Proverb 28
28
1En malfeter i sove san ki personn pa pourswiv li;
me sa enn ki zis i annan otan konfyans ki en lyon.
2Ler i annan bokou dirizan, en pei i revolte,
me avek en sef ki annan disernman, lord i rennyen.
3En diktater ki oprim bann malere,
i parey en gro lapli ki pa les nanryen pou manze apre.
4Sa enn ki abandonn lalwa,
i fer loner bann malfeter;
Me sa enn ki obzerv lalwa
i konbat kont bann malfeter.
5Malfeter pa konpran lazistis;
me sa enn ki rod SENYER i konpran tou.
6Vomye en pov ki viv onnetman,
ki sa enn, menm si i ris,
i annan movez kondwit.
7Sa enn ki obzerv lalwa i en garson bon rezonnman.
Me sa enn ki annan bann move frekantasyon,
i fer laont son paran.
8Si en dimoun i vin ris,
par pret larzan avek gro lentere,
son larises pou al pour sa enn ki bon anver bann pov.
9Sa enn ki bous son zorey pour li pa antann sa ki lalwa i dir,
menm son lapriyer i donn degou.
10Sa enn ki antrenn en dimoun drwat lo move semen,
pour tonm dan trou ki i'n fouye.
Me dimoun ki drwat pou ere.
11Sa enn ki ris i krwar i saz;
me en pov ki annan disernman
i kapab demaske li.
12I en gran loner kan sa enn ki zis i triyonfe;
me kan en malfeter i reisi,
tou dimoun i al kasyet.
13Sa enn ki kasyet son bann fot pa pou prospere.
Me sa enn ki avoue son fot e renonse, pour ganny pardonnen.
14Sa enn ki touzour veye pour pa fer sa ki mal fer, i ere.
Me sa enn ki annan leker dir pour konn maler.
15En dirizan dominer ki gouvern en pep pov,
i parey en lyon ler i gronnyen,
oubyen en lours ler i atake.
16En sef san rezonnman i vin en gran diktater;
sa enn ki deteste byen malaki ava viv lontan.
17Sa enn ki annan disan lo son lanmen,
pou sove pour tou son lavi.
18Sa enn ki viv onnetman ava viv an sekirite;
me sa enn ki anmenn en lavi doub,
pou tonm dan enn bann latrap.
19Sa enn ki kiltiv later, pa pou mank dipen;
me sa enn ki kiltiv bann rev, pou reste touzour pov.
20Sa enn ki fidel pou ganny bokou benediksyon;
me sa enn ki prese pour vin ris,
pou ganny pini en zour.
21I pa bon fer preferans ant dimoun;
sepandan, pour en morso dipen, serten i kapab enzis.
22En dimoun avar i prese pour li vin ris;
i pa konnen ki lanmizer pour tap li.
23Avek letan, nou prefer sa enn ki kritike,
plito ki sa enn ki flate.
24Sa enn ki depouy son papa ek son manman
e ki dir: Sa pa en krim,
i dalon avek en kaser lakaz.
25En dimoun arogan i provok bann dispit;
me sa enn ki fer konfyans dan SENYER pour vin ris.
26Sa enn ki fer konfyans dan son prop zizman, i en fou;
Me sa enn ki les li kondwir par lasazes,
ava ganny delivre dan danze.
27Sa enn ki donn bann pov pa pou mank nanryen.
Me sa enn ki ferm son lizye,
pou konn bokou malediksyon.
28Kan en malfeter i pran pouvwar, tou dimoun i al kasyet.
Ler i mor, bokou dimoun zis i leve.
Currently Selected:
Proverb 28: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
