Psonm 71
71
Lapriyer En Dimoun Aze
1SENYER! Mon vin pran refiz kot ou.
Pa les mwan toultan ganny imilye.
2Dan ou lazistis,
delivre mwan e sov mwan!
Ekout mwan! Vin delivre mwan.
3Ou menm sa Ros protekter,
landrwa kot mon kapab vini nenport ki moman.
Ou'n deside sov mwan,
akoz ou mon Ros protekter e mon fortres.
4Mon Bondye!
Delivre mwan dan lanmen bann malfeter,
e dan pouvwar kriminel ek dimoun vyolan.
5Senyer BONDYE! Ou menm mon lespwar.
Depi mon lazenes SENYER,
mon fer ou konfyans.
6Depi dan vant mon manman mon kont lo ou.
Ou ki'n tir mwan dan vant mon manman.
Toultan, mon pou sant ou louanz.
7Mon lavi ti paret drol pour bokou dimoun.
Me ou, ou mon lafors e mon protekter.
8Mon labous i ranpli avek ou louanz;
tou lazournen mon sant ou laglwar.
9Pa rezet mwan dan mon vye zour;
pa abandonn mwan ler mon nepli annan lafors.
10Mon bann lennmi i koz lo mwan;
zot fer konplo ansanm kont mwan.
11Zot dir: Bondye in abandonn li;
napa personn pou delivre li,
annou depese atrap li.
12Mon Bondye!
Pa reste lwen avek mwan.
Mon Bondye!
Vit, vin delivre mwan.
13Fer dimoun ki akiz mwan tonbe
e ganny kouver ek laont;
e sa bann ki rod mon maler
tonm dan dezoner ek imilyasyon!
14Mwan, mon pou kontinyen espere
e mon pou touzour sant ou louanz.
15Mon pou rakont bann gran keksoz ki ou'n fer.
Tou le zour, mon pou fer konnen
koman ou'n sov nou.
I annan sitan bokou,
ki mon pa pou kapab rakont tou.
16Mon pou vin rakont bann mervey
ki Senyer mon BONDYE in fer.
Mon pou proklanm ou lazistis,
selman ou lazistis.
17Mon Bondye!
Depi mon ti ankor zenn,
ou'n ansenny mwan.
Mon ankor pe proklanm
bann mervey ki ou'n fer.
18Mon Bondye!
Aprezan ki mon'n vye avek seve blan,
pa abandonn mwan.
Les mwan proklanm ou lafors
avek sa zenerasyon
e ou pwisans avek zenerasyon fitir.
19Mon Bondye!
Ou lazistis i sitan gran ki i tous lesyel.
Mon Bondye!
Ou'n fer telman gran mervey!
Mon Bondye!
Lekel ki parey ou?
20Menm si ou'n fer mwan konn
maler ek soufrans,
ou pou redonn mwan lavi;
ou pou fer mwan remonte,
sorti dan profonder later.
21Ou pou ogmant mon loner
e konsol mwan ankor.
22Mon pou loue ou avek laarp.
Mon Bondye! Mon pou sant ou fidelite.
Mon pou zwe lanmizik pour ou,
Bondye Sen pep Izrael.
23Mon pou zwe lanmizik pour ou,
mon pou sant mon lazwa,
akoz ou'n sov mon lavi.
24Tou le zour, mon pou rakont ou lazistis,
akoz sa bann ki ti oule fer mwan ditor,
in ganny kouver avek laont ek dezoner.
Currently Selected:
Psonm 71: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
