Psonm 74
74
Lapriyer pour Demann Delivrans Pei
Poenm Asaf.
1Mon Bondye!
Akoz ou'n rezet nou pour touzour?
Akoz sa gran lakoler kont nou, ou troupo?
2Mazin ou pep ki ou ti swazir depi lontan,
tribi ki ou'n sove pour fer li ou pep.
Mazin montanny Siyon kot ou'n fer ou demer.
3Vin kot sa bann ki'n ganny detri pour touzour.
Lennmi in demoli tou sa ki ti dan ou tanp.
4La kot ou ti rankontre nou,
zot in plant zot bannyer.
5Ou ti ava krwar bann zonm
ki pe koup pye dibwa
dan lafore, avek zot lars.
6A koud lars ek marto,
zot in demoli tou bann skilptir an bwa.
7Zot in kraz tou e met dife dan ou sanktyer;
zot in profann landrwa sen kot ou reste.
8Zot ti dir dan zot menm:
Annou kraz zot konpletman.
Zot ti met dife
dan tou bann landrwa sen dan pei,
kot zot ti rankontre Bondye.
9Nou nepli war ou prezans.
Nou nepli annan okenn profet.
Personn parmi nou pa konnen
ziska kan sa sityasyon pou dire.
10Mon Bondye!
Ziska kan ou bann lennmi
pou kontinyen riy ou?
Eski zot pou mepriz ou non pour touzour?
11Akoz ou pa lev ou lanmen drwat?
Akoz ou reste lebra krwaze?
12Pourtan, Bondye i mon Lerwa depi touzour.
Ou'n donn nou souvan laviktwar dan nou pei.
13Avek ou lanmen pwisan,
ou ti separ lanmer an de
e kraz latet bann mons lanmer.
14Ou'n kraz bann latet Leviatan.
Ou'n donn li pour manze
avek en pep ki reste dan dezer.
15Ou ki'n fer koule bann sours delo
ek bann larivyer,
ou'n fer sek bann gran larivyer
ki pa zanmen sek.
16Lizour i pour ou, lannwit i pour ou.
Ou ki'n enstal lalin ek soley.
17Ou ki'n fikse later avek tou son bann balizaz;
ou ki'n kre sezon lete ek liver.
18Pa oubliye SENYER:
Ou bann lennmi pe ensilte ou.
En pep fou pe denigre ou non.
19Pa les ou tourtrel ganny manze
par bann zannimo sovaz.
Pa oubliy bann malere
parmi ou pep pour touzour.
20Mazin ou lalyans;
vyolans pe kasyet dan bann landrwa fernwanr.
21Pa les bann dimoun mwen fortinen
ganny dezonore.
Fer ki bann pov ek bann malere
ava loue ou non.
22Leve SENYER! Vin defann ou lakoz.
Mazinen ki mannyer en bann fou
pe touzour ensilte ou.
23Pa oubliye: Ou bann ladverser pe fer tapaz;
ou bann lennmi pa arete kriye.
Currently Selected:
Psonm 74: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
