Psonm 9
9
Remersye Bondye pour Son Lazistis
Psonm David, pour sef lakoral, avek lakonpannyman lanmizik.
1SENYER! Avek tou mon leker
mon remersye ou.
Mon pou rakont tou ou bann mervey.
2Mon pou rezoui dan lazwa,
mon pou loue ou non, Bondye Treo!
3Dan ou prezans, mon bann lennmi i rekile;
zot tonbe e ganny detri.
4Annefe, la lo ou tronn, ou rann en zizman ki zis
e ou'n donn mwan rezon.
5Ou'n kraz bann nasyon etranze;
ou'n detri bann malfeter
e zot non in ganny efase pour touzour.
6Bann lennmi in ganny detri konpletman.
Zot bann lavil in ganny kraze;
zot in ganny konpletman oubliye.
7Me SENYER i renny pour touzour.
In etabli son tronn pour li rann zizman.
8I pou ziz lemonn avek lazistis;
i pou ziz bann pep avek drwatir.
9SENYER i en soutyen
pour sa enn ki ganny meprize.
I en soutyen dan letan maler.
10Bann ki konn ou non,
zot met zot konfyans dan ou.
Akoz ou SENYER,
zanmen ou abandonn
sa enn ki vin kot ou.
11Sant pour SENYER
ki renny dan Zerizalenm!
Rakont son bann mervey parmi bann pep!
12Bondye pa oubliy lapenn bann malere.
I vanz sa enn ki fer krim.
13SENYER! Pran pitye pour mwan.
Gete ki mannyer mon bann lennmi
pe fer mwan soufer!
Zis ou ki kapab delivre mwan dan lanmor,
14pour mwan rakont devan laport Zerizalenm
tou bann mervey ki ou'n fer.
Mon pou danse dan lazwa,
akoz ou'n delivre mwan.
15Bann nasyon in tonm dan trou
ki zot ti'n fouye;
zot in pri dan latrap ki zot ti'n mete.
16SENYER in montre ki i ete.
Dan son zizman,
in fer bann move dimoun
pri dan zot prop latrap.
17Bann malfeter pou al dan lemonn lanmor,
parey tou bann nasyon ki oubliy Bondye.
18Non!
Bann pov pa pou touzour ganny oubliye.
Lespwar bann malere pa'n perdi pour touzour.
19Leve SENYER!
Pa les bann imen pran kontrol.
Anmenn bann nasyon devan ou
pour zot ganny zize.
20Fer zot per ou, SENYER!
Zot ava rekonnet ki zot zis bann imen.
Currently Selected:
Psonm 9: BSK
Highlight
Share
Compare
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
