia nime etam ainou sungkü apako pheten. Ngüne thatü je-kü noi nou thako khaiunia sauüh nung yamai tsükhusom. 29Ngüneüh vekü ngiom, “Ni Goa Thso, sam niko ti chhi noin? Atao mosaokünai sam mowaniao ni nungai shijiso?”
30Nungai ngüne noi nou shimkü yah pin achih yamhekü noiküla. 31Naiuso angei onthsohoi nou apa tü kojakü ngiom, “Ni sam komane tü naito, sam yah nouso ongai ahongan.”
32Nai Yisuüh ngüso tü ngiom, “Lükhu,” naiuso ngüso sungküta, yah hoi nou da nap; naiuso athaplu; yah hoi chikü jin nai saokhukü khiamnok nai sathiokü limatan.
33Yah jimtsünso khulükhun naiuso nokai napküta angei onthso nou thalo nouso ta ti in thawao, nung thaiutha alum chiten. 34Nung noksong ainou khaiunia chikü Yisu ko pheteao shin; naiuso tilai ngüsoüh apa ep, ngüso elung ainou khuwanao apa tü koja.
Currently Selected:
MATHI 8: KHIABSI
Highlight
Share
Compare
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
