Proverb 17
17
1Vomye manz en morso dipen sek dan trankilite,
ki partisip dan en festen kot i annan dispit.
2En serviter saz ava ranplas
en garson ki fer onte.
I ganny en par dan patrimwann lafanmir.
3Dife i teste lor ek larzan;
me SENYER i sond leker.
4En malfeter i ekout bann move parol;
en manter i ekout bann parol mansonz.
5Sa enn ki mepriz en pov i ensilte son Kreater;
sa enn ki kontan maler lezot pou ganny pini.
6Pti zanfan i fer loner bann vyeyar,
e bann paran i fer loner zot zanfan.
7Mannyer koze en fou i vilger,
ankor mwens, en dirizan ki koz lalang.
8En kado i parey en pyer presyez pour sa enn ki donnen;
i krwar ki i pou ouver tou laport.
9Sa enn ki pardonn en lofans i kiltiv lanmitye;
me sa enn ki fer rapel dispit
i met divizyon ant zanmi.
10En repros i annan plis lefe lo en zonm entelizan,
ki san koudbaton lo en fou.
11Dimoun mesan i rod zis fer dezord;
e en mesaze kriyel pou ganny anvoye kont li.
12Vomye rankontre en lours ki'n perdi son bann piti,
ki afront en zonm fou dan son lafoli.
13Maler pa pou zanmen kit lakaz
sa enn ki rann lemal pour lebyen.
14Sa enn ki konmans en dispit,
pe provok en linondasyon.
Alor, arete avan ki bagar i konmanse.
15SENYER i deteste sa enn ki deklar en koupab inosan
e sa enn ki kondann en inosan.
16Ki en sonm larzan i kapab fer dan lanmen en fou?
Pour li aste lasazes?
Non, i tro bet pour fer menm sa.
17En zanmi i fidel dan tou sirkonstans;
en frer i la pour partaz son difikilte.
18Zis en fou ki pran responsabilite det son prosen.
19Sa enn ki kontan ofans dimoun, i kontan senm diskord;
sa enn ki pas pour enportan pe rod maler.
20Sa enn ki rize pa pou prospere;
sa enn ki koz lalang pou tonm dan maler.
21Sa enn ki met omonn en fou pou ganny problenm;
napa lazwa pour paran en zanfan fou.
22En leker zwaye i en bon remed;
me en lespri tris i deperi bann lezo.
23Dimoun malonnet i aksepte gous anba latab,
pour ki lalwa pa ganny aplike.
24Lasazes pa lwen avek sa enn ki annan disernman;
me lizye sa enn ki bet i get lorizon.
25Sa enn ki sot i sagrin son papa;
i rann tris sa enn ki ti met li omonn.
26I pa bon kondann en inosan,
fwet en dimoun enportan i al kont son drwa.
27Sa enn ki pa koz bokou i posed konnesans;
sa enn ki lespri i kalm i rezonnab.
28Menm ler en fou pa dir nanryen
i pas pour en saz;
Ler i ferm son labous,
i pas pour entelizan.
Currently Selected:
Proverb 17: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
