2 Kronik 9
9
Larenn Saba I Vizit Lerwa Salomon
1Kan larenn Saba ti antann koz lo lerwa Salomon, i ti desann Zerizalenm pour li teste Salomon avek detrwa kestyon difisil. I ti annan en gran lantouraz ek bann samo ki ti pe anmenn tou kalite bon lesans, en kantite lor, ek pyer presyez. Ler i ti ariv kot Salomon i ti rakont tou sa ki i ti annan dan son lespri. 2Salomon ti donn leksplikasyon tou sa ki i ti demande; napa nanryen ki Salomon pa ti kapab eksplike. 3Larenn Saba ti ekout bann parol lasazes Salomon; i ti vizit son pale ki i ti'n konstri. 4I ti war bann pla ki ti servi atab, lakaz son bann zofisye, lorganizasyon personnel dan pale ek zot liniform, son bann domestik ek zot liniform, sakrifis konplet ki i ti ofer dan tanp SENYER. I ti reste dan ladmirasyon.
5Alor, larenn ti dir Salomon: Tou sa ki mon'n antann dir depi dan mon pei, konsernan ou bann parol ek ou gran lasazes, i vre. 6Mon pa ti krwar mon zorey, ziska ki mon'n war avek mon prop lizye. Mon pa ti'n antann lanmwatye; sa ki mon'n war i depas tou sa ki mon'n tande. 7Ou bann serviter ek tou ou lantouraz, zot annan lasans reste dan ou prezans e antann ou bann parol lasazes.
8Loue SENYER ou Bondye, ki'n fer ou en gran faver, pour plas ou lo son tronn koman lerwa pour SENYER, ou Bondye. Ou Bondye i kontan Izrael, e i oule etabli li pour touzour. I'n plas ou koman lerwa lo zot pour gouvern avek drwatir e aplik lazistis.
9Larenn Saba ti fer lerwa Salomon kado trwa tonn edmi lor, en gran kantite lesans ki personn pa'n zanmen war ek pyer presyez.
10Bann zonm Hiranm ek bann zonm Salomon ki ti'n al Ofir, ti retourn avek lor, dibwa santal ek pyer presyez. 11Avek sa dibwa santal, Salomon ti fer plans pour tanp SENYER ek pale rwayal. I ti osi fer fabrik bann lenstriman lanmizik: Lir ek laarp pour bann mizisyen. Personn pa ti'n deza war keksoz parey, dan pei Zida.
12Lerwa Salomon ti fer kado Larenn Saba tou sa ki i ti anvi, bokou plis ki sa ki i ti'n anmennen pour Salomon. Apre, larenn Saba ti retourn dan son pei avek son bann serviter.
Larises Salomon
13Dan en sel lannen, Salomon ti resevwar 20 tonn lor. 14Anplis, ti annan bann taks ki bann komersan ek bann marsan ti anmennen, san kont lor ek larzan ki bann lerwa Arabi ek bann gouverner pei ti donn Salomon.
15Lerwa Salomon ti fer fabrik 200 gran boukliye avek lor pir. Ti bezwen sis kilo lor pour fer sak boukliye. 16I ti fer fabrik 300 pti boukliye avek lor pir e sak boukliye ti servi trwa kilo lor. I ti plas sa bann boukliye dan batiman ki ti apel: Mezon Lafore Liban. 17Lerwa ti fer fabrik en gran tronn avek livwar e rekouver avek lor. 18Sa tronn ti annan sis mars e en lot mars annor devan tronn; tousala ti rekouver avek lor. Ti annan osi lebra lo sak kote tronn ek de lyon skilpte, debout kot sak lebra. 19Ti annan osi 12 lyon, enn kot sak kote mars. Okenn lerwa pa ti'n deza fer en tel keksoz dan son rwayonm. 20Tou bann lakoup lerwa Salomon ti annor e tou vesel pour Mezon Lafore Liban ti osi annor pir. Larzan an metal, ti napa gran valer dan lepok lerwa Salomon. 21Bann bato lerwa Salomon ti al Tarsis avek bann maren lerwa Hiranm. Tou le 3 an, sa bann bato ti retourn avek kargezon lor, larzan, livwar, zako ek pan.
22Larises ek lasazes Salomon ti depas tou lerwa lo later. 23Annefe, Bondye ti'n met lasazes dan son leker e bann lerwa ti sorti partou pour vin ekout li. 24Toulezan, sak lerwa ki ti vizit li, ti ofer li kado bann lobze annarzan e annor, lenz, anminisyon, parfen, seval ek bourik.
25Salomon ti fer konstri bann lekiri pour 4,000 seval ek kales lager. I ti posed 12,000 kavalye ki i ti plas dan serten lavil e en pe i ti kit kot li Zerizalenm. 26Salomon ti domin lo bann lerwa depi larivyer Efrat atraver pei Filisten, ziska frontyer Lezip. 27Lerwa ti fer larzan dan Zerizalenm vin konmsi ros, e sed an gran kantite, parey sikomor dan Sefela. 28Seval lerwa ti ganny enporte sorti Lezip ek bokou lezot pei.
29Tou leres bann aksyon Salomon, depi premye ziska dernyen, in ganny ekri dan listwar profet Natan, dan bann profesi Silonit Ahiya, ek bann vizyon profet Yeedo konsernan Zeroboanm, garson Nebat. 30Salomon ti renny pandan 40 an dan Zerizalenm, lo pep Izrael antye. 31Salomon ti mor e ganny antere dan lavil David son papa; son garson Roboanm ti vin lerwa dan son plas.
Currently Selected:
2 Kronik 9: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
