LUK 5
5
Yisuüh Ayating Sahoi Jonji
(Mat 4:18-22; Mrk 1:16-20)
1Nyitso Yisu Genesaret she shimkü noitsün taoko khaiuniahoi Goa ngio angau kamjikan. 2Apaüh khiamnok shimkü kheng nime ep; nungko ngouphek hoi sungküta ngüso nyao tsaowankü noiküla. 3Kheng tsak sübao Simon ün noiküla, Yisu nungko napkü, Peter tü kheng haiukou ainou intso nialükhunao sang. Naiuso Yisu kheng nai moknoikü hoi nouso tü tsande.
4Tilai Yisuüh chitekhem, apaüh Simon tü ngiom, “Khiam aokü nai kheng anialükhun, naiuso asam nyao nouso ngou thalouao khiamkheiai aokü lüsokthio.”
5Simonüh thalakü ngiom, “Atsandetsün,” “samüh ahsoh chikü soklüko tsaktso tsütha: lüko ni ngiotsünli ngü nyao nou soke.” 6Tilai ngüsoüh angiotsünli chhin ngüso nyao chipekkauli ngou nou piakü thalou. 7Ngüsoüh ahachuao kheng amao nouso tü jon. Ngüso kheng nime nung ngou nou mian, nungtiphe kheng nouso khiam kheiai napao yachu. 8Nungai Simon Peterüh nung epkü Yisu khako kaukü ngiom, “Jü dong ainou asoian, Oh Apaou, tititenai ngo angei khaiunia noin!”
9Tititenai ngou piakü thalou phe apa naiuso apa haiso ngawan. 10Zebedi thso Yakob naiuso Yohan sauhai Simon ko hachu-ekü noila ngüso lüko ngawan. Nai Yisuüh Simon tü ngiom, “Lahat, loyakü ni khaiunia thalou-e.”
11Ngüso kheng haiukuk shisaokü kankü shinai, ngüsoüh apem wankü Yisu phiai hoilut.
Yisuüh Khaiunia Tsak Lomeiji
(Mat 8:1-4; Mrk 1:40-45)
12Apa nok tsakko noinai, pem nai je nou sungkü nungko khaiunia tsak noiküla. Apaüh Yisu epkü, kaukü napkü apa tü kojakü ngiom, “Apaou, ni mongchio nai ngo lomeikiuao shio-e!”
13Yisuüh apa tü thankü ngiom, “Ni lomeikiuao Ngo mongchioji.” Nungailu je nou apa ainou khuwan. 14Yisuüh apa tü ngiom, “Sau hau lachite, lüko saitha meson dongai lükhu küta apa hau lüthaisan-i; naiuso ni lomei-iu ta mitha au Mosaüh thoiluttaiutsün chaithio nouso lükiu.”
15Lüko apa thaiutha ngiongem nou nok miankü khukü, hoi piakü apa ngio angao naiuso akia lomeiao aikü kamshin. 16Lüko apaüh aodangkü nai khukü misao sao.
Yisuüh Akela Kiatsün Tsak Lomeiji
(Mat 9:1-8; Mrk 2:1-12)
17Nyitso Yisuüh chimkü noinai, Galil naiuso Yihuda nok pungkü ainou naiuso Yirusalem ainou Farisihoi naiuso ngiokhem tsandetsünso apa shimkü shikü moknoi. Naiuso Apaou alomeitsün oukong nou apa da noiküla. 18Khaiuniahoi nou akela kiatsün khaiunia tsak thenshim nai cheplokü kankü shin, naiuso ngüsoüh apa kankü napküta Yisu dongko taiuao kowe. 19Hoi pia nou shioko ngüso napao tsüshio, nungtiphe ngüsoüh tsamkhaiu nai sungkü tsam nou losatkü apa thenshim hakü Yisu dongai lethio. 20Yisuüh ngüso amonglam ngekü ngiom, “Haimei, ni nou angei wankiu-iu.”
21Küta ngiokhem tsandetsünso naiuso Farisihoi nou nungti yangkü ngiom, “Goa lotsaokü chitetsün khaiunia nung sau? Goa tü simkü sauüh angei wankiuao shiom?”
22Lüko Yisuüh ngüso mongyang ngekü thalakü ngiom, “Asamüh tiau asam mongai yangluji? 23‘Ni ün angei wankiu-iu,’ ta ngioao shio süne, tsüdekünai ‘achu küta lütsakei’ ta ngioao shiotso? 24Lüko asamüh nung nge-e, goumchi ko Khaiunia Thso da angei wankiuao oukong noin.” (apaüh akela kiatsün tü ngiom) “Ngo ni tü ngioji, ‘Achu, naiuso athen kankü ashi, küta atsamai lükhu!’”
25Nungailu apa ngüso khako chuküta apa saitsün thenshim kankü Goa nian lomkü tsamai khuwan. 26Ngüso apem ngawan! naiuso Goa nian lomsan. Naiuso ngüsoüh thatü hatkü ngiom, “Lonyi samüh athanga epiu!”
Yisuüh Levi Jonji
(Mat 9:9-13; Mrk 2:13-17)
27Nungphiai apa kamai khunai Levi ta niankü liukim shitsün khaiunia tsak moknoikü epkü, apa tü ngiom, “Jü phiai ohoilut.” 28Naiuso apa apem wanküta tsaloukü apa phiai hoilut.
29Yisu thaiutha Leviüh apa tsamai sümai asong shan, naiuso liukim shitsün naiuso amao piakü ngüso heshiutsün nai moknoiküla. 30Farisihoi naiuso ngiokhem tsandetsünsoüh apa sahoi thako namnamkü ngiom, “Asamüh tiau liukim shitsün naiuso angei hoiko heshiuji?”
31Yisuüh thalakü ngüso tü ngiom, “Ameili nouso thaiutha moushe nge-po poukü tsünoi, lüko akia nouso thaiutha poukü noin. 32Asiohoi tsüde lüko angeihoi nouso mong phokle-iao ngo shin.”
Keithontsün Thaiutha Ngiosang
(Mat 9:14-17; Mrk 2:18-22)
33Ngüsoüh Yisu tü ngiom, “Yohan sahoi naiuso Farisihoi nousoüh piaküjam keithonkü misao saoji; lüko asahoi nou heshiuji.”
34Yisuüh ngüso tü thalan, “Tsamsigoh shanpaou ngüsoko noinai apa hai nouso keithonkü noi-i-ao asamüh shio süne? 35Lüko ajekhaiu saojikane, tilai tsamsigoh shantsün ngüso ainou nialükhunane, nungai ngüsoüh keithone.”
36Loüh apaüh ngüso tü athatlu ngio tsak chite: “Sauüh ne ayan ainou chisanküta ne akeng nai tsüchiolutji. Nungti naito ne ayan nou lotheane naiuso ayan nai chisan nou akeng ko tsüjei-ai-e. 37Theng ayan nyikhun nekong akeng nai sauüh tsülothioji.Nungti naito theng ayan nou nyikhun nekong paiyan-i-e, naiuso theng nou hongpengan-e, naiuso nyikhun nekong nou lotheane. 38Lüko theng ayan nyikhun nekong ayan nai thioao noin! 39Sauüh theng akeng shiuküta ayan nou tsüshiuji; tititenai ‘Akeng nou meithso!’ ta apaüh ngio-e.”
Currently Selected:
LUK 5: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.