Nonm 11
11
En Landrwa ki apel Tabera
1Lepep ti konmans konplent kont SENYER. Sa ti fer lakoler SENYER monte. Dife SENYER ti desann e bril en bout kan. 2Lepep ti enplor Moiz ki ti priy SENYER e dife ti tennyen. 3Zot ti apel sa landrwa Tabera, savedir Dife, akoz dife SENYER ki ti'n alimen parmi zot.
Pep Izrael I Demann Lavyann
4Parmi pep Izrael, ti annan group etranze ki ti ranpli avek tou kalite lanvi. Bann Izraelit osi ti pe konmans konplent: Kote nou pou ganny en pe lavyann pou manze? 5Nou rapel byen: Pwason ti annabondans Lezip; ti osi annan kokonm, melon, pwaro, zonnyon ek lay. 6Aprezan, nou nepli annan lafors, napa nanryen pour manze, nou war zis lamann.
7Lamann ti parey lagrenn koriyann, ki ti kouler blan tire lo zonn. 8Lepep ti sorti pour al ranmase; i ti ganny moule e kraze dan pilon. Zot ti kwi e fer gato avek. Son gou ti parey gato ki'n kwi avek delwil doliv. 9Ler laroze ti tonbe lo kan aswar, lamann osi ti tonbe.
10Moiz ti antann lepep pe plere dan zot fanmir, devan zot latant. SENYER ti pran en gran lakoler kont zot.
11Moiz ti sagren. I ti dir SENYER: Akoz ou fer ou serviter tris? Akoz ou ankoler avek mwan? Akoz ou les tou sa responsabilite lo mwan? 12Eski mwan ki'n met omonn sa pep? Eski mwan ki'n donn zot nesans pour ou dir mwan pran li dan lebra, parey en nouris i pran en pti baba ki pe tete e anmenn zot ziska dan pei ki ou'n promet zot zanset par en serman? 13Kote mon pou ganny lavyann pour donn tou sa pep ki pe plennyen: Donn nou lavyann pour manze?
14Mon tousel e mon nepli kapab kondwir sa pep, i tro lour pour mwan. 15Si ou pou tret mwan konmsa, plito ou touy mwan, fer mwan en faver e pa les mwan war tou mon bann maler ki ou pe anvoy lo mwan.
Moiz I Nonm Swasanndis Ansyen
16SENYER ti dir Moiz, “Rasanble 70 ansyen pour diriz pep Izrael. Anmenn zot devan mwan, plas zot devan Latant Rankont SENYER ansanm avek ou. 17Mon pou desann e koz avek ou dan sa landrwa. Mon pou pran en pe lespri ki dan ou e met lo zot. Zot ava anmenn en pe ou responsabilite; ou pa bezwen anmenn pwa sa fardo ou tousel”.
18“Dir avek lepep: Konsakre zot pour demen. Zot pou manz lavyann, akoz zot in mirmire dan zorey SENYER e zot in dir: Kote nou pou ganny lavyann pour manze? Nou ti byen Lezip. Alor, SENYER pou donn zot lavyann pour zot manze. 19Zot pou manz lavyann pa zis en zour oubyen de zour, pa ni menm senk zour, dis zour, oubyen 20 zour, 20me pour en mwan antye, ziska i sorti par zot nennen, ziska zot ava degout lavyann. Tousala, akoz zot in rezet SENYER ki parmi zot; zot in mirmire devan li e zot in dir: Akoz nou'n sorti Lezip?”
21Moiz ti dir, “Sa pep devan mwan, i annan omwen 600,000 zonm e ou dir: Mon pou donn zot lavyann pour manze pandan en mwan? 22Eski i pou annan ase bef ek mouton pour tou sa bann dimoun? Menm si ou atrap tou pwason dan lanmer, eski i pou annan ase pour nouri zot tou?”
23SENYER ti reponn Moiz, “Eski lebra SENYER i tro kourt? Mon pou fer ou war, si sa ki mon'n dir pou arive oubyen non.”
24Moiz ti sorti e raport parol SENYER avek lepep. I ti rasanble sa 70 ansyen parmi lepep e plas zot otour Latant. 25SENYER ti desann dan nyaz e koz avek Moiz. I ti pran en pe sa lespri ki ti lo Moiz e met li lo sa 70 ansyen. Kan lespri ti vin lo zot, zot ti profetize me zot pa ti kontinyen.
26Parmi sa bann ansyen, Eldad ek Medad ti'n reste dan kan. Lespri ti vin lo zot, menm si zot pa ti la kot latant; zot ti profetize la dan kan. 27En zenn garson ti taye pour al dir Moiz ki Eldad e Medad ti pe profetize dan kan.
28Alor, Zozye, garson Noun ki ti dan servis Moiz depi ki i ti ankor zenn, ti dir, “Moiz, mon senyer, anpes zot.”
29Moiz ti reponn li, “Eski ou zalou dan mon plas? Mon ti ava kontan ki SENYER i met son Lespri lo pep Izrael antye, konmsa tou dimoun ti ava profetize.”
30Apre sa, Moiz ek sa bann sef ti retourn dan kan.
Senyer I Anvoy Zwazo
31SENYER ti fer soufle en divan sorti lo lanmer ki ti anmenn bann zwazo ki apel kay dan kan Izrael lo en distans plizyer kilomet toultour kan. Zot ti tonm partou kote ziska en distans en zour lamars; zot ti kouver later en met oter. 32Tou lazournen, tou lannwit, son lannmen lazournen, lepep ti ranmas kay e met partou. Personn pa ti'n anmas mwens ki 1,000 kilo. Zot ti tal tou sa lavyann zwazo partou, toultour kan.
33Me lavyann ti ankor anba zot ledan e zot pa ti ankor fini mase, ki SENYER ti pran lakoler kont lepep; SENYER ti fer en fleo tonm lo zot. 34Zot ti apel sa landrwa Kibrot-Taava, savedir Latonm bann dezir, akoz la, zot ti anter sa bann ki ti annan lanvi manz lavyann.
35Apre sa, lepep ti kit Kibrot-Taava, pour al dan direksyon Haserot, kot zot ti kanpe.
Currently Selected:
Nonm 11: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
