MATHI 14
14
Alimkiutsün Yohan Eantsün
(Mrk 6:14-29; Luk 9:7-9)
1Nung taoko Galil nai noitsün nokpao Herodüh Yisu thaiutha lula. 2Apaüh apa asonghoi tü ngiom, “Nung Alimkiutsün Yohan, apa e ainou ahkü shikü noin. Nungshioko apaüh athanga chhi nouso chhiao shioji.”
3Tititenai Herodüh Yohan thaloukü kekü akhou tsamai wanau ngiokhem kiu. Apaüh nung apa nio Philip tsammongnyiu Herodia thaiuthako chhin. 4Tiautenai Yohanüh apa tü nungti ngiom, “Ni Herodia jonao ayam tsünoi!” 5Nai Herodüh apa loatao aiu, lüko Yihudahai lon hat, tiautenai ngüsoüh Yohan nung E-po tsak ta vesankü noiküla.
6Lüko tilai Herod chettsün ajekhaiu saujikan, Herodia thso menyiuthso nou hoi khako jih hangten, nungko Herod thatü monglingatkü 7“ni ti sao-e nung ngü ni hao kiu-e ta ngiomongshingkü apa tü thalo!”
8Apa nyiu alotsüo tsangkü menyiuthso nou ngiom, “Loteng ngü hao Alimkiutsün Yohan khaiu chio tsak ko akiu!”
9Nungai nokpao mongkia, lüko akamshihoi khako apaüh thalowanphe menyiuthso nou saotsünli kiuao ngiokhem kiu. 10Nungtiphe apaüh hongküta akhou tsamai noitsün Yohan khaiu taplo. 11Nung Khaiu nou chio tsak ko kankü shikü menyiuthso hao kiu, naiuso apaüh nung apa nyiu dongai kankü khu. 12Yohan sahoiso shikü apa mia nou kankü khuküta khan; naiuso ngüsoüh khukü nung ngiongem Yisu hao chiten.
Heng Pungo Heshiu-iji
(Mrk 6:30-44; Luk 9:10-17; Yhn 6:1-14)
13Tilai Yisuüh Yohan thaiutha ngiongem nou lu, nungai apa kheng tsak ko naplokü aodangkü noitsün athang tsakai pemsa khuwan. Khaiuniahoi nou nung luloküta noksong nouso wankü apa tü hok ko thaiukü khu. 14Yisu nung kheng ainou sungnai khaiuniahoi piakü ep, naiuso apaüh ngüso thaiutha mongkiakü yangkiukü akiahoi lomeikiu.
15Ahsham taoko sahoi nou apa dongai shikü ngiom, “Aje nou saowaniu naiuso nung aodangkün athang noin. Khaiuniahoi nouso nokai napkü ngüso eheshiu tuhloau lüwonan-i.”
16Lüko Yisuüh thashin, “Ngüso khuaoto tsünoi, asamüh ngüso hao eheshiu lükiu!”
17Naiuso ngüsoüh thalan, “Samüh nungai themtsai pungo naiuso ngou nou nimelu taim,”
18Nai Yisuüh ngiom, “Nungso jü dongai kankü ashi.” 19Apaüh khaiuniahoi nou khengliu chiai moknoi-i, küta themtsai pungo naiuso ngou nime nou semkü, aün nai thapsankü Goa hau nianlom kiu. Apaüh themtsai nou lopekkü sahoi hao kiu, naiuso sahoi nou khaiuniahoi hao sonkiu. 20Khaiunia pungkü nou mongtsamkü hekütün phiai sahoi nousoüh apoi anelangthso, nou kim chekü nime miankü lokamshin. 21Nung hetsünso nyiuhai si methsohai tsüvehakü, pohailu nai heng pungo noiküla.
Yisu Khiam Chiai Tsakeiji
(Mrk 6:45-52; Yhn 6:15-21)
22Nungai Yisuüh sahoi nouso khengnai naplo-ikü apa khako khiamnok etsai hongan, naiuso hoi nouso wonan-in. 23Apaüh khaiuniahoi nou wonan-iküta king nai misao ao pemsa sung. Ahsham saujikan nai, apa pemsa nungai noiküla. 24Nung taoko to kheng nou khiamnok awem nai khiampek nou haiuhaiukeikü noiküla, tititenai ahsheih nou kha ainou shin.
25Waio ko taonai Yisu apa sahoi dongai khiamnok chinai keikü shin. 26Tilai sahoi nousoüh apa khiam chinai tsakeitsün ep, ngüso hatkü, “Nung eanhai onthso!” ta sang asong nou vekü ngiom. 27Nungailu Yisuüh ngüsoko chitekü ngiom, “Mong songkü lüthe! Nung Ngo kha; Lahat!”
28Nai Peterüh ngiom, “Apaou, nung atsüoting ni naito, ngü adongai khiam chiai shiao angio.”
29Yisuüh thalan, “Ashi!” Nungtiphe Peter kheng ainou shikü, Yisu dongai khuao khiam chiai tsakeikü shin. 30Lüko Peterüh asheih nou sheitsün epnai hatkü, apa khiam kheiai napao yachu, nai vekü ngiom, “Apaou, ngü akipsan!”
31Nungailu Yisuüh apa phaüh Peter thaloküta ngiom, “Oh intsülu monglamtsün khaiunia! tiauta ni henyinyiji?”
32Ngüne kheng ai sungnai, asheih nou laowan. 33Nungai Kheng nai noitsün sahoi nousoüh apa tü amkü, ngiom, “Atsüoting ni Goa Thso nou noin!”
Genesaret ai Akia Lomeiji
(Mrk 6:53-56)
34Ngüso khiamnok yankü khukü, Genesaret goumchi ai shin. 35Nungai ngüsoüh apa ngelo, nungtiphe ngüsoüh nung shingkhannio lemkü ainou akia khaiunia chikü apa dongai niajikan. 36Ngüsoüh nepeng nailu lüko athantan-i ta apa tü koja; naiuso tititso nou thantan ngüso lomeikiu.
Currently Selected:
MATHI 14: KHIABSI
Highlight
Copy
Compare
Share
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
