Proverb 29
29
1Sa enn ki ganny averti me ki rezenbe
pour ganny tape en sel kou e san remed.
2Ler i annan bokou dimoun ki azir byen,
lepep i dan lazwa;
me si en diktater ki o pouvwar, lepep i plennyen.
3Sa enn ki kontan lasazes,
i fer plezir son papa.
Sa enn ki frekant bann prostitye
i perdi son larzan.
4En lerwa ki respekte lazistis
i konsolid son pei;
en lerwa ki demann bokou taks
i rin pei.
5Sa enn ki flat son vwazen
pe plas en latrap anba son lipye.
6Pour en malfeter, son bann fot i vin bann pyez.
Me sa enn ki zis,
i danse dan lazwa.
7Sa enn ki zis i konn drwa en pov;
en malfeter pa konpran sa.
8Dimoun ensolan i soufle dife lo lavil;
me en saz i kalme lakoler.
9Si en saz i al ankour kont en fou,
i kapab ankoler oubyen riye;
i pa pour zanmen trankil.
10Dimoun ki kontan disan i ay sa enn ki onnet;
me en zonm drwat i kontan frekant zot.
11En fou i tal tou son bann santiman;
me sa enn ki saz i reste kalm.
12Kan en sef i ekout bann mansonz,
tou son bann travayer pou vin malonnet.
13La sa ki ris ek pov i annan ansanm:
SENYER ki'n fer tou le de.
14Si en lerwa i ziz bann pov avek drwatir,
son tronn ava ganny etabli pour touzour.
15Roten ek reprimann i donn lasazes.
Me en garson ki kapab fer tou sa ki i oule,
i fer laont son manman.
16Ler lakantite malfeter i ogmante, krim i ogmante.
Me sa enn ki zis, pou war zot tonbe.
17Koriz ou zanfan e ou ava anpe;
i ava donn ou bokou lazwa.
18Ler napa okenn vizyon pour lavenir,
lepep pa ganny kontrole;
i ere sa enn ki obei lalwa.
19Parol pa ase pour koriz en serviter;
akoz, menm si i konpran,
i pa reponn.
20Eski ou'n deza war en zonm ki koz san reflesir?
I annan plis lespwar pour en fou ki pour li.
21En serviter ki'n ganny gate depi son lanfans,
pou vin arogan plitar.
22En zonm malsoufran i provok bann dispit;
sa enn ki ankoler fasilman i komet bokou fot.
23Lorgey en zonm pour imilye li;
me sa enn ki senp, ava ganny loner.
24Sa enn ki konplis dan en vol,
i deteste son prop lavi.
I antann malediksyon son viktim,
me i pa dir nanryen.
25Lafreyer pour zonm i en move keksoz;
me sa enn ki met son konfyans dan SENYER i an sekirite.
26Bokou dimoun i rod faver sa enn ki gouvernen;
me SENYER ki ziz sakenn nou.
27En dimoun enzis i degoutan pour sa enn ki zis;
me sa enn ki zis i pas pour degoutan pour sa enn ki enzis.
Currently Selected:
Proverb 29: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
