Nonm 9
9
Dezyenm Pak
1SENYER ti koz avek Moiz dan dezer Sinai. Sa ti dan dezyenm lannen apre ki zot ti'n sorti Lezip. I ti dir li: 2Pep Izrael i devre fet Pak dat ki i ganny fikse. 3Zot ava selebre sa lafet dan letan ki'n ganny fikse, lo katorzyenm zour sa mwan, zis apre soley kouse. Gard byen sa ler pour selebre Pak e fer egzakteman dapre son bann rityel ek regleman.
4Moiz ti dir pep Izrael ki zot devre selebre Pak. 5Zot ti selebre Pak lo katorzyenm zour dan sa premye mwan, apre soley kouse. Pep Izrael ti fer egzakteman parey SENYER ti'n ordonn Moiz.
6Me ti annan detrwa dimoun ki pa ti pir, akoz zot ti'n tous en kadav. Zot pa ti kapab selebre Pak sa zour. Alor, sa menm zour, zot ti al war Moiz ek Aaron. Zot ti dir li, 7“Nou dan en leta enpir akoz nou'n tous en kadav. Akoz zot in anpes nou prezant nou lofrann SENYER lo dat fikse parey lezot Izraelit?”
8Moiz ti reponn zot, “Espere, les mwan ekoute ki SENYER ava ordonnen lo zot size.”
9SENYER ti koz avek Moiz: 10Dir avek pep Izrael: Si ozordi, oubyen dan bann zenerasyon fitir, en zonm i vin enpir akoz i'n tous en kadav oubyen i pe vwayaze lwen, i ava kanmenm selebre Pak an loner SENYER. 11Me zot bezwen fer li lo dezyenm mwan, katorzyenm zour apre soley kouse. Zot ava manz mouton avek dipen san lelven ek zerb anmer. 12Pa les nanryen reste pour lannmen bomaten; les son karkas antye e pa kas okenn lezo; zot bezwen fer dapre bann lareg konsernan lafet Pak.
13Me sa zonm ki pir, ki pa pe vwayaze e ki pa selebre Pak, i bezwen ganny tire parmi son pep, akoz i pa'n ofer SENYER son lofrann ler ti fodre. Sa zonm ava anmenn konsekans son pese.
14Si en etranze pe reste parmi zot e i anvi selebre Pak an loner SENYER, i devre swiv menm regleman ek bann koutim ki'n ganny etabli pour sa lafet. Zot ava aplik menm regleman pour bann etranze e pour bann natif.
15Zour ki zot ti dres Latant SENYER, nyaz ti kouver Latant Temwannyaz. Aswar, i ti kouver Latant SENYER avek en lalimyer ziska bomaten. 16Sa nyaz ti la toultan. I ti kouver Latant SENYER e aswar i ti annan laparans en dife. 17Sak fwa ki nyaz ti leve par lao Latant, pep Izrael ti deplase dan landrwa kot nyaz ti diriz zot. La kot sa nyaz ti arete, bann Izraelit ti kanpe. 18Pep Izrael ti deplase lo lord SENYER; e zot ti kanpe lo lord SENYER. Osi lontan ki nyaz ti reste par lao Latant, zot ti kontinyen kanpe. 19Kan nyaz ti reste pour lontan lo Latant Rankont SENYER, pep Izrael ti fer servis pour SENYER e zot pa ti deplase.
20Si nyaz ti reste zis pour detrwa zour lo Latant, zot ti kanpe lo lord SENYER; zot ti deplase lo lord SENYER.
21Parfwa nyaz ti reste zis en lannwit ziska bomaten. Alor, kan nyaz ti leve bomaten, zot osi zot ti deplase. Kan nyaz ti reste en lazournen ek en lannwit e ler i ti leve, zot osi zot ti leve e deplase.
22Si nyaz ti reste pour de zour, en mwan, ou menm pli lontan par lao Latant, bann Izraelit ti reste kanpe e zot pa ti bouze. Me kan nyaz ti leve, zot ti deplas avek li.
23Zot ti kanpe lo lord SENYER; zot ti deplase lo lord SENYER. Zot ti fer bann servis pour SENYER dapre bann direktiv ki SENYER ti donnen par lentermedyer Moiz.
Currently Selected:
Nonm 9: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
