Proverb 5
5
Lavertisman kont Lenpirte ek Lenfidelite
1Mon garson!
Pret latansyon mon bann parol lasazes
e ekout mon rezonnman.
2Alor, ou ava byen reflesir
e ou labous ava konserv konnesans.
3Annefe, labous en fanm adilter i distil dimyel;
son mannyer koze i pli dou ki delwil.
4Me answit, i vin anmer parey labsent,
fite parey en lepe lo son de kote.
5Son lipye i desann dan rwayonm lanmor;
son lepa i swiv santye ki anmenn dan latonm.
6I pa mars drwat lo semen lavi,
i perdi son semen san ki i konnen.
7Aprezan, mon garson!
Ekout mwan.
Pa rezet mon bann konsey.
8Reste lwen avek sa kalite fanm.
Pa apros laport son lakaz,
9sankwa, ou pou perdi ou loner avek lezot dimoun,
e ou lavi avek dimoun kriyel.
10Bann etranze ava profit lo ou larises;
prodwi ou travay ava al
pour en lot fanmir.
11Alafen ou lavi, ou pou plennyen
ler ou laser ek ou lekor in fatige.
12Alor, ou ava dir:
Mon'n deteste disiplin,
mon leker in mepriz bann konsey,
13mon pa'n ekout lavwa mon bann met,
ni port atansyon lo zot bann lansennyman.
14Aprezan, mon obor larin
dan milye lasanble ek lakominote.
Lanmour pour Son Fanm
15Bwar delo ki sorti dan ou prop sitern,
e delo ki ou tire dan ou pwi.
16Ou sours pa devre koul dan bann plas piblik,
oubyen dan bann lari.
17Fer zot koul zis pour ou
e pa partaz avek bann etranze.
18Ou sours ava ganny beni
e ava trouv lazwa fanm ou lazenes,
19ki parey en zoli kabri,
en zanti gazel.
Les son tete soul ou toultan;
les li fer ou vin fou avek son lanmour.
20Mon garson! Akoz ou al rod plezir avek fanm en lot
e kares tete en fanm ki ou pa konnen?
21Annefe, SENYER i war tou sa ki zonm i fer;
i egzamin tou zot aksyon.
22Malfeter i ganny pri dan son prop latrap.
Lasenn son pese i anpay li.
23I mor akoz i pa'n ganny elve.
I perdi dan son gran lafoli.
Currently Selected:
Proverb 5: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
