YOB 5
5
1Lüjonlu, Yob Nitü thala au ajantso noin süne?
Ni khulutau lümeikü honghoi ajantso noin süne?
2Amongmat nouko ee saokü achija yangelattsünto
mongyang tsünoikün aiu chhisiya tsak noi-e.
3Asoloau noikü ngü aiu nouso epm,
lüko ngü ngüso tsam khako alekta athesan tsak jonshin.
4Ngüso thsosoüh tilaitso aalo epau tsüshio;
mikhem khako ngüso haloau tsaktso tsakiu au tsüshio.
5Tsao ongnai sungtsün chihsam lüko,
naiusile khaiunia nou mainga hai chihsikhiam he-ankiu-e-
naiuso aletsün khaiuniahoi nou apa jengtsaiu tü niokia-e.
6Tsümeikünto pu nai tsüsamsanji,
tsüdekünai angja nou goum ainou tsüsungji.
7Tsüde, tongtü nai! In ainou inpe sungkhutsün li,
Khaiunia noulu meshen khako angja chija kankü shiji.
8Ni nung ngo thatünto, ngo Goa dongai laokü shiküta jü mi apa hau hanela.
9Apaüh chhitsün chhisiya asong samüh tsüngela,
naiuso apa athang ii nungko athontsüyang.
10Apaüh goumchi nai ah-ou nou hongji naiuso apaüh eiu nouso tü khiam thsalutji.
11Ah, atsamlo khaiunia lokchuau Goa noin,
naiuso amongsaiutsün chikü hau amongling kiuji.
12-13Akausai khaiuniahoi mongthat apaüh lothe kiuji,
naiuso a-nge khaiunia nouso ngüso ün chhisiyaling nai kheploji,
nungti ngüso chhisiya tsaktso ashio tsüepji;
14anyiwem tao lüko ngüso anyakhem nai kamshiji.
15Lüko Goa nou angja hai ee ainou kipsanji;
apotsünso apaüh athangmang ainou kipsanji.
16Apaüh angja hai hau ayangtsün nou kiuji,
naiuso akausai nouso losang-anji.
17Goa nou sau lothaji nung khaiunia thaiumei!
Tilai apaüh ni thutji nungtü lamongmat.
18Goa nou apaüh khoutsün mou nouso keji;
apa phaüh ni tawaiji, naiuso apa phaüh lomeiji.
19Atao atao ko apaüh ni atawai ainou kipsane;
20tilai naiusile shiji, apaüh ni aa taiu-e,
naiuso ehli nai ni e-e ainou kipsane.
21Goa nou ni alotsaotsün ainou juosan-e;
tilai alothe shiji apaüh ni kipsan-e.
22Ni tsümeikün chhi naiuso naiusile nou ta nyai-e
naiuso liu thainian nouso lun hatkü tsünoi-e.
23Ni ah-tsün eiu nouko lung nouso tsünoi-e;
liu thainian nou nitü laitso tsüpo-e.
24Nungai ni anejenkhio nai aalo nouko noi-e;
tilai ni a onnemokso thappe,
ni nungso ti angja tsünoikü eppe.
25Khengliu thsanyan tsak tü asah nelangkü noitsün khekkü ni thsosohoi piakü noi-e.
26Be-eiuyam tao thalutkü jinyak nyantsün khekkü,
ni ason tü thalutkü aakih laiukü kih-e.
27Yob, samüh laiukü yamküta ngeloum.
Nung atsüo noin, nungtiphe lo nung alou.
Yob
Currently Selected:
YOB 5: KHIABSI
Highlight
Copy
Compare
Share
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
