Psonm 73
73
Lazistis Bondye
Psonm Asaf.
1Wi! Bondye i bon anver Izrael;
anver dimoun avek en leker pir.
2Me mwan, mon ti pre pour tonbe;
mon lipye ti'n preski glise.
3Ler mon ti war
koman bann malfeter pe prospere,
mon ti zalou sa bann arogan.
4Zot pa soufer;
zot reste byen portan e an bonn sante.
5Zot napa okenn traka parey lezot;
maler pa tonm lo zot parey lo lezot dimoun.
6Alor, lorgey i koman en kolye dan zot likou;
vyolans i sel lenz ki zot mete.
7Zot lizye i boufi avek lagres;
zot leker i deborde avek mesanste.
8Zot sikannen e fer konplo pour fer dimal;
zot menase avek larogans.
9Zot servi zot labous pour ensilte lesyel,
zot lalang pour kritik tou lo later.
10Pour sa rezon, dimoun i lo zot kote
e anval zot parol parey delo.
11Zot dir: Koman Bondye i konnen?
Eski Treo i annan konnesans?
12Get zot, sa bann move dimoun!
Zot napa traka, zot kontinyen akimil larises.
13Mon'n reste onnet pour nanryen;
mon'n lav mon lanmen
pour montre mon linosans.
14Tou lazournen mon'n ganny bate;
tou le bomaten mon ganny pini.
15Si mon ti'n deside koz parey zot,
mon ti ava'n trai ou pep.
16Ler mon ti esey konpran,
mon ti war sa tro difisil,
17ziska ler mon ti'n antre dan sanktyer Bondye.
La, mon ti konpran sa ki pou arive avek zot.
18Vreman! Ou met zot lo bann semen glise;
ou fer zot al ver zot destriksyon.
19En sel kou, zot ti ganny detri;
zot fini, lafreyer i balye zot.
20Ler ou leve SENYER,
zot in disparet
parey ler ou sorti dan en rev.
21Ler mon leker ti dan lapenn,
mon ti santi mwan konpletman desire.
22Mon ti koman en abriti.
Mon ti parey en bebet devan ou.
23Pourtan, mon touzour reste atase avek ou;
ou atrap mon lanmen drwat.
24Ou kondwir mwan par ou bann konsey;
apre, ou ava akey mwan dan laglwar.
25Lekel ki mon annan dan lesyel apard ou?
Lo later, mon sel dezir, se zis ou.
26Mon lekor ek mon leker i'n fatige.
Me Bondye i lafors mon leker,
mon par patrimwann pour touzour.
27Annefe, dimoun ki lwen avek ou pou disparet;
ou detri sa bann ki abandonn ou.
28Me pour mwan, kan mon apros avek Bondye,
mon dan lazwa.
Mon swazir Senyer BONDYE
pour mon labri
e mon pou rakont tou son bann byenfe.
Currently Selected:
Psonm 73: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
