Proverb 6
6
Danze Pran Responsabilite Det Lezot
1Mon garson!
Si ou'n port ou garan anver ou prosen;
si ou'n angaz ou pour en etranze;
2si ou'n ganny pran par ou prop parol
e atrape par ou prop promes,
3alor, mon garson, la sa ki ou ava fer
pour sorti anba pouvwar ou vwazen:
Ale! Depese pour al pled avek li.
4Pa les sonmey ganny ou;
pa les ou popyer fermen;
5Degaz ou dan sa pyez,
parey en gazel dan latrap,
parey en zwazo dan lanmen saser.
Konsey pour bann Parese
6Parese! Obzerv en fourmi.
Gete koman i viv e ou ava vin saz.
7Fourmi napa okenn met,
ni sirveyan, ni sef.
8I prepar son manze pandan lete;
i anmas dekwa manze pandan rekolt.
9Parese!
Ziska kan ou pou reste dormi?
Kan eski ou pou reveye dan ou sonmey?
10En pti sonmey, en pti pe asoupi,
dormi en pti pe lebra krwaze,
11e lanmizer pour vin sirprann ou parey en voler;
lanmizer pou vin koman en bandi.
Dimoun ki Mank Senserite
12Sa enn ki koz lalang partou kot i pase,
i en vagabon, en malfeter.
13I bat lizye pour tronp dimoun;
i tap son lipye;
i fer siny avek ledwa.
14Son lespri i rod fer sa ki mal,
i pe touzour prepar en move kou
e provok dispit.
15Alor, maler pou tonm lo li en kou an gran,
napa remed pour domaz ki i'n sibir.
Sa ki Senyer I Deteste
16I annan sis keksoz ki SENYER i deteste,
e set ki i pa siporte:
17En regar meprizan, en labous mansonz,
lanmen ki fer koule disan inosan;
18en leker ki prepar bann move kou,
lipye ki depese pou fer sa ki mal;
19en fo temwen, e enn ki senm diskord dan en fanmir.
Fer Atansyon kont Adilter
20Mon garson!
Gard bann komannman ou papa,
pa abandonn lansennyman ou manman.
21Atas zot touzour lo ou leker,
anmar zot otour ou likou.
22Zot ava gid ou lo ou semen,
zot ava vey lo ou ler ou ava pe dormi
e koz avek ou ler ou ava leve.
23Annefe, bann komannman i en lalanp,
e lansennyman en lalimyer;
bann lavertisman ek bann koreksyon,
i en semen lavi.
24I pou protez ou kont bann move fanm
e kont mansonz en fanm etranze.
25Pa dezir son labote dan ou leker
e pa les li sedwir ou par son regar.
26Ou kapab ganny en prostitye
pour en bar dipen;
me en fanm marye, i riske kout ou, ou lavi.
27Lekel ki kapab met dife dan son pos,
san bril son lenz?
28Lekel ki kapab mars lo labrez
san bril son lipye?
29Sa i parey pour sa enn
ki dormi avek fanm son prosen;
sa enn ki tous li pour pey konsekans.
30Dimoun pa mepriz en voler
ki vol zis pour kalme son lapeti ler i lafen.
31Me si i ganny atrape,
i pou bezwen pey set fwa plis;
i pou perdi tou sa ki i annan se li.
32Sa zonm ki komet adilter in perdi larezon;
sa enn ki fer sa, i detri son lavi.
33Sa zonm pou ganny bate e perdi son loner;
son dezoner pa pou ganny efase.
34Annefe, zalouzi i met en mari dan lakoler vyolan
e i san pitye ler i pran son revanz.
35I pa pou aksepte okenn konpansasyon;
i pou refiz tou gous,
menm si i enportan.
Currently Selected:
Proverb 6: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
