Proverb 31
31
Konsey pour En Lerwa
1Parol lerwa Lemouel.
Konsey ki son manman ti servi pour enstri li.
2Mon garson!
Ki mon pou dir ou?
Ki mon pou dir ou,
ou ki'n sorti dan mon vant.
Ki mon pour dir ou
garson ki mon'n dezire?
3Pa donn ou lafors bann fanm;
pa les ou ganny anbete
par bann fanm ki koz maler bann lerwa.
4Lemouel!
Lerwa pa devre bwar,
diven pa bon pour bann lerwa,
ni bann sef kontan bwar lalkol.
5Ler zot in bwar,
zot oubliye sa ki lalwa i dir
e zot trai drwa bann pov.
6Donn labwason for sa enn ki pou mor,
diven sa enn ki tris,
7pour ki i oubliy son lanmizer,
pour ki i oubliy son lapenn!
8Koz pour sa bann ki pa kapab koze;
defann drwa tou sa bann ki'n ganny abandonnen.
9Koze! Ziz avek lazistis.
Defann lakoz bann pov ek bann dezerite.
Portre En Fanm Valer
10Lekel ki'n dekouver en fanm valer?
I vo plis ki tou bann bizou.
11Leker son mari i fer li konfyans,
e i pa pou mank nanryen.
12Tou le zour son lavi, i fer zis dibyen, non pa dimal.
13I rod lalenn ek latwal linenn;
i pran plezir travay avek son lanmen.
14I parey bann bato marsan,
i fer vin son dipen depi pei lwen.
15I leve avan lizour i fer,
i prepar dekwa manze pour son fanmir,
i distribye travay ki annan pour fer avek son bann servant.
16Apre refleksyon ki i aste en propriyete;
avek son prop lanmen i plant bann pye rezen.
17I ser son leren avek lafors;
i rann son lebra pli for.
18I satisfe avek son komers.
I pa tenny son lalanp pandan lannwit.
19Avek son lanmen, i fil difil;
son lanmen i gid fizo.
20I touzour pare pour ed sa enn ki pov,
i touzour la pour bann dezerite.
21I pa per lannez pour son fanmir;
tou dimoun kot li i annan dekwa pour abiye.
22I fabrik bann kouvertir;
i annan bann lenz fer avek len fen, kouler rouz.
23Ler son mari i asiz avek bann ansyen dan pei,
dimoun i rekonnet li devan laport lavil.
24I fabrik bann lenz linenn ki i vann;
i livre bann sentir avek bann marsan.
25I respir lafors ek dinyite,
i annan konfyans dan lavenir.
26I koz avek lasazes;
son labous i ansenny lafidelite.
27I sirvey tou sa ki pas dan son lakaz,
i pa manz dipen lapares.
28Son bann zanfan i leve e deklar li ere;
son mari i leve e felisit li.
29Bokou fiy in montre sa ki zot kapab fer;
me ou, ou depas zot tou.
30Elegans i tronper, labote i anbete.
En fanm ki annan respe pour SENYER,
i devre ganny loue.
31Rekonpans li pour travay fer avek son lanmen;
tou son bann travay i loue li ziska laport lavil.
Currently Selected:
Proverb 31: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
