Proverb 24
24
Lasazes ek Malfeter
1Pa anvye bann malfeter,
ni anvi frekant zot,
2akoz zot leker i mazin zis vyolans
e zot labous i dir zis sa ki move.
3Avek lasazes ki en lakaz i ganny konstri;
e avek larezon i vin solid.
4Bann lasanm i ganny meble avek disernman,
avek bann lobze presye e zoli.
5En zonm saz i annan bokou lafors.
Sa enn ki annan konnesans i pli for.
6Si ou konn byen dirize, ou ava kapab fer lager,
ou bann konseye ava fer ou ganny lager.
7Lasazes i tro gran pour en fou;
i pa ouver son labous devan laport lavil.
8Sa enn ki prepar fer sa ki mal,
i ganny apele en bandi.
9En dimoun bet i mazin touzour fer pese.
Zonm i deteste sa enn ki ensolan.
10Si ou montre ou dekouraze dan letan maler,
alor, ou napa bokou lafors.
11Delivre sa enn ki ganny kondannen amor,
sa enn ki ganny trennen ver labatwar.
12Si ou dir: Nou pa ti konnen;
eski sa enn ki egzamin leker pa pou konpran?
Sa enn ki vey lo ou pa pou konnen?
Pa i pou rekonpans sakenn dapre son aksyon?
13Mon garson! Manz dimyel; i bon;
dimyel ki koul depi gof i dou dan labous.
14Alor, aprann ki lasazes i bon pour ou lavi.
Si ou dekouver li,
i annan en lavenir pour ou
e ou lespwar pa pou perdi.
15Pa met en pyez parey en malfeter
kont lakaz sa enn ki zis;
pa ravaz landrwa kot sa enn ki zis i reste,
16akoz sa enn ki zis i kapab tonm set fwa,
me i pou touzour leve.
Me dan maler, en malfeter pou tonm pour touzour.
17Pa pran plezir dan maler ou lennmi;
pa montre ou kontantman ler i tonbe,
18sankwa, SENYER pou war, e i pa pou kontan,
e i pa pou pini ou lennmi.
19Pa met ou ankoler kont bann malfeter;
pa zalou sa enn ki fer sa ki mal,
20akoz napa okenn lavenir pour en malfeter.
Son lalanp pou tennyen.
21Mon garson! Annan respe pour SENYER ek lerwa;
pa frekant sa enn ki oule sanz tou.
22Annefe, dezas i kapab vit tonm lo li,
e lekel ki konnen dega ki i kapab fer!
Lezot Konsey bann Saz
23La ankor bann konsey sorti kot bann saz:
I pa bon donn fo zizman.
24Sa enn ki dir avek en malfeter: Ou inosan,
pou ganny modi par lepep,
bann nasyon pou ankoler kont li.
25Me sa enn ki averti en malfeter,
i fer en bonn aksyon;
benediksyon pou vin lo li.
26Sa enn ki donn en larepons fran
i parey en anbrase lo labous.
27Fini byen ou travay deor;
prepar tou lo ou later;
apre, ou ava konstri ou lakaz.
28Pa temwanny san rezon kont ou vwazen;
e pa koz manti.
29Pa dir: Mon pou tret li parey in tret mwan;
mon pou fer zot pey pour sa ki zot in fer.
Portre en Parese
30Mon'n pas pre kot later en parese,
pre kot plantasyon rezen en zonm bet.
31Move zerb ti pe pouse partou,
move zerb ti'n kouver later
e bann miray ti'n tonbe.
32Mon'n gete, mon'n reflesi,
mon'n war e mon'n tir en leson.
33Dormi en pe, asoupi en pe,
krwaz lebra san nanryen fer.
34Pandan sa letan lapovrete i vin lo ou koman en voler;
lanmizer pour sirprann ou
parey en gerye arme.
Currently Selected:
Proverb 24: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
