Psonm 147
147
Louanz an Loner Senyer Liniver
1Loue SENYER!
I bon sant louanz pour nou Bondye!
I vreman gou pour loue li
akoz i bon.
2SENYER i rekonstri Zerizalenm;
i rasanble bann Izraelit ki annegzil.
3I geri bann ki leker in perdi lespwar.
I pans zot bann blesir.
4I desid lo kantite zetwal;
i donn sakenn en non.
5Nou SENYER i gran e son pouvwar i gran;
son lentelizans napa limit.
6SENYER i rekonfort bann malere;
i abes bann malfeter.
7Sant bann kantik rekonesans
an loner SENYER!
Zwe pour nou Bondye lo laarp!
8I kouver lesyel avek nyaz;
i prepar lapli pour later;
i fer zerb pouse lo montanny.
9I donn zannimo dekwa manze
e nouri bann pti korbo ler zot lafen.
10I pa pran plezir dan lafors en seval,
ni dan performans en atlet.
11Me SENYER i pran plezir
dan dimoun ki annan respe pour li,
dan sa bann ki'n met zot lespwar
dan son fidelite.
12Zerizalenm! Loue SENYER.
Siyon! Loue ou Bondye.
13I ranforsi serir ou bann laport;
i beni ou bann zanfan.
14I gard lape dan ou bann frontyer;
i donn ou meyer rekolt.
15SENYER i donn son lord lo later;
son parol i ganny vit egzekite.
16I fer lannez tonbe parey lalenn;
i fer fannen laroze parey lasann.
17I fer lagrel tonbe parey gravye;
personn pa kapab tenir son lafreser.
18Lo son lord, zot fonn;
i fer son divan soufle,
e delo i koule.
19I fer Zakob konn son parol,
son bann regleman
ek son bann desizyon avek Izrael.
20Zanmen in azir parey anver okenn lot nasyon.
Zot pa konn son bann komannman.
Loue SENYER!
Currently Selected:
Psonm 147: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
