Proverb 8
8
An Loner Lasazes
1Ekoute! Lasazes pe apele.
Rezonnman pe fer tande son lavwa.
2Lo bann kolin,
obor semen,
dan krwaze semen,
lasazes in pran pozisyon.
3I ti kriy for, akote bann laport devan lavil,
devan lantre bann lakaz:
4Imen! Avek ou, ki mon pe kriye.
Mon lapel i adres tou dimoun ki lo later:
5Zot bann fou!
Ganny lespri dan zot latet.
Zot ki'n perdi rezon!
Aprann rezonnen.
6Ekoute!
Mon annan keksoz enportan pour dir,
e mon labous ava proklanm sa ki drwat.
7Annefe, mon labous pou dir laverite;
mansonz napa plas dan mon labous.
8Tou sa ki mon dir i egzakt.
Zanmen mon koz pour tronpe;
mon pa pe koz manti.
9Sa enn ki annan lespri
i konpran mon bann parol;
pour sa enn ki annan konnesans, mon parol i drwat.
10Swazir mon lansennyman plito ki larzan
e konnesans dan plas lor pir.
11Annefe, lasazes i meyer ki bann bizou;
i pli presye ki tou sa ki ou kapab anvi.
Bann Tit Lasazes
12Mwan lasazes, mon viv avek pridans;
mon dekouver konnesans avek refleksyon.
13Ler ou annan respe anver SENYER,
ou deteste sa ki mal.
Mon deteste lorgey ek larogans,
movez aksyon ek mansonz.
14Mon donn bon konsey ek bon rezonnman.
Mon annan bon rezonnman,
mon annan lafors.
15Gras a mwan, bann lerwa i rennyen
e bann sef i fer bann bon lalwa.
16Gras a mwan,
bann dirizan, ensi ki bann ziz bann sef i gouvernen.
17Mon kontan dimoun ki kontan mwan.
Sa bann ki vreman rod mwan i kapab trouv mwan.
18Mon posed larises ek loner,
bann byen dirab ek lazistis.
19Mon fri i meyer ki lor,
menm lor pir,
e fri ki mon raporte
i vo plis ki larzan pir.
20Mon mars lo semen lazistis,
tou dilon bann santye laverite,
21pour donn en posesyon bann dimoun ki kontan mwan,
pour ranpli zot kof.
Lorizin Lasazes
22SENYER in kree mwan an premye,
avan tou sa ki i'n fer depi tre lontan.
23In etabli mwan depi touzour,
depi konmansman, avan ki later ti ganny kree.
24Mon'n ganny met omonn avan bann losean,
ler ti napa okenn larivyer avek bokou delo.
25Mon ti ganny met omonn
avan ki bann montanny ek bann kolin
ti ganny met anplas.
26I pa ti ankor kree ni later ni lakanpanny,
ni premye gren lapousyer lo later.
27Mon ti la, kan i ti fikse lesyel;
kan i ti tras en serk lo lafas lanmer.
28I ti plas bann nyaz par lao
e donn lafors bann delo par anba.
29I ti fikse lanmer son bann limit
pour ki bann delo pa deborde;
e i ti mark bann fondasyon later.
30Pandan sa letan mon ti akote li, parey en arsitek.
Mon ti fer li toultan plezir;
mon ti toultan zwe dan son prezans
31dan son liniver, avek son later.
Mon ti ganny bokou lazwa parmi bann imen.
Boner pour bann ki Ekout Lasazes
32Aprezan, mon bann zanfan!
Ekout mwan.
Byennere sa bann ki swiv mon semen.
33Ekout mon bann konsey!
Pa les zot de kote
e zot ava ganny lasazes.
34Byennere sa enn ki ekout mwan!
Byennere sa enn ki vey tou le zour kot mwan,
e ki sirvey lantre mon lakaz.
35Sa enn ki trouv mwan in trouv lavi e i dan faver SENYER.
36Me dimoun ki ofans mwan,
i fer son prop lekor ditor.
Dimoun ki ay mwan,
zot kontan lanmor.
Currently Selected:
Proverb 8: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
