Nonm 13
13
Bann Espyon
1SENYER ti dir Moiz: 2Swazir en sef dan sak tribi e anvoy zot eksplor pei Kanaan, later ki mon pe donn pep Izrael.
3Moiz ti ekout lord SENYER. I ti anvoy zot depi dezer Parann. Tou sa bann zonm ti sef bann Izraelit.
4La zot non: Pour tribi Riben: Sanmoua, garson Zakour.
5Pour tribi Simeon: Safat, garson Hori.
6Pour tribi Zida: Kaleb, garson Zefoune.
7Pour tribi Isakar: Yigal, garson Zozef.
8Pour tribi Efraim: Hoze, garson Noun.
9Pour tribi Benzamen: Palti, garson Rafou.
10Pour tribi Zabilon: Gadyel, garson Sodi.
11Pour tribi Manase: Gadi, garson Souzi.
12Pour tribi Dann: Amiel, garson Gemali.
13Pour tribi Aser: Setour, garson Mikael.
14Pour tribi Neftali: Nabi, garson Vosi.
15Pour tribi Gad: Geouel, garson Maki.
16Sa i non tou bann zonm ki Moiz ti anvoy eksplor pei Kanaan. Moiz ti donn Oze, garson Noun, non Zozye.
17Moiz ti anvoy zot eksplor pei Kanaan. I ti dir zot: Pran direksyon Nor atraver Negev e mont lo montanny. 18La, zot ava dekouver koman sa pei i ete, zot ava war si son bann zabitan i for oubyen si i feb, si popilasyon i gran ou non. 19Gete si pei i bon oubyen move, si dimoun i reste dan lavil ki antoure avek miray oubyen non. 20Gete si later i fertil oubyen pov. Si i bwaze oubyen non. Pran kouraz e anmenn en pe bann fri sa pei.
Annefe, sa ti letan rekolt bann premye rapor rezen.
21Alor, sa bann zonm ti monte e zot ti eksplor pei depi dezer Sin ziska Reob, obor lantre Hamat. 22Zot ti mont atraver dezer Negev dan Sid ziska Hebron, la kot Ahimann, Sesai e Talmai, desandan Anak ti reste. Hebron ti'n ganny konstri set an avan Soann, ki dan pei Lezip.
23Zot ti ariv dan vale Eskol, kot zot ti koup en grap rezen ki ti fodre de zonm pour anmennen lo en golet. Zot ti osi pran en pe grenad ek fig. 24Zot ti apel sa landrwa Vale Eskol, akoz sa grap rezen ki bann Izraelit ti'n koupe.
25Apre 40 zour eksplorasyon dan sa pei, zot ti retournen. 26Kan zot ti arive, zot ti al war Moiz, Aaron ek pep Izrael, ki ti Kades dan dezer Parann. Zot ti fer en rapor avek Moiz ek Aaron e devan pep Izrael antye. Zot ti montre bann fri ki zot ti'n anmennen, sorti dan sa pei.
27La sa ki zot ti rakont Moiz: Nou'n al eksplor sa pei kot ou ti'n anvoy nou. I vre ki i en pei kot dile ek dimyel i koule. Gete, la son bann fri. 28Me sa pep ki reste la i pwisan. Bann lavil i gran, antoure avek miray; nou'n menm war bann desandan Anak. 29Bann Amalesit i reste dan rezyon Negev dan Sid; bann Hitit, bann Zebizit e bann Amorit, zot reste dan montanny; bann Kananeen, zot reste obor lanmer e dan rezyon Zourden.
30Kaleb ti fer lepep aret mirmire kont Moiz. I ti dir, “Annou al atak zot konmela menm e pran zot pei; nou ase for, nou pou ganny laviktwar.”
31Me bann zonm ki ti'n al avek li ti dir, “Nou pa pou kapab al atak sa pep akoz zot pli for ki nou.”
32Alor zot ti donn fo rapor parmi bann Izraelit lo pei ki zot in al eksplore. Zot ti dir: Later ki nou'n al eksplore pa kapab soutenir son zabitan. Tou dimoun ki nou'n war, zot gran. 33Nou'n menm war bann zean, desandan Anak. Nou ti parey bann sotrel dan bor zot; nou krwar ki zot osi zot ti war nou konmsa.
Currently Selected:
Nonm 13: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
