LUK 6
6
Yihuda Anounyi Thaiutha Ngiosang
(Mat 12:1-8; Mrk 2:23-28)
1Yihuda Anounyi Yisu eiu tsak thsatkü khukü noiküla. Nungai apa sahoi nou tsonyakpong thaklu, küta ngüso pha nai noisankü he. 2Farisihoi ajantsoüh ngiom, “Yihuda Anounyi ti chhiao tsünoi nungti tiau asamüh chhiji?”
3Yisuüh thalakü ngüso tü ngiom, “David naiuso apako hanso naiunai apaüh ti chhin? 4Tititenai apa Goa tsamai nap, naiuso Goa amthang nai taiutsün themtsai sübao ngiokhem nou mesonhoi chiai amao haiüh heao tsünoi nung loukü he, naiuso apako hanso hao kiu, nung asamüh tsüvelu süne?”
5Apaüh ngüso tü ngiom, “Khaiunia Thso Yihuda Anounyi Apaou.”
Phajeb Khaiunia Tsak
(Mat 12:9-14; Mrk 3:1-6)
6Amao Yihuda Anounyi Yisuüh Yihuda kamthang nai napkü tsande, naiuso nungai pha uai jebkü khaiunia tsak noiküla. 7Ngiokhem tsandetsünso si Farisihoi nou Yisuüh Yihuda Anounyi lomei kiu-e süne tsülomei kiu-e ta aphio thalouao apa tü jiokü noi. 8Lüko apaüh ngüso mongyang ngeankü, phajeb khaiunia tü ngiom, “Atsa, küta awem nai ashi.” Nai apa tsakü shin. 9Yisuüh ngüso tü ngiom, “Ngo asam tü sange! Yihuda Anounyi amei chhi-e süne tsümeikü chhi-e; aa nou kipsane süne, mowan-i-e?” 10Yisuüh ngüso chikü tü thapkü phajeb khaiunia tü ngiom, “Apha alolu.” Naiuso apaüh lolunai apa pha meila.
11Lüko ngüso thatü mongmatkü, Yisu tü ti chhi-e ta ngemlou.
Yisuüh Sahoi Chekü Nime Chosanji
(Mat 10:1-4; Mrk 3:13-19)
12Nung ajekhaiuko apa misaoao kingnai sung, naiuso asoh chikü Goa tü mi sao. 13Tilai ah nou ngesan apaüh sahoi nouso jon naiuso ngüso ongko chekü nime chosankü ngüso tü honghoi ta jon. 14Simon (sau tü apaüh Peter ta jon) naiuso anio nou Andria, Yakob, Yohan, Philip, Bartholomai, 15Mathi, Thoma, naiuso Alfia thso Yakob, naiuso Simon, (sau tü Zebedi ta jon). 16Yakob thso Yihuda, naiuso apa janhetsün Yihuda Iskariot.
Yisuüh Tsandeji naiuso Lomeiji
(Mat 4:23-25)
17Tilai apaüh ngüso ko saokü tsami tsakko tsa, nai apa sahoi nouso hoi asong, Yihuda goumchi naiuso Yirusalem apem ainou, Tair naiuso Sidon 18khiam kou ainou apa ngio angao, ngüso akela lomeiao apa dongai shin. Ngüso angei onthso nou angja-itsün lomeikiu. 19Hoi apem nou apa da thanao yam, tititenai apa ainou oukong shikü ngüso chikü lomeikiu.
Amongling naiuso Amongsaiu
(Mat 5:1-12)
20Yisuüh apa sahoiso tü thapkü ngiom,
“Asam tsosilu hoi thaiumei,
tititenai Goa nokshing asam ün nou!
21Asam lo naiukü noinso thaiumei,
tititenai asam tsamlu-e!
Asam lo shaptsünso thaiumei,
tititenai asam nyai-e!
22“Tilai Khaiunia Thso thaiutha khaiuniahoi nou asam lon chinyane, naiuso tilai ngüsoüh ngüso ainou asam komane, naiuso asam lutsaokü thute, naiuso asam nian tsümeikü wane, asam thaiumei! 23Nung ajekhaiu nai lümongtsam, naiuso amongling nou lühamkei, tititenai aün nai asam thaiutha amai asong noin, tititenai ngüso paosiposoüh E-po nouso tü nungtilu kankei.
24“Lüko lo memei nouso thaiutha inyate,
tititenai asam tsüomeiao nou atao yananiu!
25“Lo saiukü taimso thaiutha inyate,
tititenai asam naiu-e!
“Asam lo nyaitsünso thaiutha inyate,
tititenai asam meashap shappe!
26“Tilai asam thaiutha khaiunia apem nou amei chite-e inyate! tititenai nungti ngüso paosiposoüh atsüotsüdekün E-po nouso tü kankei.
Eh nouso Thaiutha Atsüojin
(Mat 5:38-48; 7:12)
27“Lüko ngü asam jü ngio angtsünso tü ngio-e, asam ehso tü lütsüojin; asam chinyantsünso tü amei lüchhi. 28Asam hao athesan kiutsünso tü ouk lükiu, asam tü tsümeikü kankeitsünso thaiutha misao lüsao kiu. 29Asam onthong nai lahtsünso tü tsakai nou lüthoshi, naiuso ane lowantsünso tü ne nou lolaokü lataiu. 30Sauüh ni tü kojaji apa hao lükiu, naiuso sauüh ajengtsaiu kanlükhune laokü lasaoshi. 31Khaiuniahoi nou asam hao tilüsong chhi-iao aiuji, nungti asamüh ngüso tü lüchhi.
32Asam tsüojintsünsolu asamüh tsüojin naito, asamüh ti nianlom eppe? Tititenai angeihoi nou lüko ngüso tü tsüojintsünso tülu tsüojinshiji! 33Sauhaiüh asam tü amei chhiji, asamüh ngüso tülu amei chhi nai asamüh ti nianlom eppe? Tititenai angeihoi nou lüko nungti chhiji! 34Naiuso sauhai ainou asamüh müjam epshiao yangji, ngüso hao laiukiunai, asamüh ti nianlom eppe? Müjam nung wekülu epao thaiutha angeihoi nou lüko angeihoi hao laiukiuji. 35Lüko asam eh nouso lütsüojin, naiuso ngüso tü amei lüchhi, naiuso tilaitso tsümonghenkü lülaiukiu, naiuso asam alesan asong noi-e, naiuso asam thatü Asongting thsoso iula-e, tititenai nianlom tsükiukünso naiuso tsümeikün khaiunia dongai apa atsüojin noin. 36Tititenai Po nou atsüojinyang titi noin, nungti asam lüko atsüojinyang lünoi.
Amaohai Mi Layam
(Mat 7:1-5)
37“Asamüh amaohai mi layam naito asam mi lüko tsüyame: naiuso asamüh tsütsüokü mitha lakiu, naito asam hao aphio tsükiu-e; Amaohai hao aphio nou awankiu, naito asam aphio lüko wankiu-e. 38Lükiu naiuso asam hao kiu-e; ngüsoüh asamhao athat nouko tekkü thangthiokü, saiushikü, ngeshikü thatkü kiu-e. Tititenai ti athat nou asamüh thatkiu-e, nung asam hao lüko thatkiu-e.”
39Naiuso apaüh athatlu ngio tsak ngüso tü chite: “Niopek haiüh niopek nia-ao shio-e süne? Ngüne nemthso khannai tsüsali-e süne? 40Atsandetsün ko sahoi asong tsüde, lüko tilai sahoi pungkü nou saiukü iula-e, meshen tü tsandetsünli noi-e.
41“Tiauta ni meshen niovei nai noitsün thsünyup thaiutha tsüyangkü, ahai niovei ainou thsünyup tü thapji? 42Tsüdekünai tilai ni achija meshen niovei nai noitsün thsünyup tsüepkü taiukü, jü hai ngü aniovei nai thsünyup nou lowankiu-e ta ni ahai tü titi ngioao shio-e? Akaosai nouso! ni meshen niovei nai aya thsünyup nou lülowan, naiuso nungai ahai niovei nai noitsün thsünyup nou wanao ni tsangsheikü eppe.
Paipem Naiuso Apa Eiu
(Mat 7:16-20; 12:33-35)
43“Pai amei da eiu tsümeikü tsü-eiuji, tsüdekünai pai tsümeikün da eiu amei tsü-eiuji. 44Tititenai pai pungkü eiu nou ngeji. Sang ainou khaiunia nou latshep tsüpanji, tsüdekünai chongkaiu pai ainou sainaoshep tsüpanji. 45Khaiunia amei nou meshen mongyang amei singtaiukü noitsün ainou amei lousanji; naiuso khaiunia tsümeikü nou meshen mongyang tsümeikü singtaiukü noitsün ainou tsümeikü nou lousanji; tititenai ti in nou mongpem miankü noin nung son nai shikhuji.
Tsamlahtsün Khaiunia Nime
(Mat 7:24-27)
46“Tiauta asamüh ngo tü ‘Apaou,’ ‘Apaou,’ ta jonji, naiuso ngü ngiotsünso tsükankei? 47Sauhai jü dongai shiji, naiuso jü ngioso lulakü kankeiji, apa ti khekkü noin nung ngo asam tü chite-e. 48Apato lung nou chiai khan aokü thaiukü tsamlahtsün khaiuniali, naiuso tilai shelei shikü, nung tsam nou da thoikei, lüko tsülemlem, tititenai nung thatü mongkü lahkü noiküla. 49Sauüh jü ngio luji lüko tsükankeiji, apaüh tsamthang tsüpaotsang taiukü tsamlahtsün khaiuniali, naiuso nung tsam nou ta shelei nou thoikei nai jamaolu loian, naiuso nung tsam lotheantsün thatü thsüokü noiküla!”
Currently Selected:
LUK 6: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.