YOB 9
9
1-2Ah, ngü nung chikü nung khako lulakü noiküla.
Lüko titi thekü khaiunia tsaküh Goa thako apa mi shiolo-e?
3Sau khaiuniaüh apako ngematau shio-e?
khaiunia sauüh tilaitso thalaau tsüshio
Apaüh heng tsak ngoikü asang noiau shio-e.
Lüko sauüh athashiau tsüshio.
4Goa to thatü ange naiuso oukong;
khaiunia saulünou apa khako tsaau tsüshio.
5Alohat tsühakü apaüh king nouso soianji naiuso amongmat nai apaüh nungso lotheanji.
6Goa nou gohhaiu nou hongji naiuso goh nou da saiusaiuji;
apaüh goumchi thengsantaiutsün kheam nouso ta khuoji.
7Apaüh aje apektsün ainou lolao au shioji,
naiuso asoh kianthsüo thso nouso awontsün lolaoau shioji.
8Sauüh tsühachukü Goa nou aün nouso khongpeng-
tsüdekünai khiamnok akongting thainian chiai ngamlut.
9Goa nou kianthsüo nouso maou nai phankü wan-Asongting shap, Orion,
Pleiader, naiuso ajepekki ainou kianthsüo nouso.
10Apaüh chhisiya asong chhitsün samüh tsüngela,
naiuso apa athanga chhisiya nou ta nungko athon tsünoi.
11Goa yankü khuji, lüko ngü apa epau tsüshioji.
12Apa ti mongchioji apaüh lowanji,
naiuso sauüh apa loyangau tsüshioji
“Ni ti chhisiyaji?” ta sangau sauüh lüko tsüsomji.
13Goa amongmat tsüli-eji. Apaüh apa ehoiso sheasong thainian sauüh Rahab hachukü khengshi-e, nung noipekji.
14Nungtiphe Goa tü thalaau ngü ti ngioyak eplou-e?
15Ngo aphio tsünoi lüko, ngü chhiau shiotsün to,
jü asio Goa ainou atsüojinyang sao aulu noin.
16Loüh nungti apaüh ngü hau singio-i lüko,
apaüh ngü tü anglu-e ta ngü mongtsülamji.
17Ngo nelangkü lone au ti koko ta tsüdetengkü apaüh ahthe hongji.
18Apaüh ngo hau ilu tsülo-i;
apaüh jü aa akhosak nou mean-i-iu.
19Ngü oukong tonlu-e süne?
Goa ko oukong khenge-e süne?
Ngü apa mikhem tsamai kankü khu-e süne?
Khaiunia ajantsoüh apa khu-iau shio-e süne?
20Ngo aphio tsüsun naiuso saitha,
lüko jüngio aphioli iula-iji,
naiuso ngü ngiotsün alumüh ngo saowaniauli noiji.
21-22Ngo aphio tsüsun, lüko ngo ayang tsünoi.
Ngo aakih nou akia noin.
Titso tsüngenge;
aphio tsüsun lüko sun lüko,
Goa nou sam lomowane.
23Tilai aphio tsüsunkün khaiunia alekta eanji,
Goa nou nyaiji.
24Goa nou nung goumchi akausai nouso hau kiuwan.
Apaüh mikhemhoi chikü niopek iüla-in
Nung goa nou tsüdekünaito, sauüh chhin?
25Jü ajekhaiu nouso she-ekü khuwanji,
nungso tsak lüko amei tsünoi.
26Letche tsak sao tsak tü liukü nap potsün khekkü,
jü aakih kheng akhaolaoting tsak khekkü yananji.
27-28Ngo jü akiasung pe-anau thaiutha kowekü nyai lüko,
jü angja nouso chikü nou ngo penkiuji.
Goa nou ngo aphio ta thalouwan ta ngü ngeji.
29Ngo aphio nai thalouwanphe, ngo tiauta yangelate?
30Jü angei nouso tsowoi nou tsaowanau tsüshio.
31Goa nou ngo achinyan khan nai yakthiowan,
naiuso jü nesheso lüko ngü lon miamji.
32Goa nou khaiunia tünto, ngü apa tü thala-ela;
sam li-etsün lothamao sam mikhem tsamai lüko khuau shioküla.
33Lüko je jetko napkiuau tsaktso tsünoi-
Goa si ngo nemtso ta sauüh mikhemau tsünoi.
34Ngo hau angja kiutsün alaolo, Goa!
Ni ahat au lümeikü ngo ainou lolaokü ataiu!
35Ngo hatkü tsünoi. Ngo chite-e
tiautenai ngü jü mongpem ngeji.
Currently Selected:
YOB 9: KHIABSI
Highlight
Copy
Compare
Share
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
