LUK 4
4
Yisu tü Lilutsün
(Mat 4:1-11; Mrk 1:12-13)
1Yisu Asio Onthso nou miankü Yordan ainou phokle, naiuso Onthso nou apa liutsa nai aopülenyi, aopüleso ta niakeikü biya nou lilu. 2Nungso ajekhaiu ko apaüh ti tsühe, naiuso tilai nungso ajekhaiu pungjikan, apa naiukü iula.
3Biya nou apa tü ngiom, “Ni Goa Thso naito, lung nungüh themtsai iulaao lüngio,”
4Yisuüh apa tü thala, Nung asiongio nai satkü taim, “Khaiunia nou themtsai noulu aa tsükih-e.”
5Nai Yisu king nai niakü sungkü biya nou goumchi nokshing apem niohap nouko apa hau han. 6Biya nou Yisu tü ngiom, “Ngü ni hao nung nokshing ajinka naiuso nung alengmei apem kiu-e, tititenai nungso apem ngü hao kiuwaniu, naiuso ngü sau hao kiuao aiuji nung ngü kiuji. 7Nungtiphe ni jü khako kaukü am naito, nungso apem ni ün noi-e.”
8Yisuüh thalakü ngiom, “Asiongio nou ngioji, ‘Ni Apaou Goa tü lü am, naiuso ni apalu lüyathsüo!’”
9Nai apaüh Yisu Yirusalemai niakü khuküta apa amkham tsamson nai noi-i, küta apa tü ngiom, “Ni Goa Thso naito, achija nung ainou lühami. 10Tititenai nung asiongio nai satkü taim, ‘Goa nou meshen aünhonghoi tü ni hachuao thaiutha ngio-e.’ 11Loüh nungti ngioji, ‘Ahok nai lung nou tsüthekkao thaiutha, ni ngüso phamongai laiulo-e.’”
12Lüko Yisuüh thalan, “Asiongio nai ngioji, ‘Ni Apaou a Goa lalilu.’”
13Tilai Biya nou Yisu yam pungkünai lilutsün thapungjikan, apaüh Yisu ainou atao letletkü thaiutha punge.
Yisuüh Galil nai Apa Chhi Tsalouji
(Mat 4:12-17; Mrk 1:14-15)
14Tilai Yisu Galil ai laokü shin, Asio Onthso oukong apa ko noiküla. Apa thaiutha ngiongem nung shingtap apemai pengkü khun. 15Apaüh Yihuda kamthang nai tsande nai khaiunia pungkü nou apa lomsankiu.
Nazaret nai Yisu Tsülou
(Mat 13:53-58; Mrk 6:1-6)
16Yisu, apa songjikantsün Nazaret nokai shinai Yihuda Anounyi apa saili Yihuda kamthang nai khu. Apa Asiongio veao tsakü, 17E-po Isaia thsam apa hao kiu. Nai apaüh thsamlai nou sopankü nung sattaiukü ep,
18“Apaou Onthso ngo da noin,
tititenai tsosiluhai tü ngem amei chimao apaüh ngo tsomkiukü chosan.
Khokü taiutsünso tü asokthamtsün ngio kiuao,
niopek nouso niovei lusat kiuao;
kiapjeikü noitsünso khaiuniatsüo iulakü hongao.
19Tilai Apaou nou apa khaiuniaso kipsane,
nung ngiopengao atao nou shi-iu.”
20Yisuüh thsam nou laishiküta nungko yathsüotsünso hao kiuwankü moknoi. Yihuda kamthang nai noitsün chikü nou apa tü langlutkü thap, 21“Nung asiongio asamüh vekü lulatsün lonyi shithawaokü noin, ta apaüh ngüso tü ngiom.
22Apaüh chitetsün ngio luküta hoi nou ngakü ngiom, “Apa nung Yosep thso tsüdeso?”
23Apaüh ngüso tü ngiom, “Atsüoting asamüh nung ngiopung ngiothi ngio nou ngü tü ngio-e, ‘Moshe ngepo, achija lülomeilu.’ Tilüsong ni Capernaum ai chhin ta samüh lula, nungti meshen goumchi ko lüko lüchhi. 24Yisuüh ngiom, ngo asam tü ngio-e, “E-po tsak meshen nokkomko tilaitso monglingkü loutsün tsünoi.”
25“Lüko atsüoting ngo asam tü ngio-e, Elija taoko Israel nai tilai pon süme alei louk ah tsü-oukü noiküla, nai goumchi apemai naiusile asong shin, nungko jihi piakü iula. 26Elija ngüso ongko sau dongai lüko tsühong, lüko Sidon goh ai Zarephat jihi tsak dongailu hong. 27Naiuso E-po Elisha taoko Israel nai je sungtsün khaiunia piakü noiküla, lüko Syria hai Naman tü simkü ngüso sau tsülosio.”
28Ngüsoüh nung ngio lunai Yihuda kamthang nai noinso chikü amongmat nou mian. 29Ngüsoüh apa nok ainou koman, naiuso ngüso nok kingthon nai apa kha phokleshikü thoi-i-ao nialükhun. 30Lüko apa ngüso jetko laikü khuwan.
Angei Onthso Noitsün Khaiunia tsak
(Mrk 1:21-28)
31Nungai apa Galil ai noitsün Capernaum ai saokü Yihuda Anounyi ngüso tü Yihuda kamthang nai tsande. 32Apaüh tsandetsünko ngüso ngawan, tititenai apa ngio oukong nai noiküla. 33Angei onthso nou thaloutsün khaiunia tsak Yihuda kamthang nai noiküla. 34Apaüh sang asong nou, “Whai! Nazaret hai Yisu sam niko chhiao ti noin? ta vekü ngiom. Ni sam mowan-iao shin süne? Ni sau noin ngü ngeji. Ni Goa ün Asio hongthon.”
35Yisuüh apa tü, “Lasingio, naiuso apa ainou ashikhuwan!” ta thut. Nai angei onthso nou nung khaiunia, hoi khako thoiloian küta apa da tsümeikü ti tsüchhikü apa ainou shikhuwan.
36Nungko khaiunia chikü ngawan, küta ngüso chitekü ngiom, “Nungso ti ngio? Tititenai oukong nai apaüh angei onthso nouso hao ngiokhem kiuji, naiuso ngüso shikhuwanji!” 37Naiuso Yisu thaiutha nung ngiongem shingtap apemai ngempengkü khu.
Yisuüh Khaiunia Piakü Lomeikiuji
(Mat 8:14-17; Mrk 1:29-34)
38Yisuüh Yihuda kamthang wankü Simon tsamai khu, nungko Simon tsammongnyiu nou nyiu kiyashi kia nou thsüokü jenkü noin thaiutha chite. 39Yisuüh apa then dongai shikü kiyashi kia tü thut. Nungai akia nou apa lean, naiuso chukü apaüh ngüso hao khemkhu wao.
40Tilai asham shin, akia in amomo nou kiatsünso apem apa dongai nialoukü shin. Nungko khaiunia pungkü da apaüh pha nou thankü lomeikiu. 41Angei onthso nouso piakü khaiunia piakü ainou sungkü wekü ngiom, “Ni Goa Thso!” apaüh ngüso hao tsüchite-iao ngio tiautenai ngüsoüh apa Khrista ta ngen.
Yisuüh Yihuda Kamthang Nouso ai Chimji
(Mrk 1:35-39)
42Ahom apa aodangkün athang tsak ai khu. Nungko hoi nou apa tü yam, naiuso apa dongai shikü ngüso ainou tsükhu-iao lulao. 43Lüko apaüh ngüso tü ngiom, “Nok amao ai lüko Goa nokshing ngem amei nou chimao noin, tititenai nung thaiutha ngo hong.”
44Nungti Galil goumchi apemai naiuso Yihuda kamthang nouso ai apaüh chimkü noiküla.
Currently Selected:
LUK 4: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.