YOB 6
6
1-2Jü angja si amongkia nouso tsoi nouko thatlu naito,
3khiamnok singtso nouso chiai tsoi nouko sunge lüsao,
nungtiphe jü ngioyak akong nousoüh ni tsülekkat au noin.
4Akongteng Goa chon nousoüh ngütü kopiu,
küta nungso sheh nou jütsopem thapekkü pengkü khu-iu.
Goa nou apa atsao nou ngo thako lemlokü noin.
5Tilai khengliu heji gado mongtsamji,
naiuso tilai tsokap heji jangtso tsamkü noiji.
6Lüko sauüh tsüsamkün,
jem tsüthiokün chihsikhiam heau shioji?
Waili monglung khup athaiu nou ta ti anyaothing noin?
7Nung khekkü ngo chihsikhiam heshiu au thaiai tsünap,
naiuso ngo hetsün alum nou ngü akia iulaji.
8Ngo sangtsün Goa nou tiau tsükiu-e?
Apaüh jü misao tiauta tsüthala-e?
9Apaüh lu ngo loatkü wantünto!
10Apaüh nungli chhi-e ta ngo ngetünto,
jü akia to titi songkü noilünou ngo amongling nou hamela.
Goa to asio ta ngü ngeji;
Apaüh ti thoilutji ngü tilaitso tsükhengshi.
11Aa tsülaokü kih noiau ngü tü oukong ti noishin?
Ngo ti ayangtaiu tsünoishikü tiau aa kih noi-e?
12Ngü lung kamshikü shithotaim süne?
Jü shesinyih nung taoson süne?
13Ngü jüpem kipsanloau loto ti oukong tsünoishi;
ngo ahachu thaiutha sheilükhunau tiaitso athang tsünoi.
14Ngü Goa lean süne tsülean,
nungtin angja taoko ngü ngiotsüo paiusihai poji.
15Lüko asam, jü paiusihaiso,
haiuthso nouso ah-tsü ou künai wailiangkü khuwantsün khekkü,
asamüh ngo sapthio-iu.
16Haiuthso nouso khülia naiuso nyin nou pokjeikü noin,
17lüko alam naito ngüso mowanji,
naiuso haiutso thang nou awai naiuso akeng noianji.
18Thainian kamkü tsakeitsün tao haiu thaiutha yam nai tsüepji;
ngüso tsakeikü noiküta singtso goh nai mowanji.
19Sheba naiuso Tema ainou thainian hoi nou yamji,
20lüko ngüso mongyang waikü noitsün haiuthsokuk nouko mowanji.
21Jü thaiutha asam nung haiuthso nouso khekkü noin.
Asamüh jü akuo epküta ahat nou soikü khuji.
22Asam tü ngü paopei tsak akiu ta tsüdekünai jü kothako ajantso hau nekhem paopei lükiu ta
23tsüdekünai ee angja kiutsünso ajantso ainou ngü akipsan ta ngiom süne?
24Nyu, ngü hau atsande:
Jü aphio nouso ngü hau achite.
Ngo tsamlokü noi-e naiuso asam tü anglu-e.
25Ngiotsüo ngio nouso titi oukong,
lüko asamüh ngio uo tsünapkü ngio chiteji.
26Ngo chitetsün ngio asamüh ahsheih ngiota yangji;
nungaito tiauta asamüh jü amongmat ngio nouso tü thashiji?
27Asamüh mejet me-uo nouso thaiutha saokü phongdeji naiuso asamüh meshen paiusihaiting nouko nou asam chija memeiloji!
28Ngotü kha nai athaplu. Ngü yaang tsüngio-e.
29Asam thatü laiukü khuwanniu.
Ngiotsüo tsüdekün ainou nungko alaolo.
Ngo laphio-i. Ngo thakü nai noin.
30Lüko asamüh ngü yaang chiteji ta yangji–
ngo tsüthakü ainou atha nou chiteau tsüshio-e ta asamüh yangji.
Currently Selected:
YOB 6: KHIABSI
Highlight
Copy
Compare
Share
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
