YOB 3
3
Yob Goa Thako Namnam
1Aphiteng nai Yobüh son sop küta apa chettsün ajekhaiu hau athesan kium.
Yob:
2-3O Goa, ngo chettsün ajekhaiu da athesan alolut;
Methso noithangnai ngo yaloutsün asoh nouda athesan alolut!
4Goa, nung ajekhaiu anyakhem au ali-e.
Nung ajekhaiu loüh tilaitso layangsan-i;
nung ajekhaiu da tilaitso awon lajelutshi.
5Nung ajekhaiu anyakhem naiuso asoh tsak anoi-i;
nung thengmia nou akhojeiau, naiuso aje nou atsom mowan.
6Pon nouko nung asoh nou lükhian-an,
naiuso nung tilaitso lawesanha shi;
7nung amongling tsüsunkün lon asoh tsak lünoi-i.
8Alonga-antsünhoi nouso ta nung ajekhaiu athesan lükiu ta lüngio,
sauhaiüh oukongting thainian thakippau shioji.
9Ah-nge kianthsüo nou awontsün ainou lolaokü ataiu;
nungh asoh nou hau ahshiochan thaiutha ti ayang lakiu.
10Ngü chettsün asoh thaiutha athesan lükiu,
tititenai nungüh ngo angja si amongkia nai chetsan-in.
11Ngo jünyiu thaimongai eantünto tsüdekünai,
ngo hatsün ataoting nouko eantünto ta ngo yangkiuji.
12Jünyiuüh tiauta ngo apa shiophuko thomloum ya?
Tsüdekünai apaüh ngo tiauta apa nyaoüh tsadloum ya?
13Ngo nungtaoko eantünto,
ngo loto aalo nai noi-ela,
14sauhaiüh akeng nokpao tsam nouso shanshin,
nung nokpaohoi naiuso nokshing hoili saikü noian lüsao.
15Tsüdekünai chaiou lakkeng taiutsün nokpaohoi nouso
sauhaiüh meshen tsam tangkason nou meankü kamsantaiu,
ngüso ko ngo noi-ela,
16tsüdekünai loteng chettsün methso tsak khekkü saikü noi-ela.
17Etam naito akausai khaiunia nouso chhisiya laowanji,
naiuso nungko chhisiya nai tanatkü chhitsünsoüh aphiting aalo epji.
18Wekü naiuso thsüokü thoiluttsün ainou sua nousoüh lüko amongling aalo epji.
19Nungaito ehen si asongso kamkü noin,
naiuso suahoi aphiting khaiuniatsüo athang nou noin.
20Tiauta khaiunia nou omhekülu noiji?
Tiauta akuothe nai noitsün khaiunia hau awon kiuji?
21Ngüsoüh ee nou ta taiuji,
lüko nung tilai tsüshiji;
chaiou kamtaiutsün ko hau ngüsoüh etam mongchioji.
22Ngüso eanküta mokhanankün lektso ngüso amongling tsünoi;
23Goa nou ngüso ashiau noitsün tsangan naiuso aniokun pungkü nai ngüso khopokkü wanan.
24Ehetsün liko, ngo mongsaiuji,
naiuso ngü ngettsün tilaitso tsülaolo.
25Ngo hatattsün alumko ngo ta shithawaoji.
26Ngo nokmei tsünoi, aalo tsünoi,
naiuso jü angja nouso tilaitso tsüthonla.
Chongting Ngio Chite
(4:1—14:22)
Elifaz:
Currently Selected:
YOB 3: KHIABSI
Highlight
Copy
Compare
Share
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
