Proverb 9
9
Lenvitasyon Lasazes
1Lasazes in konstri son lakaz;
in tay son set kolonn.
2I'n touy son bann zannimo,
i'n prepar son diven;
i'n osi dres son latab.
3I'n anvoy son bann servant
pour kriye lo bann oter dan lavil:
4Bann inyoran! Pas par isi.
Avek bann ensanse, lasazes i dir:
5Vin manz mon dipen;
vin bwar diven ki mon'n prepare.
6Aret frekantasyon bann inyoran e zot ava viv.
Pran semen disernman.
En Ensolan ek En Saz
7Sa enn ki koriz en ensolan,
i ganny meprize;
sa enn ki repros en malfeter
i ganny ensilte.
8Si ou kritik en ensolan,
i pou ay ou;
me si ou kritik en saz,
i pou vin ou zanmi.
9Konsey en saz,
e i ava vin pli saz;
ansenny en zis,
e son konnesans ava ogmante.
10Respe pour SENYER i konmansman lasazes.
Rezonnman i konmans avek konnesans sa enn ki sen.
11Annefe, gras a mwan, ou pou viv pli lontan;
bann lannen ava ganny azoute avek ou lavi.
12Si ou saz, zis ou ki pou profite;
si ou ensolan, zis ou ki pou port konsekans.
Lenvitasyon En Fanm Stipid
13En fanm stipid i koz for;
i inyoran e i pa konn nanryen.
14I asiz devan padport son lakaz;
dan en fotey, oubyen lo bann oter lavil.
15I apel bann pasan ki pe vey zot prop zafer:
16Bann inyoran! Pas par isi.
Avek sa bann ki latet i vid, i dir:
17Delo vole i dou;
dipen ki ou manz an kasyet i bon.
18Me zot bann envite pa konnen ki sa fanm
pe al dan lemonn lanmor,
e ki zot pe desann dan fon rwayonm lanmor.
Currently Selected:
Proverb 9: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
