Psonm 7
7
En Lapriyer pour Demann Lazistis
En konplent sante par David anver SENYER, o size Kous, en Benzamit.
1SENYER, mon Bondye!
Mon vin pran refiz kot ou.
Sov mwan!
Delivre mwan avek mon bann persekiter,
2avan ki zot desir mwan parey en lyon
e trenn mwan avek zot,
san ki personn i sov mwan.
3SENYER, mon Bondye!
Si mon'n fer ditor dimoun;
si mon'n mal azir;
4si mon'n fer dimal bann ki ti dan mon kote;
si mon'n detri propriyete mon bann lennmi san rezon;
5Si mon'n fer tousala,
alor, lennmi ava pourswiv mwan
e atak mwan.
I ava kraz mwan vivan lo later
e trenn mon loner dan lapousyer.
6Dan ou lakoler, leve SENYER!
Debout kont lakoler mon bann lennmi!
Sov mwan, ou ki rann lazistis!
7Tou bann pep lo later ava antour ou.
Depi lo ou tronn lao, diriz ou pep.
8SENYER! Ou ki ziz bann nasyon,
rann zizman dan mon faver
dapre mon lentegrite.
9Bondye ki zis!
Ou ki egzamin sa ki pase dan mon lespri
e dan mon leker,
fer fini mesanste bann malfeter.
Ankouraz sa bann ki fer dibyen.
10SENYER i mon protekter.
I sov sa enn ki annan en leker pir.
11Bondye i en ziz ki zis;
i endinyen sak zour.
12Lennmi i rekonmanse,
i fit son lepe.
I redi son lark e met li pare.
13I prepar son bann zarm mortel
e fer son bann dart vin bann tizon dife.
14Gete! I dan douler lanfantman pour mesanste;
i ansent avek lenzistis e i donn nesans mansonz.
15Zot fouy en gran trou,
me zot menm ki tonm ladan.
16Maler ki zot ti'n prepare i retonm lo zot.
Zot bann kou vyolan i retonm lo zot prop latet.
17Mon pou remersye SENYER akoz i zis.
Mon pou loue non SENYER Treo.
Currently Selected:
Psonm 7: BSK
Highlight
Share
Compare
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
