2 Kronik 11
11
Roboanm, Lerwa Zida
1Kan Roboanm ti ariv Zerizalenm, i ti rasanble pep Zida ek tribi Benzamen: 180,000 meyer gerye, pour al lager kont rwayonm Izrael, pour li retourn rwayonm Roboanm anba son kontrol. 2Me Bondye ti koz avek profet Semaya: 3Dir Roboanm, garson Salomon, lerwa pep Zida e pep Izrael dan teritwar Zida ek Benzamen: 4La sa ki SENYER i deklare: Zot pa pou monte pour al lager. Zot pa pou lager kont zot bann frer! Sakenn, retourn se li, akoz se mwan ki'n fer sa arive. Alor, zot ti obei parol SENYER. Zot ti retourn se zot parey SENYER ti'n dir.
5Roboanm ti etabli li dan Zerizalenm e i ti fer konstri bann lavil fortifye dan Zida: 6Betlehenm, 7Bet-Sour, Soko, Adoulanm, 8Gat, Maresa, Zif, 9Adoraim, Lakis, Azeka 10Sora, Ayalonn, ek Hebron, bann lavil fortifye ki ti dan teritwar Zida ek Benzamen. 11Roboanm ti ranforsi miray sa bann lavil. I ti nonm bann komandan e met anplas rezerv manze, delwil ek diven. 12I ti osi plas bann gran boukliye ek bann lans dan tou sa bann lavil pour fer zot pli for. Konmsa, Roboanm ti gard teritwar Zida ek Benzamen anba son pouvwar.
Pret ek Levit I Ralye dan kote Zida
13Bann pret ek bann levit ti sorti partou kote dan Izrael pour zot ralye dan kote Roboanm. 14Bann levit ti abandonn zot lakour ek zot propriyete pour vin etabli zot dan teritwar Zida ek Zerizalenm, akoz Zeroboanm ek son bann garson ti anpes zot egzers zot fonksyon pret pour SENYER. 15Zeroboanm ti swazir son bann prop pret pour bann landrwa sakre pour servi bann fo bondye dan laform bouk ek toro ki i ti'n fabrike. 16Me ti annan osi bann ki ti sorti dan diferan tribi Izrael, bann ki ti'n deside servi SENYER, Bondye Izrael avek tou zot leker, pour swiv bann levit. Zot ti vin Zerizalenm pour ofer sakrifis pour SENYER, Bondye zot zanset. 17Sa ti fer rwayonm Zida vin pli for e zot ti ankouraz Roboanm, garson Salomon, pandan sa 3 an; zot ti swazir pour swiv legzanp lerwa David ek Salomon.
Lafanmir Roboanm
18Roboanm ti marye avek Mahalat, fiy Yeremot, garson David. Son manman ti apel Abihail, fiy Eliab ki ti garson Zese. 19Mahalat ti ganny trwa garson: Yeous, Semarya ek Zahanm. 20Apre, Roboanm ti remarye avek Maaka fiy Salomon ki ti ganny: Abiya, Atai, Ziza, ek Selomit. 21Roboanm ti kontan Maaka, fiy Absalon plis ki tou lezot son bann fanm marye ek bann menazer. Annefe, i ti annan 18 fanm marye, ek 60 fanm menaz. I ti fer 28 garson ek 60 fiy. 22Roboanm ti swazir Abiya, garson Maaka, koman sef parmi son bann frer, akoz i ti annan lentansyon fer li vin lerwa dan son plas. 23I ti azir avek disernman, e plas lezot son bann garson en pe partou dan bann lavil fortifye dan teritwar Zida ek Benzamen. I ti fourni zot avek bokou provizyon e swazir en kantite fanm pour zot.
Currently Selected:
2 Kronik 11: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
