MATHI 15
15
Paosipo ün Atsandetsün
(Mrk 7:1-13)
1Nungai Farisihoi naiuso Ngiokhem tsandetsünso Yirusalem ainou shikü Yisu tü sang, 2“Asahoisoüh tiauta sam paosiposoüh tsandetaiutsün yanji? Tititenai ngüsoüh chih he khako pha nou ayam nai meikü tsütsaoji!”
3Yisuüh thalakü ngiom, “Tiauta asamüh asam mongthat thekü Goa ngiokhem nouso yanji? 4Tititenai Goa nou ngiom, ‘Apo naiuso anyiu asu lühat,’ naiuso ‘sauüh posinyiu tü athesan kiuji, apa to ealu.’ 5Lüko asamüh ngioji, ahachu nou ti asamüh ngü ainou epao noila ‘nung Goa ün thaiu noin,’ ta khaiunia tsaküh meshen posinyiu tü ngionai, apaüh meshen po lon hatao ti tsünoi. 6Nungti asamüh asam mongthat theao Goa ngiokhem tsüvesanji. 7Asam akaosai nouso! Isaiaüh asam thaiutha ngiotaiutsün thakü noin!
8‘Nung khaiuniahoi nou
son noulu ngü asuhatji
ta Goa nou ngioji,
lüko ngüso mongpem ngü ainou laiukü pungekü noin.
9Tiautenai ngüsoüh jü ngiokhem liko khaiunia ngiokhemso tsandephe,
ngüsoüh ngü tü amtsün alesan tsünoi!’”
Khaiunia Longeitsün Chhi nouso
(Mrk 7:14-23)
10Naiuso Yisuüh hoi nou apa dongai jonshikü ngiom, “Lüanglu naiuso lüngelo! 11Son nai ti napji nungüh khaiunia tsülongeiji; lüko son ainou ti sungji, nungüh bao khaiunia longeiji.”
12Nungai sahoi nouso shikü apa tü ngiom, “Nung ngio lunai Farisihoi mongmat ta ni tsünge süne?”
13Yisuüh thalakü ngiom, “Ti paisam aosam aün nai noi nou Jü Poüh tsüthom nung apem shekanne.” 14“Ngüso thaiutha layangelat! Ngüso niopek niakeitsün niopek nouso, naiuso niopek nou niopek niakei naito, ngüne nemtso khannai sathio-e.”
15Peterüh thalakü apa tü ngiom, “Nung ngio athat nou sam hao sasakü angiokiu.”
16Yisuüh ngüso tü ngiom, “Asam angelatsün ngüso tü ti mothikü tsünoi. Asamüh lüko loüh mongelaso? 17Son nai ti napji, nung thai nai napkü awantsün nai khuwanji. 18Lüko ti son ainou sungji, nungto mongpem ainou sungji, naiuso nungüh khaiunia longeiji. 19Tititenai mongpem ainou mongyang tsümeikün khaiunia luattao, ajisiwop naiuso amao tsütsamtsütsüo chhi nouso; abülom, kau, atsüotsüdekü chitetsün naiuso amaohai lochilotsaotsün chhi nouso sungji. 20Nungsoüh khaiunia longeiji, lüko pha tsütsaokü heshiu nouto khaiunia tsülongeiji.”
Nyiuhai tsak Amonglam
(Mrk 7:24-30)
21Yisu nung athang ainou Tair naiuso Sidon noknio shimkü noitsün goumchi ai khun. 22Kanan nyiuhai tsak nung khiamkhan ai kihtsün apa dongai shikü vekü ngiom, “David thso!” “Ngü tü atsüojin! Jü thso menyiuthso nou angei onthso nou thalokü thatü omhekü noin.”
23Lüko Yisuüh apa tü ngio tsaktso tsüthala. Nai apa sahoi shikü apa tü kojakü ngiom, “apa lühongan! Tititenai apaüh vetsün nou sam tsonjekji!”
24Nai Yisuüh thalakü ngiom, “Israel khaiunia amowantsün onnemok hoi dongailu ngü hong.”
25Lüko nyiuhai nou shikü apa tü amkü ngiom, “Apaou, ngü tü ahachu!”
26Nai Yisuüh thalakü ngiom, “Methsohai eheshiu kankü shiküta Jii hao yakwaoau ayam tsüde.”
27Nyiuhai nou ngiom, “Ah, Apaou,” “Jii nou lüko meshen tsampao thaisam pou ainou sa-itsün chih-poi nouto heji.”
28Nungai Yisuüh apa tü thalakü ngiom, “Oh nyiuhai, ni amonglam thatü song! Ni mongchiotsünli ni hao chhikiu-e.” Naiuso apa thso nung taoko yakü meila-an.
Yisuüh Khaiunia piakü Lomeiji
29Yisu nung ainou pungekü, Galil khiamnok nai kheng nouko khuküta apa king nai sungkü moknoi. 30Naiuso chiune, niopek, leijeb, phasihok tsümeikünso naiuso akia maohoi piakü apa dongai niakü shikü taiukiu. 31Apaüh ngüso lomeikiu, nungtiphe aiu khaiunia nou chitetsün, naiuso niopek nou eptsün, alothean lomeitsün, naiuso chiune hai tsakeitsün epkü hoi nou ngawan, naiuso ngüsoüh Israel Goa nian lomsan.
Khaiunia Heng püle hao Heshiu-iji
(Mrk 8:1-10)
32Yisuüh sahoi apa dongai jonkü ngiom, “Ngo hoi nou thaiutha mongkiakü yangji, tiautenai ngüso samyi chikü ngoko noikü shin naiuso lo eheao ti tsütaiu, ngü ngüso keithonkü hongao tsüaiu, tsüngean ngüso yamai keithonkü loi-ane.”
33Sahoi nou apa tü sang, “Hoi nung chantso thatukao nungtin singtso goh nai samüh themtsai tiai eppe?”
34Yisuüh ngüso tü sang, “Asam phako themtsai titso taim?”
Ngüsoüh thalan, “Themtsai chinyat naiuso ngou anelang intso noin.”
35Nungtiphe Yisuüh hoi gohai moknoi ao ngiom, 36küta apaüh themtsai chinyat nouso si ngou nou semlokü oukkiukü lopek naiuso sahoi hao kiuküta sahoi nou khaiuniahoi hau sunkiu. 37Ngüsoüh mongtsam thasangkü hekütün phiai apoi anelangtso nou kim chinyat miankü khaikamshin.
38Nung hetsünso nyiuhai si methsohai tsüvethiohakü pohailu heng püle noiküla.
39Nai Yisuüh hoi nouso hongan küta kheng nai sungkü, Magadan elungai khuwan.
Currently Selected:
MATHI 15: KHIABSI
Highlight
Copy
Compare
Share
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
