Psonm 72
72
Lapriyer pour Lape
Psonm Salomon.
1Mon Bondye!
Donn lerwa lasazes pour pas bon zizman.
Donn sa garson lerwa lazistis.
2I pou ziz ou pep avek drwatir
e ou bann pov avek lazistis.
3Montanny! Anmenn lape pour lepep.
Kolin! Anmenn lazistis!
4Lerwa ava defann lakoz bann pov,
ed dimoun ki dan bezwen
e kraz bann eksplwater.
5Fer li viv ziska lafen lemonn,
osi lontan ki lalin ek soley i briye.
6I ava parey lapli ki tonm lo laplenn,
e lapli ki aroz later.
7Lazistis ava fleri pandan son renny.
Lape ava dire osi lontan ki lalin i briye.
8I pou gouvern depi en bout lanmer ziska lot,
depi larivyer Efrat ziska dan bout later.
9Bann zabitan dezer ava kourbe devan li
e son bann lennmi ava lis lapousyer.
10Bann lerwa Tarsis ek dan bann zil
ava anmenn kado pour li.
Bann lerwa Seba ek Saba
ava donn li bann lofrann.
11Tou bann lerwa ava prostern devan li
e tou bann nasyon ava servi li.
12Alor, i ava sekour bann malere ki demann led
ek bann pov ki napa personn pour ed zot.
13I ava pran pitye pour bann ki feb ek bann malere;
i ava sov lavi bann pov.
14I ava delivre zot kont lopresyon ek vyolans,
akoz zot lavi i annan valer pour li.
15Fer li viv lontan!
Donn li lor ki sorti Seba;
dimoun ava touzour priy pour li.
Bondye ava beni li tou le zour!
16Fer sa pei prodwi en kantite dible
e bann kolin ava kouver avek bann zepi
e son bann fri ava parey sa bann ki sorti Liban!
Fer bann lavil ranpli avek zabitan
parey zerb dan laplenn.
17Son non ava ganny selebre pour touzour;
son repitasyon ava dire pour touzour
e bann pep ava pronons son non
pour zot beni kanmarad.
Tou bann nasyon i deklar li byennere!
18Loue SENYER Bondye, Bondye Izrael!
Li tousel ki fer bann mervey.
19Beni son non glorye pour touzour!
Son laglwar i ranpli later!
Amenn! Amenn!
20Bann lapriyer David, garson Zese i fini la!
Currently Selected:
Psonm 72: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
