Nonm 14
14
Pep Izrael I Konplent
1Tou lannwit, kominote Izraelit ti lev lavwa e plere dan detres. 2Lepep antye ti konplent kont Moiz ek Aaron. Zot tou, zot ti dir: Plito nou ti'n mor Lezip; plito nou ti'n mor dan sa dezer! 3Akoz SENYER i anvi fer nou antre dan sa pei, si nou bezwen ganny masakre? Nou bann zanfan ek nou fanm pou ganny pran otaz! Pa ti ava preferab pour nou retourn Lezip?
4Alor, zot ti dir ant zot: Annou rod en sef e nou ava retourn Lezip.
5Moiz ek Aaron ti tonm lafas ater devan pep Izrael antye ki ti'n rasanble. 6Parmi bann ki ti'n al eksplor pei, Zozye, garson Noun ek Kaleb, Garson Yefoune, ti desir zot lenz. 7Zot ti koz avek pep Izrael: Sa pei ki nou'n al eksplore i vreman en tre bon pei. 8Si SENYER i bon anver nou, i pou anmenn nou laba e donn nou sa pei kot i koul dile ek dimyel. 9Selman, pa revolte kont SENYER e pa per bann zabitan sa pei. Nou pou bat zot en sel kou. SENYER i avek nou, zot nepli annan proteksyon. Alor, pa bezwen per zot.
10Kominote Izrael ti pe menase pour saboul zot avek ros, me en sel kou, laglwar SENYER ti aparet kot Latant, devan pep Izrael.
Moiz I Pled pour Pep Izrael
11SENYER ti dir Moiz, “Pour konbyen letan ankor sa pep pou rezet mwan? Pour konbyen letan ankor zot pou refize krwar dan mwan, malgre tou sa bann siny ki mon'n fer parmi zot? 12Mon pou detri zot par en lepidemi e dezerit zot. Mon pou fer sorti dan ou en gran nasyon pli gran e pli for ki zot.”
13Moiz ti dir SENYER, “Bann Ezipsyen in konnen ki ou'n fer sorti sa pep Lezip avek ou pwisans. 14Zot in rakont avek zabitan sa pei; sa bann dimoun in tande ki ou SENYER, ou parmi ou pep, ki ou SENYER ou aparet fas a fas. Ou dan nyaz par lao latant. Ou diriz zot dan en kolonn nyaz lizour e dan en kolonn dife aswar. 15Si aprezan, ou detri sa pep en sel kou, bann nasyon ki'n antann koz lo ou, pou dir: 16SENYER pa'n kapab anmenn sa pep dan pei ki i ti'n promet zot. Alor in touy zot dan dezer.
17Aprezan, SENYER, mon sipliy ou! Montre ou gran pwisans parey ou'n promet ler ou ti dir: 18Mwan SENYER, mon pasyan, ranpli avek labonte ek fidelite, ki pardonn fot ek pese. Me mon pa fer koupab pas pou inosan. Mon azir kont sa enn ki'n komet pese e kont son bann desandan, ziska trwazyenm e menm katriyenm zenerasyon. 19Alor, pardonn fot sa pep dapre ou gran fidelite, parey ou'n pardonn zot depi zot in kit Lezip.”
20SENYER ti reponn, “Mon pardonn zot parey ou'n demande. 21Me osi vre ki mon vivan, e ki later antye i ranpli avek laglwar SENYER, 22tou sa bann ki'n war mon laglwar ek bann siny ki mon'n fer dan Lezip e dan dezer, ki'n provok mwan deza dis fwa e ki pa'n obeir mwan, 23mon promet ki personn parmi zot pa pou war sa pei ki mon ti promet zot zanset par en serman. 24Me akoz mon serviter Kaleb ki ti annan en lot lespri, ki'n reste tre fidel anver mwan, mon pou anmenn li dan sa pei ki i'n al eksplore. I ava pran posesyon sa later osi byen ki son desandan. 25Bann Amalesit ek bann Kananeen pe reste dan bann vale. Demen, zot ava tourn ver dezer dan direksyon lanmer Rouz.”
Pinisyon Lepep akoz Zot Konplent
26SENYER ti dir Moiz ek Aaron: 27Pour konbyen letan ankor mon pou siport konplent sa move kominote? Mon'n antann bann Izraelit pe proteste kont mwan. 28Dir zot: Mwan SENYER ki deklare: Osi vre ki mon vivan, mon pou tret zot parey mon'n antann zot dir: 29Zot ki'n ganny resanse, ki aze depi laz 20 an, an montan, zot ki'n konplent kont mwan, zot kadav pou tonbe partou dan sa dezer. 30Personn pa pou antre dan sa pei ki mon ti promet pour enstal zot, eksepte Kaleb ek Zozye, garson Noun.
31Kanta zot zanfan, ki zot ti dir pou vin bann otaz, mon pou fer zot antre e zot pou konn sa pei ki zot pa ti oule.
32Kanta zot, zot pou mor isi dan sa dezer. 33Zot zanfan pou viv lavi berze pandan 40 an. Zot pou sibir konsekans zot enfidelite, ziska ki sa enn dernyen i mor. 34Zot pou soufer konsekans zot pese pandan 40 an, en lannen pour sak zour ki zot ti eksplor sa pei. Zot ava konn mon mekontantman.
35Mwan SENYER, mon promet ki mon pou fer sa ki mon'n dir avek sa move kominote ki'n revolte kont mwan. Zot tou, zot pou tonbe e mor isi dan sa dezer.
36Bann zonm ki Moiz ti'n anvoy eksplor pei e ki ti fer lepep konplent kont SENYER par zot move rapor, 37ti ganny pini avek en fleo: Zot ti mor devan SENYER. 38Zis Zozye, garson Noun ek Kaleb, garson Zefoune, ki ti reste vivan parmi sa bann ki ti al eksplor pei.
Pep Izrael I Kontinyen Dezobei
39Kan Moiz ti anons sa avek pep Izraelit antye, zot ti tonm dan en gran dezolasyon. 40Lannmen, zot ti lev granmaten e mont ver latet montanny. Zot ti dir, “Aprezan, nou pou antre dan later ki Bondye in promet. Nou rekonnet ki nou'n fer pese.”
41Moiz ti dir zot, “Akoz zot pe dezobei lord ki SENYER in donnen? Sa pa pou reisi. 42Pa bezwen monte, akoz SENYER pa avek zot. Pa les zot ganny bate par zot bann lennmi. 43La bann Amalesit ek bann Kananeen i devan zot. Zot pou ganny masakre akoz zot in abandonn SENYER. SENYER pa pou avek zot.”
44Zot ti persiste pour mont dan sa rezyon montanny menm si Kof Lalyans SENYER ek Moiz pa ti'n kit kan. 45Alor, bann Amalesit ek bann Kananeen ki ti pe reste dan sa bann montanny ti atak zot. Zot ti ganny bate e ganny masakre. Zot ti sov ziska Horma.
Currently Selected:
Nonm 14: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
