Nonm 15
15
Lalwa lo Sakrifis
1SENYER ti dir Moiz: 2Koz avek pep Izrael e dir zot: Kan zot ava'n antre dan pei ki mon pou donn zot pour zot reste, 3zot ava ofer mwan en sakrifis konplet oubyen nenport lezot sakrifis avek gro oubyen pti zannimo; en sakrifis pour akonpli en ve oubyen en lofrann volonter, oubyen en sakrifis a lokazyon en lafet pour fer monte en loder ki fer plezir SENYER. 4Sa enn ki ofer SENYER son lofrann, i ava prezant osi en lofrann vezetal, en kilo lafarin melanze avek en lit delwil. 5I ava osi vers en lit diven avek sa sakrifis konplet koman lofrann labwason. I ava fer parey pour nenport lezot sakrifis e pour sak mouton:
6Pour en mouton mal adilt, ou devre prezant de kilo lafarin melanze avek en lit edmi delwil, ofer koman en sakrifis sereal, 7ansanm avek 1.5 lit diven avek sa sakrifis konplet. Sa i pou donn en loder ki fer plezir SENYER.
8Pour en toro koman en sakrifis konplet, oubyen en lot sakrifis pour akonpli en ve oubyen en sakrifis remersiman anver SENYER, 9ou ava osi prezant en lofrann vezetal: Trwa kilo lafarin melanze avek de lit delwil doliv, 10e vers de lit diven: Sa i pou en lofrann ki fer plezir SENYER. 11Zot ava fer parey, sak fwa ki zot ofer en toro, en mouton mal adilt, en zenn mouton mal enn an, oubyen en kabri. 12Zot ava fer parey dapre kantite zannimo ki zot ofer. 13Tou Izraelit natif ava swiv sa lareg ler i ofer en sakrifis ki brile dan dife, enn ki fer plezir SENYER.
14Pour en etranze oubyen nenport ki pe reste parmi zot, ki anvi ofer en sakrifis brile dan dife, i ava fer parey pour donn en loder ki fer plezir SENYER. 15Pou annan en menm regleman pour zot kominote e pour bann etranze ki parmi zot. Sa i pou en re-gleman pour touzour. 16En sel lalwa pou aplik pour zot e pour bann etranze ki reste parmi zot.
17SENYER ti dir Moiz: 18Dir pep Izrael: Ler zot ariv dan pei kot mon pou anmenn zot, 19ler zot pou manz prodwi sa pei, zot ava prezant en lofrann pour SENYER. 20Avek premye lapat ki ou fer, premye dipen devret ganny ofer SENYER koman en don; ou ava prezant li parey ou fer pour ou premye rekolt dan menm fason ki ou fer prezantasyon ou sereal. 21Atraver tou ou bann zenerasyon ki swiv, tou premye lapat devret ganny ofer pour SENYER.
22Si en dimoun, san fer ekspre, i oubliye pour obei sa bann komannman ki SENYER in donnen par Moiz, 23depi zour SENYER ti donn sa bann komannman atraver tou bann zenerasyon. 24Si sa i en fot envolonter san ki kominote i konnen, kominote antye ava ofer en toro koman sakrifis konplet, ki ava donn en loder ki fer plezir SENYER. Zot ava azout en lofrann vezetal avek lofrann diven, dapre regleman. An plis ki sa, zot ava ofer en bouk koman en sakrifis pour efas pese. Sa ava donn en loder ki fer plezir SENYER.
25Pret ava fer rityel pardon pese lo kominote Izrael antye e zot ava ganny pardonnen. Annefe, sa ti en fot envolonter e pour sa fot, zot in anmenn zot lofrann ki'n ganny brile par dife pour SENYER. Akoz zot fot envolonter, zot in osi anmenn devan SENYER, zot sakrifis pour zot pese. 26Lepep ava ganny pardonnen ansanm avek tou bann etranze ki parmi zot, akoz zot tou, zot koupab pour sa fot envolonter.
27Si en sel dimoun ki'n fer sa pese envolonter, i ava ofer en femel kabri aze enn an pour son pese. 28Pret ava fer rityel pardon son pese envolonter lo lotel devan SENYER. Sa dimoun ava ganny pardonnen son pese. 29Menm lareg ava aplik pour bann natif Izraelit e pour bann etranze ki reste parmi zot. Menm lalwa ava aplik pour zot tou, ler zot fer en pese envolonter.
30Me si en natif Izraelit oubyen en etranze i fer en pese volonter, i komet en lofans anver SENYER, pou napa pardon pour li. I devret ganny pouse dan kominote. 31Annefe, in mepriz parol SENYER, in dezobei son komannman. I devret ganny sase dan kominote. I ava port konsekans son fot.
Vyolasyon Saba
32Kan pep Izrael ti ankor dan dezer, serten dimoun ti war en zonm pe anmas dibwa zour saba. 33Sa bann dimoun ki ti trouv li pe anmas dibwa, ti anmenn li devan Moiz, Aaron ek kominote Izrael. 34Akoz i pa ti kler ki zot devre fer dan sa ka, zot ti gard li fermen anba sekirite. 35SENYER ti dir Moiz: Sa zonm devret ganny met anmor e kominote antye ava saboul li avek ros an deor kan.
36Alor, kominote antye ti fer li sorti dan kan e zot ti saboul li ziska ki i ti mor, parey SENYER ti'n ordonnen par lentermedyer Moiz.
Lalwa Konsernan bann Franz
37SENYER ti dir Moiz: 38Dir pep Izrael: Zot ek tou bann zenerasyon fitir, zot ava met en franz lo lourle zot lenz e koud en riban ble toultour. 39Sak fwa ki zot ava get sa franz, zot ava mazin komannman SENYER pour zot met an pratik. Zot pa devre swiv dezir zot lizye ek zot leker pour fer sa ki mal. 40Konmsa, zot ava mazin mon komannman e zot ava vin sen pour SENYER. 41Mwan SENYER zot Bondye ki'n fer zot sorti Lezip pour mwan vin zot Bondye. Mwan menm SENYER zot Bondye.
Currently Selected:
Nonm 15: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
