Proverb 15
15
1En larepons trankil i repous lakoler;
me en parol brit i provok lakoler.
2Parol en saz i ogmant konnesans;
me labous en fou i repann lafoli.
3Lizye SENYER i partou;
i obzerv dimoun bon koman move.
4En bon parol i parey en pye dibwa ki donn lavi;
me en parol kriyel i kas leker.
5En fou i mepriz lenstriksyon son papa;
me sa enn ki aksepte bann reprimann i pridan.
6Lakaz sa enn ki zis i ranpli avek larises;
me sa enn ki malonnet,
i atir maler lo son byen.
7Labous sa enn ki saz i senm konnesans;
me leker sa enn ki bet pa vo nanryen.
8SENYER i deteste sakrifis ofer par bann malonnet;
me i pran plezir dan lapriyer sa enn ki zis.
9SENYER i deteste mannyer fer en malfeter;
me i kontan sa enn ki rod lazistis.
10Sa enn ki abandonn en bon semen, pou ganny pini severman;
me sa enn ki deteste repros, pou mor.
11SENYER i konnen sa ki pase dan lemonn lanmor;
me i konn plis, sa ki pase dan leker imen.
12Sa enn ki ensolan pa kontan ganny kritike;
i pa kontan pran konsey sa enn ki saz.
13Lazwa i lo figir sa enn ki annan bonker;
me en leker ki dan lapenn i dekouraz lespri.
14En saz i rod konnesans.
Labous sa enn ki fou i pran plezir dan lafoli.
15Pour en pov, lavi i difisil tou le zour;
me pour en leker zwaye,
lavi i en lafet tou le zour.
16Vomye annan en pti gin
me annan respe pour SENYER,
ki annan larises e viv dan traka.
17Vomye en pla legim kot lanmour i rennyen,
ki en bef angrese kot i annan laenn.
18En zonm malsoufran i provok diskord;
me sa enn ki pasyan i kalme dispit.
19Semen sa enn ki pares i ranpli avek rons ek pikan;
me semen sa enn ki drwat i lib e san problenm.
20En garson ki saz i fer lazwa son papa;
me sa enn ki bet i mepriz son manman.
21Sa enn ki fou i pran plezir dan lafoli;
me en zonm rezonnab i mars drwat lo son semen.
22En proze pa reisi si nou pa demann konsey;
me i reisi kan i annan bokou konseye.
23En bon larepons i donn lazwa;
en larepons apropriye i fer dibyen.
24En saz i swiv semen ki mont ver lavi;
konmsa, i evit lemonn lanmor ki par anba.
25SENYER i detri lakaz sa enn ki vantar;
me i protez propriyete en vev.
26SENYER i deteste sa enn ki annan move lentansyon;
me bann bon parol i fer li plezir.
27Sa enn ki tay deryer larzan,
i anmenn maler dan son fanmir.
Me sa enn ki deteste pran gous ava viv lontan.
28Sa enn ki zis i reflesi avan reponn;
labous en malfeter i kras move parol.
29SENYER i reste lwen avek bann malfeter;
me i ekout lapriyer sa enn ki zis.
30En zoli regar i met lazwa dan leker;
en bon nouvel i redonn lafors.
31Sa enn ki ekout konsey ki lavi i donn li,
ava annan son plas parmi bann saz.
32Sa enn ki refiz lenstriksyon,
i mepriz son prop lekor;
sa enn ki ekout konsey,
i aprann koman reflesir.
33Respe pour SENYER i ansenny lasazes.
Limilite i vin avan loner.
Currently Selected:
Proverb 15: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
