Proverb 30
30
Parol Agour
1Parol sorti kot Agour, garson Yake.
La sa ki sa zonm ti deklare avek Ityel ek Oukal:
2I vre ki mon pli bet ki nenport ki zonm;
mon napa disernman imen.
3Mon pa'n aprann lasazes,
mon napa konnesans bann sen.
4Lekel ki'n mont dan lesyel e ki'n desann?
Lekel ki'n atrap divan dan kre son lanmen?
Lekel ki'n anvlop delo dan son lenz?
Lekel ki'n plas bann limit later?
Ki mannyer i apele? Koman son garson i apele?
Si ou konnen, dir mwan.
5Tou bann Parol Bondye in ganny teste.
I en boukliye pour sa enn ki pran refiz kot li.
6Pa azout nanryen avek sa bann parol
sankwa ou pou ganny reprose
e ou ava pas pour en manter.
7Mon demann ou de keksoz;
pa refiz mwan avan ki mon mor:
8Elwanny avek mwan sa ki fo ek parol mansonz;
pa donn mwan ni lanmizer, ni larises;
me donn mwan zis sa ki neseser pour viv.
9Annefe, si mon vin tro ris,
mon riske trai ou e dir:
Lekel li SENYER?
E si mon vin tro pov, mon kapab vin en voler.
Alor, mon pou nepli annan respe pour non Bondye.
10Pa dir dimal en serviter devan son met;
i riske modi ou e fer ou pey pour ou fot.
11I annan en kalite dimoun ki modi zot papa
e pa beni zot manman.
12I annan en bann ki krwar zot pir,
me ki pa'n lav zot salte.
13I annan ki orgeye
e ki get ou avek mepri.
14Serten i annan ledan parey lepe,
e lanmaswar parey kouto
pour devore e fer disparet bann pov lo later,
ek bann dezerite parmi bann et imen.
15Sise i annan de fiy ki dir: Donnen! Donnen!
I annan trwa keksoz ki pa zanmen satisfe,
kat ki pa zanmen dir: Ase!
16Lemonn lanmor, en fanm steril,
en later kot napa delo,
e dife ki zanmen i dir: Ase!
17Lizye ki mepriz en papa,
e ki negliz obeir son manman,
korbo obor larivyer, pour krev zot,
piti en leg pour devor zot.
18I annan trwa keksoz ki etonn mwan e ki mon pa konpran,
e kat ki mon pa konnen:
19Latras leg dan lesyel,
latras serpan lo en ros,
latras bato dan milye lanmer
e latras zonm kot en zenn fiy.
20La koman en fanm adilter i konport li:
I manze, eswiy son labous, e dir:
Mon pa'n fer nanryen mal.
21Trwa keksoz i fer tranble later;
i annan kat ki i pa kapab siporte:
22En lesklav ki vin lerwa,
en fou rasazye avek dipen,
23en fanm deteste ki marye,
e en servant ki ranplas son metres.
24I annan kat keksoz ki tipti lo later
me zot vreman entelizan;
25bann fourmi ki napa lafors,
me ki prepar zot nouritir pandan lete;
26bann daman ki napa pouvwar
ki viv dan bann kap ros,
27bann krike ki napa lerwa,
me ki sorti par group;
28bann lezar ki kapab ganny atrape avek lanmen,
e ki antre dan pale bann lerwa.
29I annan trwa keksoz ki mars avek lafyerte,
kat ki annan en zoli demars:
30En lyon ki pli for parmi bann zannimo,
ki pa kile devan personn;
31en kok ki drese lo son bann zergo, oubyen en bouk
ek lerwa dan milye son larme.
32Apre ki ou'n ase fou pour vant ou lekor,
ou'n reflesi, met ou lanmen lo labous:
33Ler ou bat dile, ou ganny diber,
tap lo nennen i fer sorti disan,
e met ankoler i prodwi bagar.
Currently Selected:
Proverb 30: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
