Proverb 27
27
1Pa fer vantar lo koman demen pour ete;
akoz ou pa konnen sa ki kapab arive ozordi.
2Les lezot dimoun felisit ou,
les en etranze fer li, me pa ou.
3Ros i lour, disab i pez en kantite;
me lakoler en fou i pli lour ki tou le de ansanm.
4Lavyolans i kriyel, lakoler i parey en larivyer ki deborde;
me lekel ki kapab tenir devan zalouzi?
5Vomye en kritik fran
ki en lanmour ki reste sekre.
6Repros en zanmi i prouv son konfyans;
en lennmi ki anbras ou i tronper.
7En zonm ki pa lafen i refiz menm dimyel;
pour sa enn ki anfanmen, sa ki anmer i dou.
8En eran lwen avek son pei,
i parey en zwazo ki pe anvole lwen avek son nik.
9Delwil ek lansan i fer plezir leker;
ladouser lanmitye i vo plis ki ou prop konsey.
10Pa abandonn ou zanmi,
ni zanmi ou papa.
Si ou dan problenm,
pa al kot ou frer.
Annefe, en pros vwazen i preferab ki en paran lwen.
11Mon garson!
Kondwir ou byen e rann mon leker ere;
konmsa, mon ava kapab reponn sa enn
ki fer mwan ditor.
12Ler maler pe vini, sa enn ki pridan i al kasyet;
bann inyoran i tanpi, me zot pey ser.
13Pran lenz sa enn ki'n port li garan pour det en etranze;
demann en gaz avek sa enn ki port li kosyon pour en etranze.
14En bonzour for granmaten;
sa i parey en malediksyon.
15En fanm ki dispit, i parey en dalo
ki pa aret koule zour lapli.
16Sa enn ki esey aret li,
pe esey aret divan,
oubyen i pe atrap delwil avek son lanmen drwat.
17Feray i fit feray,
en dimoun i egey vizaz son prosen.
18Sa enn ki pran swen avek en pye fig, i manz son fri;
sa enn ki pran swen avek son met, i ganny onore.
19Parey ou prop vizaz i reflekte dan delo;
leker imen i reflekte ou prop santiman.
20Parey ki lemonn lanmor ek lemonn bann defen pa zanmen rasazye,
lizye zonm osi pa zanmen satisfe.
21Dife i teste lor ek larzan;
me en zonm i ganny zize
dapre son repitasyon.
22Menm si ou kraz en fou dan en pilon,
avek bann lagrenn,
son lafoli pa pou separe avek li.
23Konn byen sakenn ou bann mouton;
pran swen ou bann troupo.
24Annefe, larises pa reste touzour,
en kouronn pa ganny transmet atraver bann zenerasyon.
25Kan zerb in ganny koupe, verdir i aparet,
e zerb lo montanny i ganny ranmase.
26Mouton ava abiy ou,
kabri ava pey ou propriyete;
27dile kabri ava ase pour nouri ou,
ou fanmir ek ou bann servant.
Currently Selected:
Proverb 27: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
