Nonm 10
10
Tronpet Annarzan
1SENYER ti dir Moiz: 2Fer de tronpet annarzan; forz li avek en sel morso metal. Ou ava servi pour konvok lasanble e ler zot deplas kan. 3Kan ou ava sonn tou le de tronpet, pep Izrael antye ava rasanble otour ou, devan lantre Latant Rankont SENYER.
4Me ler ou sonn zis en tronpet, zis bann responsab ek bann sef tribi Izrael ki pou rasanble devan ou. 5Ler ou soufle en son kourt, bann ki dan Les ava lev kan e sorti. 6Ler ou soufle de son kourt, sa ki dan Sid ava leve pour sorti dan kan: Ou ava soufle de son kourt ler zot pou lev kan. 7Me ler ou pou rasanble lepep, ou ava soufle de long kou san koupe.
8Zis bann garson Aaron ek bann pret ki annan drwa soufle tronpet.
Sa i ava en regleman pour zot ek zot desandans. 9Ler zot sorti dan zot pei pour al lager kont lennmi ki pe atak zot, soufle sinyal lager lo sa bann tronpet. Konmsa, SENYER zot Bondye, pa pou oubliy zot e i ava vin delivre zot kont zot lennmi.
10Dan bann lokazyon lafet parey nouvellin ek lezot lafet relizye, zot devre soufle bann tronpet pandan ki zot ofer zot sakrifis konplet, oubyen sakrifis remersiman. Konmsa, sa bann son tronpet ava en rapel pour zot devan zot Bondye. Mwan menm SENYER zot Bondye.
Bann Izraelit I Lev Kan
11Dan dezyenm lannen, dezyenm mwan, lo ventyenm zour, nyaz lo Latant Temwannyaz ti leve. 12Bann Izraelit ti kit dezer Sinai. Nyaz ti al aret dan dezer Parann.
13Sa ti premye fwa ki zot ti deplase, apre ki SENYER ti'n ordonnen, par lentermedyer Moiz. 14Larme kan Zida ti sorti premye deryer zot bannyer, larme ti dirize par Nasonn, garson Aminadab; 15Netaneel, garson Souar, ti diriz larme Isakar; 16Eliab, garson Helonn, ti diriz larme tribi Zabilon.
17Apre sa, Latant Temwannyaz ti ganny demonte. Bann garson Gersonn ek bann garson Merari ki ti pe anmenn Latant, ti sorti.
18Riben ek son larme ti lev kan e sorti anba zot bannyer. Elisour, garson Sedeour ti diriz larme. 19Seloumiel, garson Sourisadai, ti diriz larme tribi Simeon. 20Eliasaf, garson Deouel, ti diriz larme tribi Gad.
21Apre, bann Keatit sorti dan tribi Levi ti anmenn bann lobze sakre. Pandan sa letan, Latant Temwannyaz ti pe ganny drese avan zot arive.
22Apre, kan tribi Efraim ti deplase anba zot bannyer. Elisama, garson Amihoud ti diriz larme. 23Gamalyel, garson Pedasour ti diriz larme tribi Manase. 24Larme tribi Benzamen ti ganny dirize par Abidann, garson Gidoni.
25Finalman, larme tribi Dann ti sorti anba zot bannyer. Zot ti vin en aryer gard e zot larme ti ganny dirize par Ahiezer, garson Amisadai. 26Pagiel, garson Okrann ti diriz larme tribi Aser. 27Ahira, garson Einann ti diriz larme tribi Neftali. 28Se dan sa fason ki zot ti deplase sak fwa ki zot ti lev kan.
Moiz I Rod En Gid pour Vwayaz
29Moiz ti dir Hobab, garson Reouel, son boper, ki ti en Madyanit, “Nou pe al dan sa later ki SENYER in promet pour donn nou. Vin avek nou e ou ava partisip dan boner ki SENYER in promet Izrael.”
30Hobab ti reponn li, “Non! Mon pa pe vini, mon pe retourn dan mon fanmir kot mon sorti.”
31Moiz ti reponn li, “Pa kit nou. Ou konn byen sa dezer e kote nou kapab kanpe; ou ava vin nou gid. 32Si ou vin avek nou, ou ava ganny en par dan sa ki SENYER pou donn nou.”
Pep Izrael I Lev Kan
33Alor, lepep ti kit montanny SENYER pour en vwayaz trwa zour apye. Kof Lalyans SENYER ti al devan zot. I ti pran zot trwa zour pour rod en landrwa pour repoze. 34Sak fwa ki zot ti deplase, nyaz SENYER ti touzour la par lao zot pandan lazournen.
35Sak fwa ki Kof Lalyans ti deplase, Moiz ti priye: Leve SENYER! Fer ou bann lennmi disperse; fer sa bann ki ay ou fannen partou.
36Sak fwa ki i ti aret en landrwa, Moiz ti dir: SENYER! Retourn parmi sa bann milye Izraelit.
Currently Selected:
Nonm 10: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
