LUK 8
8
Yisu Hachutsün Nyiuhai
1Atao intso noiküta Yisu Goa nokshing thaiutha Ngem Amei chimkü noksong naiuso nok nouso ai khukü tsakei. 2Nyiuhai ajantso sauhai ainou angei onthso komankiu naiuso akia nou lomei kiu: (Magdalin ta jontsün Mari) sau ainou angei onthso chinyat koman kiu. 3Herod tsamki asongting Chuza tsammongnyiu nian nou Yoana, naiuso Susana, naiuso amao piakü apako noiha, naiuso ngüsoüh jengtsaiu tsangkü ngüso tü hachu.
Lelu Shiupengtsün Athatlu Ngio
(Mat 13:1-9; Mrk 4:1-9)
4Tilai hoi asong tsak aikü kamshin nungai noksong pungkü ainou ngüso apa dongai shinai, apaüh athatlu ngio chete:
5“Lelu shiutsün tsak apa lelu shiuao khu; naiuso apaüh shiu nai, lelu ajantso yamkuk nai tha, naiuso nung hok nou ngamkei, naiuso waiohoi nou hean. 6Lelu ajantso lungkap nai tha, naiuso goh saiukü tsünoiphe, nung samsan lüko thunkü wonan. 7Lelu ajantso sang ongko tha, naiuso sang nou nung thongat. 8Lelu ajantso goh amei nai tha, naiuso nung songkü tsom pungkü eiu eiu.”
Naiuso ngio nung thonkü Yisuüh ngiom, “Sau noukhan pokü noin apaüh lüang!”
Athatlu Ngio Thaiutha
(Mat 13:10-17; Mrk 4:10-12)
9Apa sahoi nou athatlu ngio alat nou ti in ta apa tü sang. 10Nai apaüh thalan, “Goa nokshing akaongio asam hao kiutaim, lüko amaohai hao to athatlu nai kiuji, tititenai ngüsoüh athap to thappe lüko tsüeppe, naiuso ang to ange lüko tsüngela-e.
Yisuüh Athatlu Ngio Thaiutha Tsangsheikü Chiteji
(Mat 13:18-23; Mrk 4:13-20)
11“Lo athatlu ngio alat nung noin: Lelu nou Goa ngio. 12Lelu sübao yamkuk nai tha, nung athatluao, ngüso mongpem ai biya nou shikü Goa ngio tsümonglam-iao naiuso tsükipsan-iao kaulükhunji. 13Lelu sübao lungkap nai tha, nung ngüsoüh tilai lulaji amongling nou ngio nou louji, naiuso eiu tsünoiphe atao letletkülu noiji, küta alilu taoko salianji. 14Lelu sübao sang ongko tha, nung ngüsoüh ngio nou lula, naiuso ngüso yamai khunai, mongyang pia nou naiuso jengtsaiu naiuso nung aa amongling nou thongat, naiuso eiu saiukü tsü-eiuji. 15Lelu sübao goh amei nai tha, nung ngüso mongpem amei naiuso ngiotsüo nai ngüsoüh ngio nou lulakü nung mongkü thalou, naiuso athaplu nung da eiu eiuji.
Kim Khemai Tson
(Mrk 4:21-25)
16“Khaiunia sauüh tson sonlutküta kim nou tsükapokji, tsüdekünai then khemai tsütaiuji, lüko tsamai shitsünsoüh awon epao thaiutha tson taiutsün nai taiuji.
17“Tititenai achiai tsüsungkü hao titso tsangkü tsünoi; tsüdekünai tsüngelakü hao naiuso awon nai tsüshikü hao titso tsangkü tsünoi.
18“Nungtiphe asamüh titi angji mong nou lükiu, tititenai sauhaiüh taim, apa hao kiu-e, naiuso sauhaiüh tsütaiu, apaüh ti taim ta yangji nung lüko apa ainou kanlükhunane.”
Yisu Nyiu naiuso Nioso
(Mat 12:46-50; Mrk 3:31-35)
19Yisu nyiu si nioso apa dongai shin, naiuso khaiuniahoi pia nou ngüso shimkü shiao tsüshio. 20Apa tü nung ngiom, “Anyiu si aniosoüh kengchiai tsakü ni ko pheteao yamji.” 21Lüko apaüh thalakü ngüso apem tü ngiom, “Sau haiüh Goa ngio lulakü kankeiji, ngüso jü nyiu naiuso jü nioso.”
Yisuüh Ah-ou-ahsheih Lotsamji
(Mat 8:23-27; Mrk 4:35-41)
22Nyitso Yisu naiuso apa sahoiso kheng tsak ai napnai apaüh ngüso tü ngiom, “Samüh she nou thsatkü etsai khuko,” naiuso ngüso tsaloukü khu. 23Lüko ngüso kheng nai khunai, apa saila-an, naiuso she nai ah-ou-asheih shin, naiuso ngüso kheng khiam nou mianao iula naiuso angja nai noiküla. 24Ngüso apa dongai shiküta apa jonchukü ngiom, “Atsandetsün, Atsandetsün! sam eanao noin!”
Naiuso apa chukü ahsheih naiuso khiampek tü thut. Nai nung laokü tsamkü iula. 25Nai apaüh ngüso tü ngiom, “Asam amonglam nou tiai noin?”
Nai ngüso hatat naiuso ngakü chitekü ngiom, “Asheih si khiampek nou lüko angio angao nung sau?”
Yisuüh Angei Onthso Noitsün Khaiunia Lomeiji
(Mat 8:28-34; Mrk 5:1-20)
26Galil goumchi shimkü Gerasa hai goumchiai ngüso shisaom. 27Apa goh ai saonai, angei onthso suntsün khaiunia tsak noksong ainou shikü apa pheten. Naiuso atao laiukü apaüh ne tsütenkü tsamai tsüdekü etam nai noiküla. 28Apaüh tilai Yisu ep; nai vekü apa dongko kaukü ngiom, “Yisu, ni Goa Thso! ni ngo ainou ti aiuji? Ngü hao angja lakiu, ta ngo ni tü kojaji!” 29Apaüh nung ngiotsün tiautenai Yisuüh angei onthso apa ainou sungkhuao ngiokhem kiu. Piaküjam angei onthso nou apa thalounai apa akhou tsamai phasihok sonao nou kekü wan lüko apaüh sonao chanthatkü angei onthso nou singtso goh nai niakeiküla.
30Yisuüh apa tü, “Anian sau?” ta sang. Apaüh, “Jü nian ‘keihoi.” Ta thashin, tititenai apa da angei onthso piakü napkü noiküla. 31Ngüso athantsüyangkün khan nai lahong ta ngüsoüh apa tü koja.
32Nungai yahhoi asong tsak king nai achih yamhekü noiküla, naiuso ngüso nungai anapi ta apa tü koja. 33Nai angei onthso nouso khaiunia ainou sungkü yahhoi da nap, nungai yah keihoi thum she-ekü saokü she nai thsangatan.
34Tilai ajimhoi nou athawaotsün ep, ngüso khukü noksong nai si noknai nung chite. 35Ti thawao nung luao ngüso khuküta ngüso Yisu dongai shin, nai sau ainou angei onthso nouso shikhuwan, nung khaiunia nou ne tenkü khaiuniatsüo iulakü Yisu dongko moknoikü epkü ngüso hatat. 36Nung eptsünso angei onthso nousoüh thaloutsün khaiunia titi kipsan, nung ngüso hau chiten. 37Gerasinhai lemkü khaiunia apemüh ngüso ainou pungeao apa tü koja, tititenai ngüso thatü hat. Naiuso apa kheng tsak ai napkü laokü khu. 38Lüko angei onthso nouso shikhuwantsün khaiunia nou Yisu ko noiao apa tü koja. Lüko Yisuüh apa hongkü ngiom, 39“Atsamai laokü lükhu, naiuso athaiutha Goa nou chhi asong titi chhin, nung lüpongpeng.”
Naiuso apa khukü noksong apem ai Yisuüh apa thaiutha chhi asong titi chhin, nung pongpengkiu.
Jairus Thso Menyiuthso Naiuso Yisu Nepeng tü Thantsün Nyiuhai
(Mat 9:18-26; Mrk 5:21-43)
40Yisu laokü shinai hoi nou apa monglingkü lou, tititenai ngüso chikü apa tü taiukü noiküla. 41Nungko khaiunia tsak nian nou Jairus, sau Yihuda kamthang Apaou tsak noiküla apa shi. Naiuso apaüh Yisu dongko kaukü apa shiao koja; 42tititenai apa thso tsaklu nou pon chekü nime thatso noiküla; naiuso apa eanao noiküla. 43Apa khunai hoi nou apa lemkü kamjikan. Nai pon chekü nime she khutsün nyiuhai tsaküh moushe thaiutha apa taiutsün apem wan, naiuso sauüh lomeikiuao tsüshio. 44Nung nyiuhai nou Yisu phiai shiküta apa nethon nai than; naiuso nungailu apa shekhutsün lao. 45Yisuüh ngiom, “Ngo da sauüh than?” tilai apem tsamkü iula, Peter naiuso apako noinsoüh ngiom, “Atsandetsün, ni lemkü hoi thoi-eji.”
46Lüko Yisuüh ngiom, “Khaiunia tsaküh ngo da thaniu, tititenai ngo ainou oukong sunganiu ta ngo ngen.” 47Tilai nyiuhai nou atsangtaiuao tsümei ta ngen, apaüh ngaongaokü shikü Yisu khako kaukü apaüh ti thaiutha apa tü than naiuso nungailu apa titi meila nung ngiom. 48Yisuüh apa tü ngiom, “Meso, ni amonglam nou ni lomei-iu; aalu nai lükhu.”
49Loüh apa chitekü noinai, khaiunia tsak Yihuda kamthang Apaou tsam ainou shikü ngiom, “Athso eaniu. Atsandetsün latsonjekkiu.” 50Lüko Yisuüh nung lulakü apa tü ngiom, “Lahat; amonglamlu lümonglam, naiuso apa mei-e.”
51Tilai apa tsamai shin, apaüh Peter, Yohan, Yakob, naiuso meso nou posinyiu apako ha-in. 52Apem nou apa thaiutha miashapkü noiküla. Lüko apaüh ngiom, “Lashap; tititenai apa e tsüde, lüko sailakü noin!”
53Ngüsoüh apa e ta ngephe apa lutsaokü nyaikiu. 54Lüko Yisuüh meso pha nai helokü jonkü ngiom, “Meso, achu!” 55Apa ahkü shinai, Yisuüh apa hao aheau tso akiu ta ngiom. 56Apa posinyiu ngawan, lüko nung chhi nou sau hao lachite ta apaüh ngüso tü ngiom.
Currently Selected:
LUK 8: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.