Proverb 16
16
Senyer dan Lavi Tou le zour
1Zonm i poz kestyon;
me SENYER ki donn larepons.
2Zonm i krwar touzour ki i byen azir;
me SENYER ki egzamin fon leker.
3Konfye ou travay avek SENYER,
e ou ava realiz ou bann proze.
4Tou sa ki SENYER in fer i pour en rezon,
menm bann malfeter, pour zot ganny pini zour maler.
5SENYER i deteste dimoun arogan;
sirman zot pou ganny pini.
6Lalwayote ek lanmour i pardonn en fot;
Sa enn ki annan respe pour SENYER i evit fer sa ki mal.
7Kan SENYER i kontan avek mannyer fer en zonm,
i rekonsilye son prop lennmi avek li.
8Vomye ganny en pti pe onnetman,
ki ganny bokou malonnetman.
9Leker imen i fer bann plan;
me SENYER ki diriz son aksyon.
10Lerwa i koz avek lotorite sorti kot Bondye;
i pa tronpe dan son zizman.
11Bann balans ek bann mezir zis i pour SENYER
ki'n fikse valer bann pwa.
12I degoutan pour en lerwa fer sa ki mal,
akoz pratik lazistis ki etabli son pouvwar.
13Lerwa i kontan ler ou koz onnetman.
I kontan sa enn ki dir laverite.
14Lakoler en lerwa i en mesaze lanmor;
en dimoun saz i kapab kalme li.
15Kan figir lerwa i zwaye,
sa i siny lavi;
son labonte i parey lapli ki rafresi.
Lavi Sosyal e Moral
16Vomye posed lasazes plito ki lor;
vomye annan disernman plito ki larzan.
17Semen sa enn ki drwat i evit lemal;
sa enn ki vey lo son mannyer viv, i protez son lavi.
18Lorgey i vin avan dezas;
larogans i vin avan larin.
19Vomye viv trankilman parmi bann pov,
ki ganny en par dan byen malaki avek bann orgeye.
20Sa enn ki konn fer zafer ava prospere;
sa enn ki fer konfyans SENYER ava ere.
21Sa enn ki leker i saz i annan disernman;
en parol ki fer plezir i ogmant son savwar.
22Lasazes i sours lavi pour sa enn ki saz;
en fou i ganny pini par son prop betiz.
23Sa enn ki saz i reflesi avan koze;
konmsa, i kapab konvenk dimoun par son bann parol.
24Bann zoli parol i parey en gof dimyel;
i dou dan pale e bon pour lekor.
25En semen i paret drwat pour en zonm;
me finalman, i en semen ki kondwir ver lanmor.
26Lafen en travayer i obliz li travay, akoz son vant i pous li pour travay.
27Dimoun malonnet i mazin fer sa ki mal;
son labous i brile pour fer mesanste.
28Dimoun ki fo i provok bann dispit;
sa enn ki fer kalonmni i detri lanmitye.
29Dimoun vyolan i tronp son prosen;
i fer li pran en move semen.
30Sa enn ki ferm lizye pe prepar en move kou;
sa enn ki mord lalev in deza fer sa ki mal.
31Seve blan i en kouronn laglwar
ki sa enn ki'n mars lo semen lazistis i gannyen.
32Vomye en dimoun pasyan ki en gerye;
vomye en dimoun ki kontrol son karakter,
ki enn ki kaptir en lavil.
33Tiraz osor i fer dan en sak;
me zis SENYER ki pran desizyon.
Currently Selected:
Proverb 16: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
