MATHI 7
7
Amaohai Aphio Yamtsün
(Luk 6:37-38,41-42)
1“Amao hai aphio layam, naito Goa nou asam aphio lüko tsüyame, 2tititenai ti in aphio asamüh yamsane, asam da lüko Goa nou nungti yamsane, naiuso ti tsoithat asamüh thatkiu-e, nung asamhao lüko thatkiu-e. 3Naito tiauta ni meshen niovei ainou thsünyup asong thaiutha tsüyangkü, deisinio niovei nai noitsün thsünyup nou tü luji? 4Tsüdekünai aniovei nai thsünyup asong taiuküta, ngü aniovei ainou thsünyup nou lowankiu-e ta ni adeisinio tü titi ngio-e? 5Akaosaitsünso! ni meshen niovei ainou chong thsünyup asong nou lüwan, naiuso nungai adeisinio niovei ainou thsünyup nou lowanao ni tsangsheikü eppe. 6“Ti in asio noin nung jii hao lakiu, – Ngüsoüh lapkü shikü ni tü jei-e. Yah hau asam lakkeng layakkiu–ngüso hoküh nung tü ngamkei-e.
Lüsao, Lüyam, Lühaiu
(Luk 11:9-13)
7“Lüsao, naiuso nung asam hao kiu-e; lüyam, naiuso nung asamüh eppe; lühaiu, naiuso nung asam hao sopkiu-e. 8Tititenai asangtsün pungkü hao kiu-e, naiuso sauüh yamji apaüh eppe, naiuso sauüh haiuji nung apa hao sopkiu-e. 9Asam ongko meshen thsoüh themtsai ta saonai sauüh lung nou kiu-e? 10Tsüdekünai ngou tsak saonai sauüh pao tsak kiu-e? 11Naito asam tsümei lüko asam thsoso hao paopei amei kiuao ngenaito, Aün nai noitsün Po nou apa tü saotsünso hao jengtsaiu amei nou tiauta tekkü tsükiu-e! 12“Nungtiphe khaiuniahoi nou asam hao tilüsong chhi-iao aiuji, nungti asamüh lüko ngüso tü lüchhi: tititenai Mosa Ngiokhem naiuso E-pohoi ngio nung noin.
Bekhan Atsotsan
(Luk 13:24)
13“Bekhan atsotsan nai lünap, tiautenai amowantsün nai niatsün bekhan thatü tsüomeikü, naiuso yam asong noin, naiuso nungai naptsünso piakü noin. 14Lüko aa yamai niatsün bekhan thatü tsotsan, naiuso yam nou thatü chek, naiuso nung eptsünso thsaothsaokülu.
Pai naiuso Eiu
(Luk 6:43-44)
15“Atsüotsüdekü e-po nouso khako lütsüolo; ngüso asam dongai onnemok sheitho tholokü shiji, lüko akheiai atsaoteng chiu khekkü noin. 16Ngüso chhi tsangkü asamüh ngüso ti nung nge-e. Tsaopai da sainaoshep tsü-eiuji, naiuso liutsa sangpai da latshep tsü-eiuji. 17Nungtiphe pai amei pungkü da eiu amei eiuji, lüko pai tsümeikü nai eiu tsümeikü eiuji. 18Pai amei da eiu tsümeikü eiuao tsüshio naiuso pai tsümeikü nai eiu amei tsü-eiuji. 19Sübao pai da eiu amei tsü-eiu-e nung shaplo küta in nai jah-anji. 20Nungtiphe ngüso chhi tsangkü asamüh atsüotsüdekün e-po nouso nge-e.
Ngo Asam Laitso Tsünge
(Luk 13:25-27)
21Ngo tü ‘Apaou, Apaou,’ ta jontsünso pungkü to aün nokai napao tsüde, lüko sauüh aün nai noi nou Jüpoüh aiutsünli chhi-e, ngüsolu nappe. 22Mikhem Ajekhaiu nouko piakü nou ngo tü, ‘Apaou, Apaou! samüh anianko tsüchim süne, naiuso anianko angei onthso tsükoman süne, naiuso anianko athanga chhi piakü tsüchhi süne?’ ta ngio-e!’ 23Nungai ngo ngüso tü, ‘Ngo asam laitso tsünge. Asam tsümeikü chhitsünso ngü ainou lükhuwan!’ ta ngio-e.
Tsam Nime Lahtsün
(Luk 6:47-49)
24“Nungtiphe, sauhaiüh jü ngio nungso lulaji, naiuso kankeiji apa lung chiai tsamlatsün mongthat amei khaiunia khekkü noi-e. 25Naiuso ah nou ou naiuso shelei shin, naiuso asheih nou nung tsam nou tü thoikei lüko, tsüloi, tiautenai nung lung chiai lahkü noin. 26“Sauhaiüh jü ngio nouso lulaji, lüko tsükankeiji, apa to singtso chiai tsam lahtsün mainga khekkü noi-e. 27Naiuso ah nou üon, naiuso shelei shin, naiuso ahsheih nou nung tsam tü thoikei nai loian. Naiuso nung loiantsün asapat asongting noiküla!”
Yisu ün Oukong
28Tilai Yisuüh nung chitekhem, hoi nou apaüh tsandetsün tü ngawan. 29Tititenai apaüh ngiokhemtsandetsünsoli tsüde lüko oukong noikü ngüso hau tsande.
Currently Selected:
MATHI 7: KHIABSI
Highlight
Share
Compare
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
