LUK 7
7
Yisuüh Romhai Asong Tsamki tsak Lomeikiuji
(Mat 8:5-13)
1Tilai Yisuüh khaiuniahoi hao ngio apem chitekhem, apa Capernaumai nap. 2Nungai thatü tsüojinkü noitsün Romhai asong tsamki tsak eaoli kiakü noiküla. 3Tilai apaüh Yisu thaiutha lula, Yihuda petchehoi apa dongai hongkü apa tsamki kipsanao ashi ta koja. 4Ngüso Yisu dongai shikü kojakü ngiom, “Apa thaiutha nung chhi nou ni chhiao tin, 5tititenai apaüh sam khaiunia tsüojinji, naiuso apaühlu sam Yihuda kamthang shan.”
6Yisu ngüso ko apa tsam ainou laiukü mokhukünai, tsom khako Apaou nou hai nouso hongkü ngiom, “Apaou, achija la-angja, tititenai ni jü tsamso khemai napao ngo tsütin; 7tsüdekünai loüh adongai shiao ngo jü chija tsütin ta yangji. Lüko ngio tsaklu lüngio, nungai jü tsamki meila-e. 8Tititenai jü khemai ngü lüko süpaihoi taiuji naiuso ngo lüko ngiokhem khemai noitsün khaiunia tsak noin; naiuso ngü tsak tü, ‘Lükhu!’ ta ngionai apa khuji; naiuso amaohai tsak tü, ‘Ashi!’ ta ngionai apa shiji; naiuso tsamki nou tü, ‘nung lüchhi!’ ta ngionai apaüh nung chhiji.”
9Yisuüh nung ngio lulanai ngawan, naiuso lapkü shikü apa phiai hoiluttsünso tü ngiom, Ngo asam tü ngio-e, “Nungli amonglam asong noitsün Israel ongko ngo tiai tsüepka!”
10Nai ahongtsünso tsamai shikü, ngüsoüh tsamki nou meilakü ep.
Yisuüh Jihi Thso Ahkü Shi-iji
11Nung ainou thunkü Yisu Nain noksong ai apa sahoi naiuso hoi asong tsak hakü nap. 12Tilai apa nok bekhan shimkü shin, nungko jihi thso oum tsaklu nou e mia kankü shin. 13Tilai Apaou nou jihi nou ep, apaüh tsüojinkü yangkü apa tü ngiom, “Lashapsai.” 14Nai apaüh shimkü shiküta miatsan da thantan, naiuso miapi-antsünso tsülemlemkü tsa. Naiuso apaüh ngiom, “Oum! ngo ni tü ngioji, Achu!” 15Nai e nou chukü moknoi küta ngio singiojikan. Naiuso Yisuüh nung oum nou apa nyiu hao laokü kiu.
16Ngüso chikü ahat nou mian naiuso Goa nian lomsankü ngiom, “Sam ongko Goa E-po asong sungkü noin!” naiuso “Goa nou meshenhoi tü sailu-iu!”
17Yisu thaiutha nung ngiongem nou Yihuda goumchi naiuso lemkü noitsün shingkhannio apemai pengkü khu.
Alimkiutsün Yohan ainou Hongthon
(Mat 11:2-19)
18Tilai Yohan sahoiüh apa tü nung thaiutha apem ngiom. 19Yohanüh apa dongai sahoi nime jonshikü, “Ashiao noitsün tsak ta Yohanüh ngiotsün ni süne, amao tsak ta taiushi-e?” ta sangau ngüne Apaou dongai hong.
20Tilai sahoi nime nou Yisu dongai shikü ngiom, “Alimkiutsün Yohan nou, Ashiao noitsün tsak nou ni süne, tsüdekünai samüh amao tsak ta taiu-e?” ta ni tü sangau sam hong.
21Nung taoko apaüh akia naiuso angei onthso nou angja-itsün piakü lomeikiu, naiuso niopek piakü hao epi. 22Apaüh ngüso tü thalakü ngiom, “Lükhu naiuso asamüh ti ep naiuso lula nung Yohan tü lüngio: Niopek hoi nou epji, hokngek hoi tsakeiji, je suntsünso lomeikiuji, naiuso noukek nou luji, e nouso ahkü shi-iji, tsosiluhoi nouso tü ngem amei chimji. 23Sauüh ngo tü athekatao ti tsüeppe, apa thaiumei!”
24Tilai Yohan hongthonhoi nouso tsalokü khu, apaüh hoi nou tü Yohan thaiutha chiteao yachu, “Asam singtso goh nai Yohan dongai khunai ti epau yangküla?” Asheih nou ketkeitsün paithsam sotsom süne? 25Lüko asam ti ta thapao khun? Ne amei tholutsün khaiunia tsak ta thapao süne? Alengmei nese tholutsün naiuso tsüomeikü kihtsünso to nokpao tsamai noin! 26Lüko asamüh ti ta thapao khun? Goa E-po tsak süne? Ah, ngü asam tü ngio-e, Goa E-po tü simkü. 27Satkü taiutsün nung apa thaiutha noin, ‘jü hongthon ayam khemluao, ngo Apa akhako hongji.’ 28Ngü asam tü ngioji, “Nyiuhaiüh chettsün ongko Yohan tü songkü tsünoi. Nungti lüko sau Goa nokshing nai ehenting noin apa, apa tü songthso.”
29Nungai apemüh apa ngio ang: Ngüso naiuso tekkü liukim shitsünsoüh Goa athoilut ngio nouso angio ang naiuso Yohanüh limkiukü noiküla. 30Lüko Farisihoi naiuso ngiokhem tsandetsünsoüh ngüso chija Goa nou chimtsün tsüangkü Yohanüh limkiutsün tsülou.
31“Naito ngo nung vetao tiko thalu-e, naiuso ngüso tisübao khekkü? 32Methso sauhai chaikam nai moknoikü, ngüso haiso jonkamkü ngioji, ‘Samüh asam tü poipoi mat, lüko asamüh tsühang! Samüh miashap shap, lüko asamüh tsüshap; ngüso nung methsohoi khek! 33Tititenai Alimkiutsün Yohan themtsai hekü tsüdekünai theng shiukü tsüshi, naiuso asamüh ngioji, ‘Apa da angei onthso noin!’ 34Khaiunia Thso hekü shiukü shin, naiuso asamüh ngioji, ‘Nung khaiunia tü athaplu! nungto ehethaikhan, naiuso thengshiu, liukim shitsün naiuso angeihoi nouso haimei!’ 35Goa mongthat nouto sauhaiüh nung luji, ngüsoüh atsüoting hanji.”
Yisu Farisihai nou Simon Tsamai
36Farisihai tsaküh Yisu tü apako heshiuao sang. Naiuso Apa nung Farisihai nou tsamai sungkü heshiuao moknoi. 37Nung noknai noitsün nyiuhai tsak angei kihnai noiküla, naiuso tilai apaüh Yisu Farisihai nou tsamai chihetsün nai noin ta ngen, apaüh anganyam khaiutsom meng tsak ko kankü shin. 38Naiuso apa Yisu hok dongko shapkü tsa, naiuso apa niochekhiam nou Yisu hok lupaiao yachu, naiuso apa khaiuou nou Yisu hok beiyankiu, naiuso Yisu hokai chepkü apaüh khaiutsom nou tsomkiu. 39Tilai Yisu thaisam jontsün Farisi nou nung ep, apaüh yang, “Nung Khaiunia E-po tsak naito, apa da thantantsün nung sau, naiuso apa titi in khaiunia, naiuso apa angei nyiuhai tsak ta, apaüh ngekülela!”
40Yisuüh thalakü apa tü ngiom, “Simon, ngo ni tü tso tsak ngio-e.” Apaüh thalan, “Atsandetsün, achite.”
41“Khaiunia tsak tü tangka laiutsün khaiunia nime noiküla.” “Tsaküh tangka tsom pungo naiuso amao nou tangka aopungo laiulo. 42Tilai ngüneüh athamshiao ti tsütaiu, apaüh ngüne nemthso hau chailaiu wankiu. Nungai ngüne ongko sauüh apa tü tekkü tsüojine?”
43Simonüh thalakü ngiom, “Sau tü apaüh apia wankiu nungüh apa tü tekkü tsüojine ta ngü yangji.” Yisuüh apa tü ngiom, “Ni yangtsün nung atsüo.” 44Nai apaüh nyiuhai dongai lapkü Simon tü ngiom, “Nung nyiuhai ni epjimo? Ngo atsamai sung lüko, hok tsaowanao ni ngü hao khiam tsükiu. Lüko apaüh apa niochekhiam nou jü hok lupaikü apa khaiuou nou beiyankiu. 45Ni ngo da son nai tsüchep, lüko apa to ngo shinai yanou jü hok nai cheptsün tsülao. 46Ni jü khaiu nai khaiutsom nou tsütsomkiu, lüko apaüh to jü hok nai khaiutsom nou tsomkiu. 47Nungtiphe ngo ni tü ngio-e, apa angei piakü noilüko wankiuji, tititenai apaüh thatü tsüojin, lüko sau tü angei intsolu wankiuji nungüh intsolu tsüojinji.”
48Nai apaüh nyiuhai tü ngiom, “Ni ün angei wankiuji.”
49Apako chihetsün nai moknoitsünsoüh yangao yachu, “Angei lüko wankiuau nung sau?”
50Lüko apaüh nyiuhai nou tü ngiom, “Amonglam tsangkü ni kipsaniu, aalu nai lükhu.”
Currently Selected:
LUK 7: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.