YOB 4
4
1-2Yob, ngü chitenai ni mongmate mo?
Ngo tsamkü noiau tsüshioshi.
3Ni khaiunia piakü hau tsande-iu,
naiuso outsükongkünso tü lokong kiu-iu.
4Tilai khaiunia ajantso,
tsaosilao si atanat shioko loanji,
angio nousoüh apa oukong-ikü tsa-ikü shin.
5Lo nung akouthe nou athaiu noin,
naiuso nung waoloau ni thatü lekkatji.
6Ni Goa amkham, naiuso ni aa nou alochi tsüsunkü noiküla;
nungtiphe ni amonglam naiuso ayang taiuau noin.
7Lo phiai laokü shikü lüyanglu.
Asio khaiunia akuothe waohetsün tsaksa lüko ajonsan.
8Ngü khaiuniahoi nou tsümeikün eiu ahtsünli ep,
naiuso lelu khekkü akausai lethiotsün epji;
lo ngüsoüh akausai naiuso tsümeikün be-eiuyam yamheji.
9Ah-the tsak khekkü, Goa nou ngüso apa amongmat nai lotheji.
10Chongkhao hoi khekkü akausai nousoüh mongmatkü weji,
lüko goa nou ngüso lodangkiuji naiuso ngüso hou longek kiuji.
11Chongkhao hoi ti loat heau tsünoitsünli ngüso eanji,
naiuso ngüso thsoso chikü pengpunanji.
12Ngü jeikü lulaau shiokü
atao tsakko ngiongem tsak nyankü shikü noiküla.
13Asoh meamean tsak khekkü jüniongao lothekiu.
14Jü tsopem athum ahat nou saiukeikü ngo ngaongao naiuso hat.
15Jü khakheng nai ahsheih atangsep tsaküh than,
naiuso jükhaiuo ahat nou tsaküchu.
16Ngü nungko tsotsak tsakü noitsün ep;
Ngo thaplu, lüko nungti-in ta chiteau tsüshio.
Nungai ngü sang tsak lula:
17“Goa khako ajantso asio noiau tsüdekünai apa shantsün khako sanglingkü theau shio-emo?
18Goa nou aün nai apa yathsüotsünso tü lüko tsümonglam;
apaüh meshen honghoi ko lüko aphio nou epsanji.
19Apaüh puja khekkü noitsün aa tsak ta monglame ta yangji süne,
pukhao sübao mat tsak khekkü thinatau shiom?
20Khaiunia tsak ahom to aa noiau shiom,
lüko ahsham moshikün khako ngio tsükiu taiukü eanji.
21Apaüh taiutsün chikü kankü khuwanji;
apa loüh mongyang nou tsüsaiukülu eanji.”
Currently Selected:
YOB 4: KHIABSI
Highlight
Copy
Compare
Share
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
