Nonm 16
16
Revolt Kore, Datann ek Abiranm
1Kore, garson Yitsehar, garson Kehat, garson Levi, ansanm ek Datann ek Abiranm, bann garson Eliab, ek On, garson Pelet; tou le trwa desandan Riben, 2ti swazir 250 sef dan kominote pour opoz Moiz. 3Zot ti met zot ansanm kont Moiz ek Aaron. Zot ti dir: Ou'n al tro lwen. Pep Izrael antye i sen e SENYER i la parmi nou. Avek ki drwa zot oule plas zot par lao lasanble SENYER?
4Ler Moiz ti antann sa, i ti tonm lafas ater. 5I ti dir Kore ek son kominote antye: Demen bomaten, SENYER pou fer konnen lekel ki pour li e lekel ki sen, lekel ki i pou les prezant devan li. I pou les sa enn ki i pou swazir pour apros devan li. 6La sa ki zot ava fer: Kore ek kominote antye ava pran zot lansanswar. 7Demen bomaten, zot ava met dife ek lansan ladan devan SENYER. Sa enn ki SENYER ava swazir, li menm ki ava sa zonm sen. Bann Levit in egzazere.
8Moiz ti dir Kore, “Zot bann Levit! Ekout mwan. 9Eski i pa ase ki Bondye Izrael in swazir zot parmi pep Izrael, pour zot prezant devan li, ganny aksepte dan servis sanktyer SENYER e prezant devan lepep ki zot servi? 10In les zot ek tou zot bann frer ganny sa loner pour apros li. Eski zot oule fonksyon pret osi? 11Pour sa rezon, ou ek ou group ki avek ou, zot pe revolte kont SENYER. Ki zot annan pour zot revolte kont Aaron?”
12Moiz ti fer apel Datann ek Abiranm, garson Eliab. Me zot ti reponn: Non! Nou pa pe vini! 13I pa ase ki ou'n deza fer nou sorti dan en pei kot i koul dile ek dimyel, pour anmenn nou mor dan dezer? Aprezan, ou oule kontinyen domin nou koman nou sef? 14Ou pa'n anmenn nou dan en pei kot i koul dile ek dimyel. Ou pa'n donn nou an leritaz bann plantasyon legim, bann plantasyon rezen. Eski ou krwar ki sa bann zonm pa war kler? Non, nou pa pe vini.
Pinisyon Kore, Datann ek Abiranm
15Moiz ti tre ankoler. I ti dir SENYER, “Pa aksepte zot lofrann. Mon pa'n fer zot okenn ditor; mon pa'n ni menm pran en bourik pour zot.”
16Moiz ti dir Kore: Demen, ou avek ou group, vin prezant zot devan SENYER, ansanm avek Aaron. 17Sakenn zot ava pran son lansanswar, met lansan ladan e prezant zot devan SENYER. Pou annan 250 lansanswar. Ou osi avek Aaron, sakenn ava annan son lansanswar.
18Alor, sakenn ti pran son lansanswar e met labrez ek lansan ladan. Zot ti debout devan lantre Latant Rankont SENYER, ansanm avek Moiz ek Aaron. 19Alor, Kore ti rasanble pep Izrael kont zot devan Latant Rankont SENYER. Laglwar SENYER ti aparet avek kominote antye. 20SENYER ti dir Moiz ek Aaron, 21“Sorti parmi sa bann dimoun e mon ava ekstermin zot en sel kou.”
22Moiz ek Aaron ti tonm ater la fas ater. Zot ti dir, “Mon Bondye! Ou sa Bondye ki donn lavi tou kreatir! Akoz pour pese en sel dimoun, ou met ou ankoler anver kominote antye?”
23SENYER ti dir Moiz: 24Dir lepep elwanny zot avek latant Kore, Datann ek Abiranm.
25Moiz ti leve e al kot Datann ek Abiranm; bann ansyen dan Izrael ti swiv li. 26I ti dir avek kominote: Elwanny zot lwen avek latant sa bann move zonm. Pa tous nanryen ki pour zot, pangar zot osi, zot mor ansanm avek zot, akoz zot pese.
27Alor, tou dimoun ti dekoste avek latant Kore, Datann ek Abiranm. Datann ek Abiranm ti sorti e debout dan zot latant avek zot fanm, zot zanfan ek leres zot fanmir.
28Moiz ti dir: La koman zot ava rekonnet ki SENYER in anvoy mwan pour fer tousala e ki mon pa'n fer nanryen lo mwan menm. 29Si sa bann zonm i mor parey tou dimoun; si zot mor en lanmor natirel, sa i ava montre ki SENYER pa'n anvoy mwan. 30Me si SENYER i fer en keksoz ekstraordiner, si later i ouver e anval zot avek tou sa ki zot posede, si zot desann vivan dan lemonn lanmor, alor zot ava konpran ki sa bann dimoun in mepriz SENYER.
31Koman i ti fini koze, later ti ouver anba zot lipye. 32Later ti ouver e anval zot avek zot fanmir, ensi ki tou bann zans Kore avek sa ki zot ti annan. 33Zot ti desann vivan dan lemonn lanmor avek tou zot byen; later ti ferm lo zot, zot ti disparet parmi lepep. 34Pep Izrael antye ki ti la, ti sove ler zot ti antann sa bann dimoun kriye. Zot ti dir: Annou sove, avan later i anval nou.
35Apre sa, SENYER ti fer desann en dife ki ti bril sa 250 zonm ki ti pe ofer lansan.
Bann Lansanswar
36Apre, SENYER ti dir Moiz: 37Dir pret Eleazar, garson Aaron pour tir sa bann lansanswar dan dife, akoz zot sakre, e fann sa bann labrez partou. 38Lansanswar sa bann dimoun ki'n pey zot pese avek zot lavi, in vin sen. Fer en plak pour kouver lotel avek; zot in ganny konsakre ler zot ti ganny ofer devan SENYER. Sa i ava servi koman en lavertisman pour pep Izrael antye.
39Alor, pret Eleazar ti pran sa bann lansanswar an bronz ki ti pe servi par sa bann ki'n ganny brile e fer en plak pour kouver lotel. 40Sa ti servi pour rapel pep Izrael, ki personn, apar bann desandan Aaron, pa vin ofer lansan devan SENYER, pangar zot pas koman Kore ek son group, parey sa ki SENYER ti'n dir par lentermedyer Moiz.
Aaron I Sov Pep Izrael
41Son lannmen, lepep ti vin konplent ankor kot Moiz ek Aaron. Zot ti dir: Zot in touy pep SENYER.
42Apre ki zot ti'n rasanble kont Moiz ek Aaron, ler zot ti tourn zot ver Latant Rankont SENYER, nyaz ti desann e kouver latant e laglwar SENYER ti aparet. 43Moiz ek Aaron ti vin devan Latant prezans SENYER. 44SENYER ti dir Moiz: 45Elwanny zot avek sa pep e mon ava bril zot en sel kou.
Moiz ek Aaron ti tonm la fas ater.
46Apre, Moiz ti dir Aaron: Pran lansanswar avek dife ki lo lotel. Met lansan lo la, al vitman kot lepep e fer rityel pirifikasyon pour zot pese. Lakoler SENYER in eklate e fleo in konmanse.
47Aaron ti fer parey Moiz ti'n dir li: I ti tay dan milye lasanble kot fleo ti'n konmanse. I ti met lansan lo dife e fer rityel pour pardon pese lepep. 48I ti reste la debout parmi bann mor e bann vivan; e fleo ti arete.
49Ti annan 14,700 dimoun an tou ki ti mor dan sa fleo, san kont sa ki ti mor dan zafer Kore. 50Kan fleo ti arete, Aaron ti retourn kot Moiz devan lantre Latant Rankont SENYER.
Currently Selected:
Nonm 16: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
