MATHI 13
13
Lelu Shiutsün Athatlu Ngio
(Mrk 4:1-9; Luk 8:4-8)
1Nung ajekhaiukolu Yisuüh tsam ainou shiküta khiamjet nai khukü moknoi küta tsandeao tsalo. 2Nai apa dongai khaiunia piakü kamshiphe apa kheng tsak ko napkü moknoi, naiuso hoi nouso khiamjet haiukuk nai tsa. 3Nai apaüh ngüso tü athatlu loukü ngio piakü chiten,
“Atao tsak ko khaiunia tsak lelu shiupengao khu. 4Apaüh shiuthionai lelu ajantso yamkuk nai sathio, naiuso nung waiothso nouso shikü hean. 5Lelu ajantso goh meikü tsünoikün lungkap nai sathio. Nungailu lelu nou samsan, goh nou aokü tsünoiphe, 6nung lelu nouso ta tilai aje nou jelut, ü-iu nou molaiuphe shakta wonan. 7Lelu ajantso sang ongnai sathio, naiuso sang nou sungküta ngüso thongat. 8Lüko lelu ajantso goh mei nai sathiokü nungko ajantso da tsom ngoikü, ajantso da aoluok ngoikü, naiuso ajantso da aosam ngoikü eiu piakü eiukü yamsan.” 9Nai Yisuüh, “Sau noukhan pokü noin apaüh lüang!” ta ngiokü thunlo.
Athatlu ngio thaiutha Alat
(Mrk 4:10-12; Luk 8:9-10)
10Sahoi nou shikü Yisu tü ngiom, “Ni tiauta ngüso ko athatlu ngio chiteji?” 11Nai Yisuüh thalakü ngiom, “Aün nokshing akaongio ngeao asam hao kiukü taim, lüko ngüso hao nung tsükiu. 12Tititenai sauüh taim, apahao loüh kiu-e, naiuso apaüh saiukü taiu-e; lüko sau tsütaiu apaüh ti taim nung lüko apa ainou kanlükhune. 13Ngü ngüso ko athatlu ngio nou chitetsün to ngüsoüh thap lüko tsüepji, naiuso ang lüko tsüngela. 14Nungtiphe E-po Isaiaüh ngiotsün nung ngüso da shinapji:
‘Asamüh alu to lu-e,
lüko tilaitso tsüngela-e;
naiuso asamüh athap to thape, lüko tilaitso tsüeppe;
15Tititenai ngüso mongyang tsüthsümon,
naiuso ngüso noukhan alu-ao tsütsüokü iula-iu,
naiuso ngüso niovei maiushi aniu.
Nungti tsüdetünto ngüso nioveiüh epela,
naiuso noukhanüh lula-ela,
naiuso ngüso mongpemüh ngela-e,
naiuso ngüso jü dongai phoklekü,
ngü ngüso lomeikiu-ela ta Goa nou ngioji.’
16“Lüko asam to aküo titi amei! Tiautenai asam nioveiüh to epji, naiuso asam noukhanüh to luji. 17Tititenai ngü asam tü atsüoting ngioji, asamüh eptsün E-po nouso piaküüh naiuso asio khaiuniahoi nou epao aiu lüko tsüep, naiuso asamüh lutsün luao aiu lüko tsülu.
Yisuüh Lelu Shiutsün Athatlu Ngio Cheteji
(Mrk 4:13-20; Luk 8:11-15)
18“Naito, lelu shiutsün athatlu ngio nou tü asamüh lü-ang naiuso angelo. 19Tilai khaiunia nou aün nokshing thaiutha ngiongem nou luji, lüko tsüngela nung lelu yamkuk nai sathiotsün noin. Biya nou shikü, apa mongai ti lelu shiuthio taim nung aplokü kanlükhunji. 20Naiuso sauüh ngio nou luküthun amongling nou loutsün, nung lungkab nai sathiotsün athat noin. 21Lüko apa da eiu tsüsaophe, jamaotsolu noiji, naiuso tilai nung ngiongem thaiutha angja ajeiat shi-e, nungailu ngüso laowanji. 22Ngio nou luküta goumchi thaiutha mongyang naiuso memei jengtsaiu tü chinek nou ngio nung thongatji, naiuso ngüso tü eiu nou tsü-eiu, nung tsao ongko sathiotsün lelu athat noin. 23Naiuso sauüh ngio nou lukü nung ngelaji, küta eiu eiukü ajantso da tsom ngoikü, ajantso da aoluok ngoikü, naiuso ajantso da aosam ngoikü eiusanji, nung goh amei nai lethiotsün lelu athat noin.”
Chih-ai Athatlu Ngio
24Yisuüh ngüso tü loüh athatlu ngio tsak ngiom: “Aün nokshing nou khaiunia tsaküh meshen eiu-ai lelu amei shiutsün khekkü noin. 25Sotsüo khaiuniahoi saila-ankü noinai eh nou shikü tsonyak ongko chih-ai nou shiu taiukü khuwan. 26Tilai tsonyak samsan, naiuso eiu nou eiu, nungai chih-ai nou lüko samsanha. 27Nungai tsamkihoi nou eiupao dongai shikü ngiom, ‘Asong khaiunia, ni a-eiu-ai lelu amei shiuthio, naito chih-ai nung ti ainou shin?’ 28Apaüh thashin, ‘eh ajantsoüh nung chhikü noin.’ Nai apa tsamkisoüh apa tü ngioji, ‘naito samüh khuküta chih-ai nou ashekan tümo?’ 29Lüko apaüh ngiom, ‘Nyah,’ tiautenai tsüngean asamüh chih-ai nou seksan nai, nungko hakü tsonyak lüko seksanha-eno. 30Be-eiuyam mosaokün lektso ngüne aikü lünyan-i. Be-eiuyam taoko aya nai chih-ai nou lüshekan, naiuso nung keshi taiuküta lüjawan, lüko tsonyak nou to jü bei ai lükamtaiu, ta ngü be-eiuyamtsünso tü ngio-e.’”
Kianjim Ou Athatlu Ngio
(Mrk 4:30-32; Luk 13:18-19)
31Yisuüh loüh athatlu ngio tsak ngüso hau chiten: “Aün nokshing nou kianjim ou tsak khekkü noin: khaiunia tsaküh kianjim ou louküta apa eiu ai shiutaiuji. 32Nung lelu ongko ehenting tsak, lüko nung songnai, paisam ongko asongteng naiuso pai ao iulaji, nung da waio nouso shikü akia nai a-ap shanloji.”
Phoplao Athatlu Ngio
(Luk 13:20-21)
33Yisuüh loüh athatlu ngio tsak ngüso hao chiten: “Aün nokshing nou phoplao khekkü noin. Nyiuhai tsaküh phoplao nou louküta wonne nou piakü hakü lao-eji naiuso themtsai nou mopeksankün lektso laolutkü noiji.”
Yisuüh Athatlu Ngio Kankeiji
(Mrk 4:33-34)
34Yisuüh nung apem khaiuniahoi nouko athatlu ngio nou chiten. Apaüh ngüso ko athatlu ngio tsühakü titso tsüchite. 35Apaüh nung E-po nou ngiotaiutsün shinapao thaiutha chhin,
“Ngo ngüso ko chitenai
athatlu kankei-e;
apung anyim naita tsüngekü
nou ngo ngüso hao chite-e.”
Yisuüh Chih-ai Athatlu ngio Sasakiuji
36Tilai Yisu hoi nou wanküta tsamai nap, apa sahoiso shikü apa tü ngiom, “Eiu-ai chih-ai thaiutha athatlu ngio sam hao tsangsheikü achite.”
37Yisuüh thalakü ngiom, “Lelu amei shiutsün nung Khaiunia Thso noin; 38Eiu nung goumchi nou noin; lelu amei nouso Goa nokshing ai hao nou thso nouso noin; naiuso chih-ai nou Tsümeikün Tsak nou thsoso noin. 39Chih-ai shiutsün eh nung Biya nou noin. Be-eiuyam nou goumchi athon noin, naiuso be-eiuyamtsünso aünhonghoi nouso noin. 40Titi chih-ai nouso kamshiküta in nai jah-anji, nungti goumchi athon nai thawao-e. 41Khaiunia Thso nou apa aün honghoi nouso hongkü apa nokshing khemko angei chhi-itsünso naiuso tsümeikü kankeitsünso chikü nialokü shi-e, 42naiuso ngüso inheeng nai thio-e; nungai ngüso hou jei-ekü shapkü noi-e. 43Nungai asiohoi nouso meshen Po nokshing nai aje khekkü awone. Sauhai noukhan pokü noin asamüh lü-ang!
Atsangtaiutsün Jengtsaiu Athatlu Ngio
44“Aün nokshing nou eiu ai tangka tsangtaiutsün khekkü noin: Khaiunia tsaküh gohkhei ai tsangtaiutsün jengtsaiu eploji. Apaüh nung tsangpoktaiuküta amongling nou khukü apaüh taiutsün alum jan, küta laokü khukü nung eiu nou tuhloji.
Lakkeng Athatlu Ngio
45“Aün nokshing loüh lakkeng amei tü yamtsün chaile khaiunia khekkü noin: 46apaüh piakü mai lakkeng tsak epküta khukü apaüh taiutsün alum jan, küta nung lakkeng nou tuhloji.”
Nyao Athatlu Ngio
47“Aün nokshing loüh nung khekkü noin. Khiamnok nai ngouphek khaiunia nou nyao sokküta ngou in amomo thaloji. 48Tilai ngou nou nyao mianji, ngüsoüh haiuchiai tenshikü nung janthatji: amei nou lak nai lethioji, lüko tsümeikü nou leanji. 49Goumchi athon nai nungti noi-e: Aün honghoi nouso khuküta asiohoi ainou tsümeikün hoi jansane, 50küta ngüso inheeng nai yakthio-e, nungai ashap nou hou jei-ekü noi-e.
Ngiotsüo Ayan naiuso Akeng
51“Yisuüh ngüso tü, asamüh nungso ngelajimo?” ta sang.
Ngüsoüh apa tü “Ngelaji,” ta thashin.
52Apaüh ngüso tü ngiom, “nungtiphe, ngiokhemtsandetsünso pungkü aün nokshing sahoi iulatsün to jengtsaiu taiutsün ainou ayan si akeng losantsün tsampao tsak khekkü noin.”
Yisu Nazaret ai Tsülou
(Mrk 6:1-6; Luk 4:16-30)
53Tilai Yisuüh nung athatlu ngio chitekhem apa nung athang ainou punge.
54Naiuso apa noksongai shikü apaüh ngüso tü Yihuda kamthang nai tsande, naiuso apaüh chimtsün tü angtsünso ngakü ngiom, “Nung mongthat mongsai apaüh ti ainou ep?” “Naiuso apa athanga chhi thaiutha titi? ta ngüsoüh sang. 55Mistri thso nou nung apa tsüdeso? Apa nyiu nian Mari naiuso apa nioso Yakob, Yosep, Simon, naiuso Yihudaso tsüdeso? 56Apa nio menyiuthso nouso nungko tsükih süne? Naito apaüh nung apem ti ainou ep?” 57Nungtiphe ngüsoüh apa da tsümonglam.
Nai Yisuüh ngüso tü ngiom, “E-po tsak hau meshen nok haiüh naiuso meshen tsammongsoühlu asuhat tsükiuji, lüko amao aito asuhat kiuji.” 58Tiautenai ngüsoüh apa da tsümonglamphe, Yisuüh nungko athanga chhi piakü tsüchhi.
Currently Selected:
MATHI 13: KHIABSI
Highlight
Copy
Compare
Share
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
