2 Kronik 10
10
Diskisyon ant bann Tribi Nor
1Roboanm ti al Sikenm, akoz pep Izrael antye ti'n rasanble Sikenm pour proklanm li koman lerwa. 2Kan Zeroboanm, garson Nebat, ki ti'n sov Lezip akoz Lerwa Salomon, ti antann sa, i ti retournen sorti Lezip. 3Zot ti fer apel li e Zeroboanm avek pep Izrael antye, ti al koz avek Roboanm. Zot ti dir li, 4“Ou papa ti rann nou fardo lour. Alor aprezan, si ou rann nou travay leze e tir sa fardo lour ki ou papa in enpoz lo nou, nou ava servi ou.”
5I ti dir zot, “Retourn kot mwan dan trwa zour.” Sa bann dimoun ti ale.
6Lerwa Roboanm ti al konsilte bann ansyen ki ti dan servis son papa Salomon pandan son vivan. I ti demande, “Ki repons zot konsey mwan donn sa pep?”
7Zot ti dir li, “Si ou bon anver sa pep, si ou servi zot byen e koz byen avek zot, zot ava vin ou serviter pour touzour.”
8Me i pa ti pran kont konsey sa bann ansyen. I ti prefere konsey bann zennzan ki ti'n grandi ansanm avek li e ki ti dan son servis. 9I ti demann zot, “Ki konsey zot donn mwan pour reponn sa pep ki'n dir mwan: Alez fardo ki ou papa in met lo nou?”
10Sa bann zennzan ki'n grandi ansanm avek li, ti reponn, “La sa ki ou pou dir sa bann pep ki'n dir ou: Ou papa ti rann nou fardo lour, me ou alez sa fardo lo nou. Dir zot: Mon pti ledwa i pli gro ki leren mon papa. 11Si mon papa ti plas lo zot en fardo lour, mwan, mon pou rann li pli lour ankor. Mon papa ti bat zot avek en fwet, me mwan mon pou koriz zot avek skorpyon.”
12Alor, trwa zour plitar, Zeroboanm avek lepep antye ti vin kot Roboanm, parey lerwa ti'n dir: Retourn dan trwa zour. 13Lerwa ti koz dir avek zot. Lerwa Roboanm pa ti pran kont konsey bann ansyen. 14I ti reponn zot dapre sa ki bann zennzan ti konsey li, “Mon papa ti rann zot fardo lour, me mwan, mon pou ogmant li ankor. Mon papa ti pini zot avek fwet, me mwan mon pou koriz zot avek skorpyon.”
15Alor, lerwa pa ti ekout sa ki lepep ti annan pour dir. Bondye ti'n fer bann levennman tourn konmsa pour fer realize parol ki SENYER ti'n dir avek Zeroboanm, garson Nebat, par Ahiya, en Silonit.
16Kan pep Izrael antye ti war ki lerwa pa pare pour ekout zot, zot ti reponn lerwa:
Ki par nou annan avek David!
Nou napa nanryen avek garson Zese!
Pep Izrael! Annou retourn dan nou latant.
David! Okip ou prop zafer!
Alor, pep Izrael, zot ti retourn se zot, dan zot latant. 17Roboanm ti kontinyen renny lo pep Izrael ki ti reste dan bann lavil Zida.
18Lerwa Roboanm ti anvoy Hadoranm, sef ki ti ansarz travoforse. Me bann Izraelit ti saboul li avek ros e touy li. Roboanm ti sot lo son kales pour sove e al Zerizalenm. 19Konmsa ki ziska ozordi pep Izrael, in revolte kont lafanmir David.
Currently Selected:
2 Kronik 10: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
