Proverb 25
25
Diferan Proverb
1La ankor bann proverb Salomon ki ti ganny transmet par bann zofisye Ezekyas, lerwa Zida:
2Nou onor Bondye pour gard keksoz sekre.
Nou onor lerwa pour dekouver sa ki sekre.
3Ou pa kapab sond leker bann lerwa,
ni oter lesyel, ni profonder later.
4Tir verdigri lo larzan,
e lorfev ava fer li vin en lobze presye.
5Sas malfeter devan lerwa,
e son pouvwar ava vin pli solid dan lazistis.
6Pa fer vantar devan lerwa;
e pa pran plas en dimoun enportan.
7I pli bon ganny dir: Mont isi,
ki ganny abese devan en sef.
8Pa rakont lakour tro vit sa ki ou'n war.
Ki ou pou fer apre,
ler ou ladverser i prouve ki ou annan tor?
9Defann ou ka kont ou prosen zis avek li,
me pa devwal sekre en lot dimoun;
10sankwa ler i tande, i pou ensilte ou
e ou ava perdi ou repitasyon.
11En parol byen apropriye
i parey en ponm annor lo en dekor annarzan.
12En bag annor, en lornman fen annor,
i parey konsey en saz pour
en zorey ki ekoute.
13En mesaze fidel i rekonfort son met ki anvoy li;
i parey lafreser lannez pandan larekolt.
14Sa enn ki promet kado ki i pa zanmen donnen,
i parey nyaz ek divan ki pa anmenn lapli.
15Par lapasyans, en sef i ganny persiade.
Avek ladouser, lobstak i ganny tire.
16Si ou dekouver dimyel, manz zis sa ki ou bezwen.
Si ou pran tro, ou pou bezwen vomi.
17Pa met souvan lipye kot ou vwazen,
sinon i kapab ganny ase avek ou,
e konmans deteste ou.
18En zonm ki donn fo temwannyaz kont son prosen,
i anmenmtan en gro baton,
en lepe ek en fles pwent.
19Fer konfyans dan en tret zour maler,
i parey en ledan kase ek en lipye foule.
20Sant bann sanson lazwa avek en dimoun tris,
i konmsi ou pe tir ou lenz lo ou dan lafreser,
oubyen vers vineg lo en boubou.
21Si ou lennmi i lafen, donn li keksoz pour manze;
si i swaf, donn li keksoz pour bwar.
22Annefe, ou ava met li mal alez,
konmsi i annan labrez lo son latet.
23Vandnor i anmenn lapli;
mansonz, i anmenn lakoler.
24Vomye reste dan en kwen lakaz,
plito ki viv dan lakaz en fanm kankan.
25En bon nouvel sorti dan en pei lwenten
i parey delo fre pour sa enn ki pe mor laswaf.
26En dimoun zis ki tranble devan en malfeter,
i parey en lafontenn oubyen en pwi delo sal.
27I pa bon manz bokou dimyel,
ni rod tro bokou loner.
28Sa enn ki pa kapab kontrol son lakoler
i parey en lavil san defans, san okenn miray.
Currently Selected:
Proverb 25: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
